Балаларга шатлык

Балаларга шатлык
Арча шәһәренең янәшә урнашкан Борһанов һәм Зәйнуллин урамнары бик күп тантаналарга шаһит. Социаль ипотека буенча, ветераннар өчен төзелгән йортларның иң күбесе шуларда урнашкан.
Әле кайчан гына җиргә сеңгән бараклар, чүплек өемнәре, хәрабә гараж, сарайлар иде монда. Ә хәзер карап туймаслык мәһабәт йортлар, асфальт җәелгән төзек урамнар, күңел ял итәрлек манзара. Ике урам чатында ясалган матур бакча да нәкъ үз урынында.
Менә шул бакча янәшәсендә, мәһабәт йортлар арасында ясалган балалар мәйданчыгы тирә–юньне тагын да ямьләндереп җибәрде. Аны Арча урман хуҗалыгы эшчеләре күңел җылысын биреп төзегән.
— Муниципаль район башлыгы Алмас Назиров инициативасы белән шәһәребездә шундый утыздан артык мәйданчык барлыкка килде, — диде район башкарма комитеты җитәкчесе урынбасары Надия Мифтахетдинова. — Бүген менә тагын икесен ачабыз. Аларны төзүдә ТР Дәүләт Советы депутаты Ринат Закиров та булышлык күрсәтте.
Мәйданчыкның тагын берсе — үзәк стадионда. Аны ачу тантанасында район башкарма комитеты җитәкчесе урынбасары Надия Мифтахетдинова, мәгариф идарәсе җитәкчесе Рина Бәдриева, балалар эшләре, спорт һәм туризм бүлеге мөдире Зиннур Сәгыйтов катнашты.
Бу көнне Арчаның 3нче номерлы башлангыч мәктәбе укучылары биредә “Күңелле старт-лар” уеннары оештырды.
Районда балалар өчен күп нәрсә эшләнә, быел гына җиде бакча һәм өстәмә төркемнәр ачылды. Әле яңа гына Югары Божа авылында 25 балага бакча ныклап төзекләндерелгәннән соң ишекләрен ачты. “Арча КСМы” төзүчеләре аны әкият йорты иткән. Нык тузган иде бу бакча, язмышы да кыл өстендә калган иде. Муниципаль район башлыгы Алмас Назиров: “Бакча булырга тиеш!” — диде һәм шулай булды да.
Бакчаны ачу тантанасында чыгыш ясап, район башкарма комитеты җитәкчесе урынбасары Надия Мифтахетдинова коллективны, ата–аналарны муниципаль район башлыгы Алмас Назиров исеменнән күңелле вакыйга белән тәбрик итте, төзүчеләргә рәхмәт әйтте, уңышлар теләде. “Арча КСМы” ширкәте җитәкчесе Рафаэль Муллагалиев бакча коллективына, балаларга, ата–аналарга бәхет теләде, символик ачкыч тапшырды.