Яшүсмерләргә сатсаң –штраф түлә

Яшүсмерләргә сатсаң –штраф түлә
20 ноябрьдән 30 ноябрьгә кадәр балигъ булмаганнарга алкоголь продукциясен сату белән бәйле административ хокук бозулар һәм җинаятьләрне ачыклау һәм кисәтү максатыннан чаралар үткәрелде.
Аларда балигъ булмаганнар белән эшләү бүлеге өлкән инспекторы, капитан Алсу Һидиятуллина, инспекторлары, өлкән сержант Гөлнар Галимова, капитан Йолдыз Гарипова һәм участок инспекторлары катнашты. Бу көннәрдә шәһәр, авыл кибетләренә рейдлар оештырылды, мәктәп яшендәгеләргә (18 яшькә кадәр) аракы сату-сатмау очраклары ачыкланды.
— Бу эшне без ел дәвамында алып барабыз, — ди Алсу Айдаровна. — Ел башыннан балигъ булмаганнарга алкоголь продукциясен сату белән бәйле административ хокук бозган 22 очрак теркәлде, кибетчеләргә штраф салынды. Штрафның күләме 3000 сумнан башлап иде. 24 ноябрьдән штраф күләмнәре бик нык артты. Хәзер кибетчеләргә балигъ булмаган яшүсмерләргә алкоголь продукциясе саткан өчен Кодексның 2.1 бүлеге 14.16 маддәсе нигезендә 30000нән 50000 сумга кадәр, вазифаи затларга 100000нән 200000 сумга (элек 10000–20000 сум иде), юридик затларга 300000нән 500000 сумга кадәр (элек 80000–100000 сум иде) штраф карала.
20–30 ноябрьдә үткәрелгән чара вакытында да мондый очраклар теркәлгән. Арча кибетләренең берсендә кибетче 16 яшьлек яшүсмерләргә сыра сатуда тотылган. Россия Федерациясе Административ хокук бозулар кодексының 14.16 маддәсе 2.1 пункты нигезендә аңа беркетмә төзелгән.
Төбәк-Чокырчада 15 яшьлек яшүсмер 18, 20 яшьлек туганнары белән сыра эчкәндә тотылган. Балигъ булмаган яшүсмерне спиртлы эчемлек куллануга тарт-кан өчен кодексның 6.10 маддәсе 1 бүлеге нигезендә 2 егет һәм кызга, 20.22 маддә нигезендә яшүсмернең әнисенә (чөнки беркетмәне аның үзенә 16 яшьтән соң гына төзергә була) беркетмә языла.
— Спиртлы эчемлекләр генә түгел, 18 яшькәчә егетләр һәм кызларга тәмәке дә сатылырга рөхсәт ителми, — ди Алсу Һидиятуллина. — Кайбер кибетләрдә хәтта бу хакта аңлатып белдерүләр дә эленеп куелмаган.
Эчке эшләр бүлегенең балигь булмаганнар белән эшләү бүлеге инспекторлары һәм участок инспекторлары кичләрен клубларга да даими рейдлар ясыйлар. Түбән Атыда рейд өлкән участок инспекторы, майор Илнар Зөбәеров катнашында үткән. Мәктәптә укучы 15 яшьлек 2 кыз тотылган. Лесхозда аңарчы 16 яшьлек 4 егет алар “кулына эләккән”. Әлбәттә, инде төннәрен урамда йөрергә яратучы яшүсмерләр җәзасыз калмаган, тик, кызганыч, беркетмә үзләренә түгел, ә әниләренә төзелгән.
— Закон нигезендә кышкы вакытта 18 яшькәчә егетләр һәм кызларга 22 сәгатьтән соң урамда йөрү рөхсәт ителми, — ди Алсу Айдаровна. — Тик бер генә клуб, мәдәният йортында да бу хакта белдерү дә, законнан өземтә дә юк. Клуб мөдирләре, укытучылар, ата-аналар тарафыннан бу законның үтәлеше контрольдә торырга тиеш. Без барыбыз да алар язмышы өчен җаваплы.
Гөлсинә ЗӘКИЕВА