Бар өмет — яшь буында

Бар өмет — яшь буында
Ришвәтчелекнең начар гамәл, Аллаһы Тәгалә каршында гөнаһ икәнлеген белсәк тә, аннан котылу әмәле һич күренми. Коррупция гасырдан гасырга күчеп, артыбыздан куа килә. Заманалар үзгәрә барган саен ришвәтчелек тә заманчага әйләнә, яңача юллары барлыкка килә.
Ришвәтчелектә бер якны гына гаепләп булмый, әлбәттә, аны алучы да, бирүче дә бер үк дәрәҗәдә диярлек өлеш кертә. Әйтик, кайчак гади генә мәсьәләне дә хәл итеп булмый: төрле проблемалар “ярдәмендә” аяк чалулар барлыкка килә. Шуннан, ансат кына хәл ителмәячәген аңлаган бәндә ирексездән акча “төртергә” мәҗбүр була. Ә эш нәкъ менә шуннан гына торган икән, мәсьәлә шунда ук уңай якка хәл ителә дә куя. Үзегез гаепле, нигә ришвәт бирәсез, дип кешегә еш кына акыл өйрәтергә яратучылар, шуңа охшашлы проблемалар белән күзгә–күз очрашкач, ирексездән үзләре үк шул адымга барырга мәҗбүр була. Димәк, халык мәкалендәгечә, балык баштан чери булып чыга түгелме? Балаларны укырга керткәндә, дәрәҗәле эшкә урнашканда яисә башка очракларда ришвәт бирүләр инде күпләр өчен сер түгел, тик кайчак балаларын хәтта бакчага урнаштырганда да ришвәтсез котыла алмаган очраклар турында ишеткәләргә туры килә. Башка юлы булмагач, нишлисең...
Ришвәтчелектән котылу өчен безгә әле озак еллар көрәшергә туры киләчәк. Бар өмет яшь буында. Чөнки яшь буында кечкенәдән коррупциягә каршы тискәре караш тәрбияләмәсәң, нәтиҗәсе булмаячак. Яшьләргә шуны аңлатуны максат итеп, мәктәпләрдә, төрле уку йортларында чаралар үткәрелә. Арча педагогика көллиятендә дә студентлар белән түгәрәк өстәл артында замана афәтләренә каршы көрәшүгә бәйле сөйләшүләр еш булып тора. 3 декабрьдән 9 декабрьгә кадәр узганы “Мин коррупциягә каршы” дип аталды. Аңа кадәр студентлар такмаклар, рифмалы әйтем, плакатлар, видеороликлар һәм “Тукай шәкертләре” дигән газетаның махсус номерын чыгару конкурсларында катнаштылар.
7 декабрьдә көллияттә “Без коррупциягә каршы” дигән темага “Түгәрәк өстәл” үткәрелде. Анда Арча муниципаль район башлыгының коррупциягә каршы тору буенча ярдәмчесе Дамир Абдуллин, Арча районының иҗтимагый советы рәисе Ренат Һидиятов, “Бердәм Россия” сәяси партиясенең җирле бүлекчәсе башкарма комитеты җитәкчесе Тәлгать Җәләлетдинов, Россия эчке эшләр министрлыгының Арча районы буенча бүлеге хезмәткәре Айнур Вәлиев, “Татарстан Республикасының яшьләр берлеге” региональ иҗтимагый оешмасы рәисе Светлана Пермякова, “Татарстан – Яңа гасыр” иҗтимагый хәрәкәтенең “ХХI гасыр яшьләре” клубыннан Миләүшә Шакирова катнаштылар.
Дамир Абдуллин коррупциягә каршы район комиссиясе эшчәнлеге белән таныштырды, коррупция очраклары билгеле булганда 3–25–33 номерлы “Ышаныч телефоны”на шалтыратырга кирәклеген әйтте.
Түгәрәк өстәл артында сөйләшүгә 1–3 курс студент-лары чакырылган иде. Алар үзләрен борчыган сорауларны гына биреп калмыйча, фикерләре белән дә уртаклашты, шулай ук катнашучылар тарафыннан бирелгән сорауларга да төпле җавап бирделәр. Ренат Һидиятов әлеге очрашуның педагогика көллиятендә узуын аеруча әһәмиятле дип белдерде. “Чөнки сез булачак укытучылар, үзегез эшли башлагач, яшь буынга уңай тәрбия биреп, балаларга коррупциянең тискәре йогынтысы турында аңлату сезнең бурычыгыз”, – дип мөрәҗәгать итте ул студентларга. Ә сөйләшүне йомгаклаганда һәркем бертөрле нәтиҗәгә килде: көрәштә эшне үзебездән башларга, кыю булып, активлык күрсәтергә кирәк.
Розалия ЗИННӘТОВА