Сагынып килдек сезгә без

Сагынып килдек сезгә без
Казан шәһәрендә Бөтендөнья татар конгрессының V корылтае булып үтте.
Анда 800ләп делегат, 300дән артык кунак катнашты. Татарстан Республикасы Президенты Рөстәм Миңнеханов үзенең чыгышында корылтайны тарихи вакыйга, көтеп алынган бәйрәм дип атады. Татар кешесе кайда гына яшәсә дә, һәркайда уңышка ирешә, милләтебезнең дәрәҗәсен күтәрә. Татар халкының бердәмлеге — республика өчен ныклы таяныч.
Делегатлар милләтебезне саклап калу, бердәмлекне ныгыту юллары турында уртага салып сөйләштеләр, моңа ирешү юлларын билгеләделәр. Бөтендөнья татар конгрессы башкарма комитетының яңа составы сайланды, аның рәисе булып яңадан Ринат Закиров калды. Конгрессның яңа башкарма комитеты составында Арча муниципаль район башлыгы Алмас Назиров та бар.
9 декабрьдә Бөтендөнья татар конгрессының V корылтае делегатларының зур төркеме Арча районына килде. Район чигендә аларны ипи-тоз, якты йөз белән бик матур итеп каршы алдылар. Чит җирләрдә яшәүче милләттәшләребез бөтен татарны берләштерүче илаһи көчкә ия булган бөек Тукай ватанына килүләренә чиксез шат иде. Алар бу турыда үзләре дә кат-кат әйттеләр, балкыган йөзләре дә шул турыда сөйли иде.
— Бүген без сезнең белән һәммәбез өчен сөекле булган Тукай җирендә очрашуыбызга чиксез шатбыз, — диде муниципаль район башлыгы Алмас Назиров. — Без барыбыз да бүген искиткеч, дулкынландыргыч минутлар кичерәбез. Без барыбыз да милләтебез, Тукаебыз, Татарстаныбыз булганга бәхетле.
Бер очрашу — үзе бер гомер, дип юкка гына әйтмиләр. Чит җирләрдә яшәүче милләттәшләребез өчен бигрәк тә. Еракта булсалар да, алар өчен Татарстан, Арча бик якын, кайберләренең нәсел җепләре, язмыш юллары районыбызга килеп тоташа. Ташкентта яшәүче Шамил Хәкимовның әти-әнисе Яңа Кенәр һәм Бәхтияр авылларыннан. “Узган гасырның 50нче елларында минем әти Арча МТСында директор булып эшләгән, әни мәктәп директоры булган”, — ди Эстониядә яшәүче Ратиб Камалов.
Г.Тукай исемендәге Арча педагогика көллиятендә, район Мәдәният йортында узган очрашулар да кунаклар өчен истә калырлык булды. Көллият — башлангыч татар сыйныфлары өчен укытучылар әзерли торган бердәнбер уку йорты. Анда Гариф Ахунов, Мөхәммәт Мәһдиев кебек булачак күренекле әдипләр белем алган. Бүген дә көллият яхшы белгечләр әзерләп чыгара. Кунаклар биредә күргәннәрдән бик канәгать калдылар, Сабантуй уеннарында, “Сөмбелә” бәйрәмендә үзләре дә рәхәтләнеп катнаштылар. Дөньяда бердәнбер булган “Әлифба” музеен тәэсирләнеп карадылар.
Район Мәдәният йортында күрсәтелгән никахлашу, килен каршылау йолалары алкышларга күмелде.
Бу көнне без Тукаебызның бөтен милләтебезне берләштереп торучы көчкә ия икәнлегенә тагын бер тапкыр инандык. Кытайда яшәүче милләттәшебез Турсунтай Галиев Арча сәхнәсенә чыгып, нинди тәэсирле итеп Тукай шигырен сөйли! Үзбәкстаннан килгән милләттәшләребез һәр елны Тукайның туган көнен зурлап билгеләп үтүләрен әйтәләр. Арча җирендә алган тәэсирләр шулкадәр көчле — сүз алырга теләүче кунакларга хәтта чиратка басарга туры килә.
— Өлгермибез дип борчылмагыз, әле безнең очрашу Яңа Кырлайда да дәвам итәчәк, — диде муниципаль район башлыгы Алмас Назиров.
Алмас Әминович үзе дә сәнгатькә, әдәбиятка гашыйк, милләтебез дип җан атып торган кеше. Бүген дә ул ерактагы милләттәшләребезне матур сөйләме, бөек Тукай шигырьләрен яхшы белүе белән сокландырды. Кунаклар белән аерым-аерым да, бергәләп тә җылы әңгәмә корды. Кунаклар үзләре белән бүләкләр, сувенирлар да алып килгән. “Төбәк хуҗаларының иң остасы, иң зыялысы, иң акыллыларыннан булган Алмас әфәндегә истәлек өчен” дип язганнар “Нәсел хатирәсе” дигән китапка Мари Республикасында яшәүче Рәйхана Гаязова, Фирзия Сабирҗанова.
Төркиядә яшәүче Бәхзат Акташ, Ятар Байтак, Казахстаннан Камил Муллашев, Самарадан Ильяс Шәкүров, Мәскәүдәге бердәнбер татар мәктәбе директоры Лемма Гыйрфанова һ.б. милләттәшләребез Тукай ватанының кунакчыллыгына, халкыбызның тырышлыгына соклануларын белдерделәр. Алар арасында Арчага инде берничә тапкыр килүчеләре бар. “Арча килгән саен матурлана!” — диде алар.
— Сезнең белән очрашу безгә дә алдагы эшләребез өчен яңа көч бирә, — диде муниципаль район башлыгы Алмас Назиров кунаклар белән саубуллашканда. — Ходай барыбызга да сәламәтлек бирсен, яңадан очрашырга язсын!
Ильяс ФӘТТАХОВ