Бергәлектә көч

Бергәлектә көч
Арча агросәнәгать һөнәри көллияте озак еллар авыл хуҗалыгы өчен һөнәр ияләре әзерләүдә игелекле хезмәт башкарып кына калмый, ә төрле бәйгеләрдә катнашып тарихта үз эзен, тәҗрибәсен дә калдыра. Башкаларга үрнәк итеп куярлык, тәҗрибә уртаклашырлык хезмәтләре күп булганга кунаклардан өзелгәне юк көллиятнең.
Күптән түгел анда тәрбия эшләре буенча директор урынбасары белән семинар үткәрелде. Аның темасы: “Белем бирү учреждениеләренең урта һөнәри белем бирү учреждениеләре белән балигъ булмаганнар арасында хокук бозуларны кисәтү буенча эш оештырудагы бәйләнешләре”.
Көллият быелгы җәй–көз айларында ныклап төзекләндерүдән соң күркәмләнгән, ямьләнгән. Семинарда катнашучылар заманча яңартылган укыту корпусы белән танышудан тыш, методик күргәзмә аша укыту–тәрбия эшләре буенча күп кенә мәгълүмат алдылар. Ә аеруча истә калырлык күңелле мизгел-ләр карвинг һәм квелинг буенча осталык–классларында булгандыр, мөгаен. Аларның кичәге укучылары биредә әнә нинди матурлык тудыруга ирешә икән бит! Дәресләрдә укучылар башкара торган эшләрне, әлбәттә, укытучылар да эшләп карады: бәрәңгене, кишерне чокып чәчәкләр, алмадан кисеп, аккош ясадылар, газетадан кәрзин үрделәр, тозлы камырдан чәчәкләр тезеп, картина төшерделәр. Кул эшләре серләренә балаларны 2 квалификацион категорияле педагог Лилия Хәбибрахманова төшендерә. Укучыларга әлеге дәрес өстәмә белем бирү буларак өйрәтелә. Теләге, сәләте булган егет–кызлар дәресләрдә гади шешә, газета, тимер чыбык, төсле кәгазьләрдән, тозлы камырдан сувенирлар ясарга, бәйләргә, чигәргә, рәсем төшерергә өйрәнә. Аларның ясаган әйберләрен ярминкәләрдә алырга мөмкин.
2нче һәм югары квалификацион категорияле һөнәргә өйрәтү осталары Альбина Нуриева, Гадилә Җамалиева укыткан егет–кызларны Казанда да беләләр. Ел саен рестораннардан, “Бәхетле”дән белгечләр килеп, иң–иңнәрен сайлап үзләренә эшкә ала.
Көллият укытучыларының укучыларга белем бирүдә генә түгел, тәрбия эшләрендә дә өйрәнерлек тәҗрибәсе бар. Бу турыда укыту–тәрбия эшләре буенча директор урынбасары Лилия Вәлиева сөйләде.
Түгәрәк өстәл артында узган сөйләшүдәге чыгышларда көллият эшчәнлеге уңай бәяләнде. “Балаларның укудан тыш буш вакытлары минутына кадәр исәпләнгән, алар күңеленә ошаган түгәрәкләргә йөри ала. Осталык–класслары да зур тәҗрибә булды, педагогларга зур рәхмәт. Алар бездә укып чыккан балаларга белем биргәнлектән, безгә кулга–кул тотынышып эшләү кирәк, бу тәртип бозуларга юл куелмауда да ярдәм итәчәк. Биредә укучыларга белем алу өчен шартлар тудырылган, тулай торакта бүлмәләр җылы, якты, дүрт тапкыр туклану оештырылган, әти–әниләрнең күңелләре тыныч булырлык. Көллият коллективына уңышлар теләп, рәхмәтләребезне җиткерәбез”, — диде Ашытбаш урта мәктәбеннән Әлфия Әхмәтгалиева. Биредә күргәннәрен директор урынбасарлары кайтып әти–әниләргә, укучыларга сөйләгәч, күпләрне кызыксындырыр әле. Көллият директоры Алмаз Ибраһимов, мәгариф идарәсе белән килешеп, декабрьдән башлап һәр мәктәпнең чыгарылыш сыйныф укучыларын көллияткә экскурсиягә алып киләчәкләрен әйтте.
Әниләр көне уңаеннан көллият укучылары тарафыннан әзерләнгән “Әниемнең ак яулыгы” дигән концерт программасы тамашачы-әниләргә – директор урынбасарларына зур бүләк булды. Ә концертта җырлап–биеп, нәфис сүз сөйләгән укучылар арасында үз укучыларын күрү күңелләрендә чиксез горурлык хисләре тудыруларын яшермәделәр.
Розалия ЗИННӘТОВА