Аңладылар кебек

Аңладылар кебек
Торак милекчеләре ширкәтләрендә чираттагы җыелышлар булып үтте.
Гомуми йортларда яшәүчеләр җитәкчеләр белән очрашып сөйләшү, аңлашу, нәтиҗә чыгару, кайбер мәсьәләләрне уртага салып хәл итү, аралашу өчен яңадан бергә җыелдылар. Тик соңгы вакытларда ТМШ җыелышлары ничектер сүрән үтә башлады. Аларга йөрүчеләр саны да кимеде, ризасызлык белдерүчеләр дә күп түгел. Бер яктан караганда, аңлашыла да, гомуми йортларда яшәүчеләр өчен моңарчы ризасызлык тудырган бик күп эшләр башкарылды. Фатирларда җылы, шәхси җылылык казаннары урнаштыру һәркемгә өй температурасын үзенчә көйләргә мөмкинлек бирде. Ишегалларына балалар мәйданчыклары төзелде, су, юл проблемаларын хәл итүгә дә игътибар зур. Ныклап төзекләндерү эше дә план нигезендә алып барыла.
Гомуми йортларда гына түгел, үз йортларында яшәүчеләр дә һәр көн диярлек вак-төяк проблемалар, төрле мәшәкатьләр белән очрашып тора. Җитәкчеләр ишек төбеңә килгәндә җыелышларда катнашып, проблемаңны чатнатып әйтү, чишелешен таләп итү бик уңай бит. Бу юлы да әнә халык белән очрашуга Арча шәһәре башкарма комитеты җитәкчесе Илдус Әһлиев, “Идарәче компания” ширкәте җитәкчесе Фәрит Зәйнуллин, Бердәм исәп-хисап үзәге җитәкчесе Линар Әхмәдиев, район башкарма комитетының торак-коммуналь хуҗалыгы, энергетика һәм элемтә буенча секторы мөдире Илфат Рәхимов килгән иде.
— Тагын бер ел төгәлләнеп килә. Бу ел нәтиҗәле булды. Күп эшләр башкарылды. Авылларда мәктәпләр, хастаханә, фельдшер-акушерлык пунктлары төзекләндерелде. Күптән түгел ике фельдшер-акушерлык пункты ачылды. Юллар салуга да игътибар юнәлдерелде, — диде, район яңалыклары белән таныштырып, Илдус Котдусович. — Шәһәр эчендә дә 4,5 километр юлга асфальт түшәлде. Айван мәктәбенә кадәр тротуар салынды. Кешеләр куркынычсызлыгын кайгыртып башкарылган эшләр бу. Соңгы ике айда гына да урамнарга, күпфатирлы йортлар тирәләренә 100гә якын яктырткыч куелды. Йортлар төзү, иске йортларны ныклап төзекләндерү эшләре дә дәвам итә.
Быел 8 йорт ныклап төзекләндерелде, “Надежда” торак милекчеләре ширкәтенә караган 13, 7нче йортлардагы фатирлар хуҗалары да бу бәхеткә ирешәчәк.
— Ниһаять, күптәнге теләгегез тормышка аша, — диде аларга мөрәҗәгать итеп Илдус Әһлиев. — Сезнең йортлар тышкы яктан калай белән төреләчәк. Теләгегез булса, подрядчылар белән сөйләшеп, фатирларыгыз турысын өстәмә җылыта аласыз. Гомумән, подрядчылар белән килешеп эшләгез, барып чыкмый икән, безгә мөрәҗәгать итегез. Соңыннан зарланып йөрерлек булмасын.
“Локомотив” торак милекчеләре ширкәтенә кергән 6нчы йортта яшәүчеләргә дә кагыла бу сүзләр. Чөнки төзекләндерү планына әлеге йорт та кергән.
Җыелышларда ТМШ җитәкчеләре финанс хисабы белән чыгыш ясады. Сораулар да булды. Кайсы аңлатуны сорады, икенчесе тәкъдимен кертте. Сораулар, нигездә, коммуналь хезмәтләргә, гомуми йорт кирәк-яракларына түләү мәсьәләләренә кагылды. Җитәкчеләр аларга ачыклык керттеләр, урында аңлашылырлык итеп җавабын да бирделәр. Шул ук вакытта коммуналь хезмәтләр өчен вакытында түләмәүчеләргә карата тиешле чарасын күрәчәкләрен белдерделәр.
— Аларның әҗәтләре сезнең кесәгә дә суга, — диде Илдус Котдусович. — Шуңа коммуналь хезмәтләр өчен зур әҗәтләре булганнар белән ныклап шөгыльлә-нәчәкбез.
Гөлсинә ЗӘКИЕВА