Бишек җырларында күпме наз!

Бишек җырларында күпме наз!
“Әлли-бәлли итәр бу,
Мәдрәсәгә китәр бу...”
Арабызда мәшһүр Тукаебыз сүзләренә язылган моңлы аһәңле әлеге бишек җырын ишетмәүчеләр юктыр, мөгаен. Сабый чактан тыңлап үскәнгә ул җырлар күбебезнең күңелендә яши. Күңел кылларын тибрәтә торган шул моңлы җырларны “Карлыгач” балалар бакчасында узган “Бала бишеге – гомер ишеге” бәйрәм чарасында тыңларга насыйп булды.
Дөньяның бар ямен, сафлыгын, нурын үзенә туплап өйгә яңа туган сабый кайта. Сабый белән бергә йортта бәләкәч өчен кирәк–яраклар да барлыкка килә. Ә йортның түренә, иң кадерле татлы “җимеш”не куенына алып, бишек эленә. Әнисенең, әбисенең моңлы бишек җырлары аша сабый күңеленә миһербанлылык, шәфкать орлыклары салына. Бар күңелен, назын биреп, сабыен иркәләп җырлаган ананың теленнән яңгыраган назлы аһәңле иркәләү сүзләре җыр–моңнарына күчә. Белем һәм тәрбия бирү көченә ия, сабыйның тыныч холыклы булып үсүенә ярдәм итүче бишек җырлары турындагы хисләрен шагыйрьләребез шигырь юлларына салып, аларга композиторларыбыз моңлы көйләр иҗат иткәннәр.
Әле кайчан гына бишек бәбие булган балалар, бакча тәрбиячеләре, әти–әни, әби–бабайлары тырышлыгы белән үзләре тыңлап үскән бишек җырларын өйрәнеп, бәйрәмдә тамашачыга бүләк иттеләр. Тамашачылары да иң якыннары шул: әниләре, әбиләре, тәрбияче апалары. Алар өчен моннан да зур бүләк бар микән?! Бишек җырларын башкаруда һәр төркем тырышлык күрсәтте, хәтта икешәр чыгыш әзерләгәннәр. Кечкенә төркем чыгышында өч яшьлек нәниләрнең бала арбасын (бу аларның иң якын уенчыклары) тирбәтеп җырлаулары иң матур күренешләрнең берсе булды. Бәйрәмдә бакча балалары, үзләре генә җырлап–биеп калмыйча, курчаклары – бәбәйләре белән дә биюләр башкардылар.
Халык иҗатының мәрҗәне, гүзәл сүрәтләре салынган ана телебезнең нинди серле көчкә ия икәнлеген аңлаткан чараны үткәрүдә башлап йөрүчеләр татар теленә өйрәтү тәрбиячесе Р.Камалова, музыка җитәкчесе Й.Абдуллина, физик тәрбия буенча инструктор Г.Мөхәммәтгалиева зур тырышлык куйган.
Балаларга бию хәрәкәтләре, җырлар, шигырьләр өйрәтү тәрбиячеләрдән күп көч, сабырлык таләп итә торган хезмәт. Моны әти-әниләр дә аңлый. Шундый хезмәтләрендә уңышлар, гаилә бәхете, сәламәтлек теләп, бакчага йөрүче Ирекнең әбисе балаларын тәрбия-ләгән өчен бакча коллективына барлык әти-әниләр, әби-бабайлар исеменнән рәхмәт сүзләрен җиткерде.
Арчаның 2нче номерлы “Карлыгач” балалар бакчасында тарихыбызны чагылдыручы милли-мәдәни, шулай ук фольклор һәм ана телен өйрәнүгә корылган чаралар еш уздырылып тора. Балаларга татар халык иҗатын өйрәтүне алга куеп, аларның милли җанлы булып үсүләрен әнә шулай күңелле чаралар аша үтемле итәргә тырыша коллектив. Бакчада узган “Татар халык авыз иҗаты” фестивале шуның мисалы. Бишек җырларын искә төшерүдән тыш, атналык кысаларында татар халык әкиятен сәхнәләштерү, “Казан арты” тарих-этнография музеена сәяхәт, татар халык уеннарын өйрәнү буенча тәрбиячеләр өчен “Җомга көн кич белән” дигән осталык классы, “Балачак — уйнап-көлеп үсәр чак” дигән күңел ачу кичәсе үткәрелде.
Розалия ЗИННӘТОВА