Полис, димәк, бушка

Полис, димәк, бушка
Район поликлиникасының актлар залында, Казаннан “Ак Барс-Мед” иминиятләү компаниясе” ширкәте филиалы директоры Рәшит Абдуллин, иминиятләнүчеләрнең хокукларын яклау бүлеге җитәкчесе Минсалих Сәхапов кайтып, түгәрәк өстәл артында сөйләшү үткәрделәр.
Анда компаниянең Арча районындагы вәкиллеге баш белгече Г.Ибәтуллина, район хастаханәсе баш табибы урынбасарлары, полис ияләре яки иминиятләнүчеләр катнашты.
Рәхмәт, Казаннан кайтып, без, гади халыкны, кайгыртып йөргәннәре өчен. Сәламәтлек саклау учреждениеләрендә мәҗбүри медицина иминиятләү полисын сорыйлар икән, димәк, бушлай дәвалану мөмкинлеге бар. Халык арасында, бушка медицина хезмәте бетә икән, дигәнне дә ишетергә туры килгәли. Кешелек җәмгыятендә моның беркайчан да булуы мөмкин түгел, дип ышаныйк. Авырып китеп кесәңдә акчаң булмаса, аягыңны сузасың, дигән сүз бит бу. Түгәрәк өстәл артында — бушлай медицина хезмәте күрсәтү буенча нинди аңлашылмаучылыклар, проблемалар, уңай күренешләр бар — шулар турында сөйләшенде.
— Киләсе елда универсаль электрон карталар гамәлгә керә башлый,—дигән яңалыкны әйтте филиал директоры Рәшит Абдуллин. Әлегә иске һәм яңа үрнәкләре кулланышта йөри.
Өч медицина иминиятләү компанияләренең барлыгын да белеп торыйк. Алар: “Ак Барс-Мед”, “Коткару” (“Спасение”), “Чулпан-Мед”. Ихтыярың, кайсын сайлап аласың. Мәсәлән, минем үземә барыбер кебек, ияләнгәнендә — “Ак Барс-Мед” компаниясендә калачакмын. Гади генә әйткәндә, мин бу компаниянең иминиятләнүчесе икән, ул минем турыда кайгыртырга, ягъни күрсәтелгән медицина хезмәтенең сыйфатына контроль ясап, иминиятләнүчесенең хокукларына хилафлык килмиме икән, дип кызыксынырга да тиеш булып чыга. Моның шулай икәнлеген “Ак Барс-Мед” иминиятләү компаниясе” ширкәте җитәкчелеге Арча районы поликлиникасында үткәрелгән анкета мисалында дәлилләп күрсәтте. Кайбер анкета сорауларына (115 кеше катнашкан) җавапларны карап үтик. Табибларның кабул итү графигы белән канәгатьме сез? 115 кешенең 90ы “әйе” дип җавап биргән, 25е “юк” дигән. Регистратурада кабул итүне оештыру белән канәгатьме? 94е “әйе”, 21е — “юк”. УЗИ, ЭКГ, рентген, лаборатория эше белән канәгатьме? 83е “әйе”, 32се “юк”. “Поликлиникада эшләүче табибларның авыруларга мөнәсәбәтенә бәя” соравына җаваплар шулай ук уйланырлык: 115 кешенең 70е игътибар, ихтирам белән карыйлар, 38е — битараф, 6сы — дорфа мөнәсәбәт күрсәтәләр дип җавап биргән.
— Сорауларыгыз булса, тәүлекнең теләсә кайсы вакытында безгә шалтырата аласыз, — дип аңлатты филиал директоры Рәшит Наумирович. —Телефон: 8-800-100-03-30, бушка.
Быелның 1 гыйнварыннан 30 ноябрьгә кадәрге чорда компаниягә Арча районыннан 41 кеше мөрәҗәгать иткән. Шуларның күбесе махсус табиб-белгечләрнең җитмәвен әйткән. Бушлай медицина ярдәме күрсәтү тәртибен бозу очраклары булуы турында хәбәр иткәннәр. Диагностик тикшеренүләрнең җи-тәрлек дәрәҗәдә булмавы турында мөрәҗәгатьләр һәм медицина хезмәткәрләренең этикасы буенча шикаятьләр бар.
— Иң башта мәсьәләне урында хәл итәргә тырышыгыз, — дип киңәш итте иминиятләнүчеләргә филиал директоры Рәшит Абдуллин. — Баш табиб урынбасарлары, баш табибка мөрәҗәгать итегез. Нәтиҗә булмаса гына, безгә, кайнар элемтәгә чыгыгыз.
Компаниянең үзенең иминиятләнүчеләре белән очрашуы яңа форма. Гаҗиз булып, кемгә таянырга белмәгән вакытларда кайнар элемтә бик ярап куя. Нәтиҗәсе генә булсын. Ә компаниянең көче зур: экспертлар медицина учреждениеләренең эшен контрольдә тота.
Р. САТТАРОВА