Яңалыклар

Лесхоз мәктәбе коллективының сөе-нечле көннәре. Республиканың Мәгариф һәм фән министрлыгы мәктәпләр, көллият һәм һөнәр лицейлары арасында оештырган һөнәри юнәлеш бирү бәйгесендә Лесхоз мәктәбе җиңеп чыкты! 1 дәрәҗәдәге дипломга ия булдылар. Котлыйбыз! Жюри барысы 86 эш караган. Шуның 16сы финалга үткән. Безнекеләр программаны урман хуҗалыгы белән бәйләп төзегәннәр. Әлеге 200 битле эшне лесхозлылар жюри каршында 20 минут яклаган. Программаны төзүдә мәктәп директоры Зөлфәт Дәүләтбаев, тәрбия эшләре буенча директор урынбасары Фирая Гайнанова, белем бирү буенча директор урынбасары Гүзәл Шиһабиева, биология, экология фәннәре укытучысы Наталья Сафиуллина, химик Сәлимә Корбанова зур хезмәт куйдылар.

“Дәүләт алкоголь инспекциясенең Арча территориаль бүлеге белгечләре һәм полиция хезмәткәрләре тарафыннан 2012 елның 11 аенда балигъ булмаганнарга алкоголь продукциясе сату буенча 36 очрак (21е сыра, 14е тәмәке) теркәлгән. Узган елның шушы чоры белән чагыштырганда ул 17 очракка (12 сыра, 4 тәмәке сату очрагы теркәлгән булган) арткан. Әлеге күрсәткечләрнең сизелерлек үсеше аракы һәм тәмәке продукциясе әйләнешенә дәүләт контроленең көчәюен, шул ук вакытта кече бизнес вәкилләренең башкару дисциплинасы түбәнәюен раслый. Бәлкем, җаваплылыкны көчәйтүнең нәтиҗәсе булыр? Вакыт күрсәтер. Ә менә алкоголь продукциясен ваклап саткан өчен штраф суммасының гражданнарга 30 мең сумнан 50 мең сумга, вазифаи затларга 100 мең сумнан 200 мең сумга, юридик затларга 300 мең сумнан 500 мең сумга кадәр булуын искә төшерү зыян итмәс. Әгәр хокук бозулар ел дәвамында кабатланса, җинаять җәзасы карала”, — дип хәбәр итте Дәүләт территориаль органының эчке базарны координацияләү һәм үстерү бүлеге консультанты Айрат Хәнәфиев.