Иҗтимагый совет утырышы

Иҗтимагый совет утырышы
24 декабрьдә Арча район иҗтимагый советының чираттагы утырышы булды. Аны совет рәисе Ринат Һидиятов ачты һәм алып барды.
Утырышның көн тәртибенә ике мәсьәлә куелган иде. “Арча муниципаль районында 2009–2012 елларда хокук бозуларны профилактикалау буенча комплекслы программаның үтәлү йомгаклары һәм 2013–2016 елларга яңа комплекслы программаны тормышка ашыру турында” район башкарма комитеты җитәкчесе урынбасары Надия Мифтахетдинова чыгыш ясады.
Иҗтимагый совет әлеге чыгышны тыңлаганнан һәм тикшергәннән соң җирле үзидарә органнарының, оешма, предприятие, учреждениеләр, җәмәгать оешмаларының район территориясендә закончалыкны һәм хокук тәртибен саклау максатында билгеле бер күләмдә профилактика эше алып баруларын билгеләп үтте. Районда җинаятьчелекне һәм хокук бозуларны профилактикалау буенча эштә төп принцип — төрле ведомстволарның килешеп эшләве. Эшчәнлекне болай оештыру уңай нәтиҗәләр бирә: район территориясендә теркәлгән җинаятьләр саны кимеде, шул исәптән урлаулар, җәмәгать урыннарында ясалган җинаятьләр саны азайды.
Шулар белән бергә, кабат ясалган җинаятьләр арту, яшүсмерләр җинаятьчелегенең күбәя баруы, исерек хәлдә ясалган җинаятьләр саны үсүе җитди борчылу тудыра.
Иҗтимагый совет районда җинаятьчелек белән көрәштә закончалык һәм хокук тәртибен саклау, хокук бозуларны профилактикалау системасын формалаштыру, җәмәгать тәртибен һәм куркынычсызлыгын ныгытуга юнәлдерелгән карар кабул итте.
Икенче көн тәртибендәге “2012 елда Арча муниципаль районы буенча гражданнарны хәрби хезмәткә чакыру йомгаклары турында” Татарстан Республикасы хәрби комиссариатының Арча һәм Әтнә районнары буенча бүлеге җи-тәкчесе Алмаз Борһанов чыгыш ясады. Ул хәрби хезмәткә чакыру буенча быелгы планнарның уңышлы үтәлүен билгеләп үтте. Егетләр соңгы елларда Ватан алдындагы изге бурычларын үтәүгә җитди карый башлаган. 2009 елда армиягә барудан качып йөрүчеләр 258 булса, хәзерге вакытта 6 гына.
Муниципаль район башлыгы урынбасары Любовь Осина бүлекнең гражданнарны хәрби хезмәткә чакыру буенча эшчәнлеген уңай бәяләде, аны тагын да яхшырту буенча тәкъдимнәрен әйтте.
Иҗтимагый совет мәгариф учреждениеләре җитәкчеләренә укучыларга гражданнарның конституцион бурычларын аңлату максатында хокук тәрбиясе бирүне активлаштырырга тәкъдим итте. Район ветераннар советы яшьләргә өлкән буынның Ватанны саклаудагы бай тәҗрибәсен кулланып патриотик тәрбия бирү эшен көчәйтергә бурычлы.
Ильяс ФӘТТАХОВ