Бу якты йорт – безнең бәхет өчен

Бу якты йорт – безнең бәхет өчен
Балачак сиздермичә уза да китә, әмма күңелләрдә укытучыдан иңгән җылылык, мәрхәмәтлелек кала. Тормышны колачлар өчен укытучы балаларга канат куя. Ул тәрбияли, укыта, һәркемне кеше итәргә омтыла.
Безнең мәктәпкә дә 40+40=80 булган. Бу түгәрәк датаны билгеләп үтүнең мөһим максаты, әлбәттә, мәктәпнең үткән бай тарихын барлап чыгу, анда төрле елларда эшләгән укытучылар, аны тәмамлап чыккан укучылар турында мәгълүматлар туплаудан гыйбарәт.
Мәктәпнең барлыкка килүе 1932 елда Интернационал урамындагы бер катлы агач бина белән бәйле. Фатыйма Гыймранова җитәкчелегендә ике сыйныфлы башлангыч мәктәп буларак эшли башлый ул. 1938 елда җидееллык татар мәктәбе итеп үзгәртелә. 14 укытучыдан һәм 285 баладан торган мәктәпнең беренче директоры Фәйзи Әүхәдиев, икенчесе Рәхим Габитов була. Аннан соң Әдһәм Мәннәпов, ә сугыш елларында Хәдичә Мәһ-диева директорлык вазыйфасын башкара.
1942–1952 елларда директор булып Ленин ордены кавалеры Җәләл Шәмиев эшли. Ул Хезмәт Кызыл Байрагы ордены белән дә бүләкләнә.
1950 елда мәктәп Галактионов урамындагы бинага (46нчы йорт) урнаша. Директор булып Гали Солтанов эшли башлый.1955 елда татар урта гомуми белем мәктәбе итеп үзгәртелә. Директоры Шамил Мөхетдинов була. Ул елларда директор урынбасары булган Мәрьям Хәсәнова — РСФСРның Халык мәгарифе отличнигы — Казанда озак еллар укытучыларның белемен күтәрү институтында эшләгән галимә (хәзер лаеклы ялда).
Төрле чорларда мәктәптә директор булып Әлфия Билюкова, Хезмәт Кызыл Байрагы ордены кавалеры, Бөек Ватан сугышында илебез азатлыгы өчен көрәшкән Габделхак Шәфигуллин эшли. Директор урынбасарлары Гали Солтанов, Зоя Рәхимова эшләгән 1957–1958 уку елында 20 укучыдан торган иң беренче чыгарылыш була.
Тора-бара укучылар саны арта, иркенрәк бина кирәк була башлый. 40 елдан соң 1972 елның февраль аенда Күпер урамында төзелгән өч катлы яңа уку йортында Василий Малков җитәкчелегендә Арчаның икенче урта мәктәбе уку елын дәвам итә. Ул елларда директор урынбасары булып эшләгән ТАССРның атказанган укытучысы Раиса Христофорова, РСФСРның мәгариф отличнигы Роза Абдуллинаны күпләр бүген дә хөрмәт белән искә ала. Аннан соңгы елларда директор СССРның Халык мәгарифе отличнигы Рафаэль Гафиатуллин, директор урынбасарлары ТАССРның атказанган укытучысы, РСФСРның мәгариф отличнигы Флюзә Нураева, РСФСРның халык мәгарифе отличнигы Госман Шакиров, РСФСРның халык мәгарифе отличнигы Нәбиулла Хәкимҗанов, Татьяна Егорова яшь буынга белем һәм тәрбия бирүдә армый-талмый хезмәт күрсәтәләр. Директор вазыйфасын башкарган Илгизәр Әхмәтов, Ленар Заһидуллин, Наил Гыйниатуллин, Ринат Гәрәев, Мөдәррис Гарипов, Әмир Нуретдинов җилкәсенә дә җаваплылык аз төшми. Һәрберсе бу уку йортын заман таләпләренә җавап бирерлек итеп җиһазлау, тирә-ягын төзекләндерү өчен бар тырышлыгын куя.
Хәзерге директорыбыз Гөлнара Гарипова үз хезмәтенә зур җаваплылык белән караучы белгеч, җитәкче буларак коллективның олы ихтирамын яулады. Төрле елларда директор урынбасарлары булып эшләгән укытучыларыбыз һәм бүгенге көндә хезмәт күрсәтүче Эльмира Никифорова, Альбина Сәлахова, Резеда Кондратенко педагогик коллективны туплау юнәлешендә бәяләп бетергесез хезмәт куялар.
Тагын бер 40 еллык юбилеена мәктәбебез танымаслык итеп үзгәртелде, матурланды, матди-техник базасы тагын да ныгыды, кабинетлар заман таләп-ләренә җавап бирерлек итеп җиһазландырылды. Биредә эшләүче һәркемгә уңай эш шартлары булдыру өчен муниципаль район башлыгы Алмас Назиров, район оешмалары бик зур тырышлык һәм ярдәм күрсәттеләр.
Бүген бу уңайлы мәктәптә 632 укучы белем ала, 68 укытучы эшли. Барысы 27 класс-комплект.
Арча икенче урта гомуми белем мәктәбе укуның сыйфатын яхшырту, әти-әниләр, укучылар алдында, җәмгыятьтә укытучының дәрәҗәсен күтәрү юнәлешендә эшләвен дәвам итә. Биредә гомер-гомергә үз эшенә бирелгән вөҗданлы һәм әхлаклы, югары әзерлекле һәм тырыш мәгариф хезмәткәрләре белем бирә.
Шул еллар эчендә никадәр укытучы биредә үзенең хезмәт юлын башлаган. Кемнәрдер бөтен гомерен дип әйтерлек шушы мәгърифәт йортында уздырган. Мәктәп тарихында тирән эз калдырган укытучыларның берничә буыны инде арабызда юк. Аларның фидакарь хезмәте алдында баш иеп, укыткан укучылары күңеленнән исемнәре беркайчан да җуелмасын иде дип теләк телибез.
Мәктәптә эшләгән барлык педагогларны, аны тәмамлап чыккан укучыларны, әти-әниләрне, хәзерге укучыларыбызны, барлык хезмәткәрләрне мәктәбебезнең юбилее белән котлыйбыз, сәламәтлек, уңышлар телибез.
Рәсимә ИБРАЕВА,
татар теле һәм әдәбияты укытучысы