Кеше тормышы монда чагыла

Кеше тормышы монда чагыла
ЗАГС диюгә яңа тормышка аяк атлаучы, аккошларга тиң, бәхетле яшь парлар күз алдына килеп баса. Кешенең дөньяга килүе һәм китүе дә шунда рәсмиләштерелсә дә, күңелләрдә ул нәкъ менә шундый матур, бәхеткә илтүче юл башы буларак яши.
ЗАГС бүлеге инде бер гасырга якын кешеләрнең бәхетле мизгелләренә шаһит. Быел аның оешуына 95 ел булды. Район Мәдәният йортында шуңа багышлап матур бәйрәм үткәрелде.
Яшь парларның язылышу тантанасы белән башланып киткән бәй-рәмдә муниципаль район башлыгы урынбасары Любовь Осина, Татарстан Республикасы Министрлар Кабинетының ЗАГС идарәсе җитәкчесе Борис Хафизов, район бүлеге хезмәткәрләре, авыл җирлекләре башлыклары һәм белгечләре катнашты. “ЗАГСта әллә никадәр мәгълүматлар саклана, шунлыктан ул юридик органнар белән бер дәрәҗәдә диярлек эшчәнлек алып бара. ЗАГС органнары хезмәткәрләре гаиләне саклау һәм ныгыту буенча гына түгел, тормышның һәр өлкәсендә күләмле эш башкара. Хезмәтегез игътибарлыгыгыз, сизгерлегегез, кешеләр хәлен аңлавыгыз өчен рәхмәт сезгә”, — диде Любовь Михайловна.
Алдынгыларга Мактау грамоталары, Рәхмәт хатлары тапшырылды. Гомерләренең күп елларын шушы хезмәткә багышлаган бүлекнең элеккеге житәкчеләре дә искә алынды бу көнне, бүлек җитәкчесе Люция Фатыйхова 40 ел хезмәт куйган Әлфия Вәлиевага рәхмәт әйтте. Әлфия апа үзе дә җавап сүзен җиткерде. Расих Галимҗанов, Айгөл Ахунова, Ранил Сәлаховның матур җырлары, “Ар–и–Эль” бию коллективының чыгышлары бәйрәмгә аеруча ямь өстәде.
Биредә гаиләләрне саклап калуга юнәлдерелгән төрле чаралар да еш үткәрелә. 50 ел һәм аннан да күбрәк бергә гомер иткән парларны котлыйлар, аларның имзалары бүлекнең Дан китабында урын ала. Ноябрь аеннан “Гаилә мәктәбе” клубы ачылды, ялгызларны кавыштыру максатыннан бәйрәмнәр оештырыла.
Розалия ЗИННӘТОВА