Кыш бабайдан бүләк

Кыш бабайдан бүләк
Балачак бәйрәмнәре турындагы якты хатирәләрдә Яңа ел иң истәлеклесе. Чөнки ул әкияти, серле, тылсымлы, хыялларны чынга ашыра, күңелләрне бүләкләре белән сөендерә торган бәйрәм.
Ә бәйрәм алдыннан йортларга урман кунагы — чыршы кайтып утыра һәм бар җиһанны ямь белән тутыра. Йортларда гына түгел, мәктәпләрдә, балалар бакчаларында, клубларда, барча җәмәгать урыннарында балкып, нур чәчеп утыручы урман кунагы тирә-ягына, гадәттә, балаларны җыеп куанычлы мизгелләр бүләк итә, зарыктырып, елга бер генә килә торган кунаклар Кыш бабай һәм Кар кызы белән дә күрештерә.
Яңа елга аяк басар алдыннан район Мәдәният йортындагы зур чыршы да әйләнәсенә балаларны җыйды. Биредә муниципаль район башлыгы чыршысы бәйрәменә районыбыз мәктәпләренең актив укучылары, опекага алынган балалар, Яңа Кенәр коррекцион мәктәбендә укучы алдынгылар, барлыгы 200 бала чакырылган иде.
Балаларны район башкарма комитеты җитәкчесе урынбасары Надия Мифтахетдинова, муниципаль район башлыгы Алмас Назиров исеменнән Яңа ел белән котлап, изге теләкләр юллады.
Бәйрәмгә Кар кызы алдан килгән булып чыкты. Ул бәйрәмне үзе башлап җибәрде, аннан бергәләп балалар белән Кыш бабайны чакырдылар. Юлларны кар көртләре күмгәнгә Кыш бабай бераз соңарып килсә дә, балалар ялыкмады, Кар кызы белән чыршы тирәли әйләнә тордылар. Ниһаять, капчыгы тулы бүләкләр белән бабакай күренде. Инде яше шактый булса да, җитез үзе, килеп керүгә, хәл дә алып тормыйча балалар белән җырлап, төрле уеннар да уйный башлады. Чыршыдагы утларның җем-җем балкуы, Кыш бабай белән Кар кызының (К.Тинчурин исемендәге театр артистлары) балалар арасында әвәрә килүе — чыршы бәйрәменең иң күңелле мизгеле бу. Балалар берсен-берсе уздырып Кыш бабайга сәләтен күрсәтеп калырга ашыга (юкса, ул озак тормас, башка балалар янына ашыга торгандыр): шигырьләр сөйлиләр, җырлыйлар, бииләр. Кыш бабай аларга капчыктагы бүләкләрне өләшә. Аннан, балалардан калышмаска тырышып, бүләк ясап үзе дә биеде (рәсемдә). Ә иң зур бүләк ахырга калган икән: Кыш бабай балаларга “Али баба һәм өч карак” дигән әкият алып килгән. К.Тинчурин артистлары куйган әкиятне балалар бик яратып карады. Кыш бабай белән очрашу, әкияттә кунакта булу, бүләкләр алу, үзләренә карата әйтелгән рух күтәренкелеге өстәүче теләкләрдән балалар яңа көч, дәрт алып, тырышлык кына мондый бәйрәмнәрдә катнашырга мөмкинлек бирәчәген аңлап, киләчәккә якты өмет–хыяллар белән таралышты.
Розалия ЗИННӘТОВА