Сагынып көттек

Сагынып көттек
Күңелләрдә яңа ел рухы районыбызның төп чыршысы кабынудан башлана. Тантана буласы көнне буран котыру сәбәпле, бәйрәм икенче көнгә күчерелде. Нинди шәп кич булды ул!
Салкыннардан, бураннан соң йомшаган табигать юмартлыгына куана-куана халык тамаша урыны — Сабантуй мәйданы — спорт һәм ял паркына юнәлде. Тау өстеннән караганда нинди күңелле манзара! Балалар таудан чана шуа, атынгычларда рәхәтләнә, мәйданны кардан, боздан эшләнгән әкият геройлары әйләндереп алган, кибетләр эшләп тора, учакларда пешкән шашлыкның тирә-юньгә хуш исе таралган...Кардан чистартылган баскычлардан түбәнгә атлыйбыз. Йөрәкләр Яңа ел чыршысына, ниндидер серлелеккә, могҗизага, яңа куанычларга ашкына. Боерса, Яңа елда бар да әйбәт булыр. Арча муниципаль район башлыгы урынбасары Любовь Осина, район башкарма комитеты җитәкчесе Илшат Галимуллинның бәйрәм белән котлаулары күңелләрне тагын да күтәреп, яңа эшләргә рухландырып җибәрде.
Чыршы, чыршы, без сине сагынып көттек ел буе... Кулга-кул тотынып, яшел гүзәлкәй тирәли җырлап әйләнәбез. Менә ул могҗиза: чыршыбызда утлар кабынды! Тирә-юнь, йөзләр балкып китте. Күңелләр шатлык белән тулды. Ур-ра! Яшәсен мәңге яшь, яшел чыршыбыз, яшәсен Яңа ел бәйрәмнәре... Дәртле музыка яңгырый. Сәхнәгә әкият геройлары сибелә, Кыш бабайлар, Кар кызлары атлый. Берәү, икәү, өчәү.., юк, санап бетерерлек түгел. Киемнәрен генә күр, берсеннән-берсе төрле, кабатланмас. Кытай календаре буенча һәр елның үз символы: күсе, үгез, юлбарыс, куян, аҗдаһа, елан, ат, сарык, маймыл, әтәч, эт, дуңгыз. Киемнәре дә бик уңышлы сайланган, геройлар да бик килештереп уйныйлар. Аякларга салкын үтмәсен дип бии-бии кызыкларны күзәтәбез.
Хезмәт коллективлары тырышкан, һәркайсы 10ар минутлык күренеш әзерләгән. Күрче күселәрне, елкылдап торган соры киемнәрдән сәхнәне камап алдылар, бииләр, сикерәләр. Ул арада мультфильм герое Шапокляк, каударланып, сәхнәгә килеп чыга һәм яңгыравыклы, чәрелдәвек тавыш белән, күрмәдегезме шундый матур, йомшак, симез күсе — Ларисаны дип тамашачыга мөрәҗәгать итә. Халык тәгәри көлеп... Рәхмәт, Арчаның 7нче мәктәп коллективына (директоры Альмира Гатауллина, Айван), кыска гына вакыт эчендә шундый күңелле (эчтәлеген сөйләп тормыйм, ә сценарийның мәгънәле һәм көлкеле булуы бик мөһим) тамаша күрсәткәннәре, яңа костюмнары өчен. Барлык коллектив белән халык күңелен күрергә килгәннәр. Кыш бабай белән Кар кызының өр-яңа костюмнарының матурлыгы — сокланмый мөмкин түгел!
Укучылар сараеның убырлы карчыгы бигрәкләр дә үткен, заманча әби булып чыкты. Куркытырсың, бар, хәзергеләрне, дип, балаларның шуклыкларын сөйләп, аларны шүрләтерлек заманча убырлы булырга хыяллана. Герой тамашачы күңелен яуларга тиеш шул.
10нчы балалар бакчасы колективы чыгышы да бәйрәмне якты төсләр белән яктыртып җибәрде.
Чыгышларга ноктаны район мәдәният идарәсе коллективы куйды. Кыш бабай белән Кар кызы сәхнә уртасындагы зиннәтле, абруйлы тәхет бушлыгына игътибар итә. Алар тәхеткә утырырга тиешле хуҗаны эзләргә чыгып китүгә, сәхнәгә ел символлары сибелә. Сарык, маймыл, әтәч... — һәркайсы тәхетне яулап алырга тырыша. Китә ызгыш-талаш. Бар да әйбәт, шәп, нәкъ менә ел белән ул гына идарә итәргә тиеш. Ярый әле бәхәсне Кыш бабай: “Аның үзенең тәртибе бар”, – дип туктатты. Аҗдаһадан соң тәхеткә Елан утырырга тиеш. Шулай диюгә, тәхеткә ысылдап, Елан йомарланып менеп ятты. Кытай календаре әкиятме, әллә аның берәр ырымы, мәгънәсе бармы — бер Ходай гына белә. Ә без Яңа елга яңа өметләр, матур хыяллар белән керик, һәрбарчабызга исәнлек-саулык телик, ил-көннәребез тыныч, аяз булсын! Шушы теләкләрне куәтләп күктә салют йолдызчыклары атылды.
Румия НАДРШИНА