Хатларда заман сулышы

Хатларда заман сулышы
Газета укучыларыбызның матбугат белән танышып барулары уңай күренеш, димәк, тормышыбызда барган вакыйгаларга битараф түгелләр. Шәхсән мин үзем дә район газетасына даими язылам. Югыйсә, эштә газета эчтәлеге белән тулысынча таныш кебек. Өйдә утырганда да (балалар тәрбияләдем) махсус почтага барып язылыр идем. Ничек инде район яңалыкларыннан, хәбәрләреннән башка яшәмәк кирәк?!
Яңа ел ял көннәре белән бәйле сәбәпле газетабызның кайбер саннары чыкмый калды, инде иптәшем юксынып эшкә шалтырата, район газетасы нишләп килмәде, дип.
Рәхмәт газета укучыларыбызга, алар укып кына калмый, кулларына каләм алып, мәкаләләр дә яза. Атна саен газетабызның бер битен газета укучыларыбыз хатларына багышлыйбыз. Хөрмәтле укучыларыбыз, язу ул күңелгә бик зур рәхәтлек бирә торган иҗат. Мәкаләң матбугатта дөнья күрсә, монысы инде аерата дулкынлану кичерү халәте. Язганнар моны яхшы белә. Ә күңелдә күпме хатирәләр, күңеллесе дә, гыйбрәтлесе дә, әйтелмәгән сүзләр... Тирә-ягыбызда нинди кызыклы язмышлы кешеләр, тырыш хезмәтчәннәр, сәләтле балалар. Нинди ямьле җәйләр, көзләр үтте. Печәне, җиләге, гөмбәсе, дигәндәй. Җый гына. Язар өчен тема күп. Күңелдә шыткан уй-фикерләрне кәгазь битенә төшерергә һәм редакциягә юлларга кирәк. Үзең генә уйланып калма, башкаларны да уйландыр. Сүзнең көче менә шунда!
Шөкер, арабызда тынгысыз күңелле кешеләр байтак. Алар шалтырата, яза, редакциягә килә. Яңа Кенәрдән Рифат Габидуллин, Марат Абдуллин, Фәрит Вафин, Түбән Атыдан Данис Хәмидуллин, Чөмә-Елгадан Фирдия Гафиятова, Арчадан Минһаҗ Кашапов, Роза Шәйхетдинова, Дамир Таҗиев, Факия Шәрәфетдинова, Венера Нуриева, Балтачтан (Урта Пошалым) Зөлфирә Камалова, Орнашбаштан Ленар Вәлиев һ.б. Хөрмәтле актив хәбәрчеләребез, рәхмәт матур хатларыгызга, алга таба да язып торыгыз, үзегез исән-сау, каләмегез шома, телегез үткен булсын!
Матбугат ул сүз әйтер өчен менә дигән трибуна. Моны яхшы аңлаган оешма, учреждение, предприятие, авыл хуҗалыгы җитәкчелеге газетадан оста файдалана. Халык белән эшләүнең иң үтемле юлы бу. Район прокуроры урынбасары Радик Хәбибуллинның гыйбрәтле язмаларын газета укучыларыбыз көтеп ала. Арча район судының судья ярдәмчесе Ильмира Зарипова шулай ук безнең актив хәбәрчебез. Закон тарафыннан тыелган гамәлләрне, гомумән, законнарны белеп торыйк. Спорт яңалыклары белән даими таныштырып баручы Бари Бакиров, Хәйдәр Зәйнуллин, шахмат ярышларының баш хөкемдары Әмир Шәяхмәтов турында да тынгысызлар, үз спортчыларын күрсәтә белүчеләр дияр идем.
Районның ЮХИДИ бүлек-чәсе (җитәкчесе Габделхак Касыймов), ТР Дәүләт алкоголь инспекциясенең Арча территориаль органы (Булат Кадыйров), Арча һәм Әтнә районнары буенча Пенсия фонды идарәсе (Рузия Нурмөхәммәтова), Арча ВДПОсы (Әмир Әмирфатов) һәм башкалар редакция белән тыгыз элемтәдә хезмәттәшлек итәләр.
Шикаять хатларына да, аноним булсалар да, битараф калмыйбыз. Күчермәләрен тиешле урыннарга җибәрәбез, җавапларын алабыз. Тамчы тама-тама ташны тишәр ди, тормышыбыздагы мәрхәмәтсезлекләр, битарафлык, җитешсезлекләр турында да дәшми калмаска кирәк.
“Сорау—җавап” рубрикасына үзегезне кызыксындырган сорауларыгызны язып җибәрә аласыз.
Хөрмәтле газета укучыларыбыз, Яңа ел белән сезне! Авыртмыйча, кайгы-хәсрәтсез яшәргә язсын. Газетабызны укып, язылмаган булсагыз язылып, хатлар юллап торыгыз! Матбугат сезнең хатлар белән көчле, чөнки аларда заман сулышы, йөрәк тибеше, күңел авазы.
Румия НАДРШИНА,
хатлар бүлеге мөхәррире