Хуш, Иске ел!

Хуш, Иске ел!
Ул кичне район Үзәк чыршысының аллы-гөлле лампочкалары бигрәкләр дә матур янды. Гомере кыска шул. Балкып калыйм, дигәндер. Иске Яңа ел киче 13 гыйнвар бераз ямансу да. Чөнки Яңа ел бизәкләре, әкиятләре, могҗизалары белән хушлашасың. Хәер, исән кешегә тагын килә ул!
Бик күп тапкырлар килсен иде әле ул безгә, чыршылары, Кыш бабайлары, Кар кызлары, әкиятләре, өметләре белән. Арчабызның Сабантуй мәйданы, спорт һәм ял паркы ул кичне дәртле музыкасы белән халыкны үзенә дәшеп торды. Кибетчеләр кайнар чәй, шашлык тәкъдим итсә, район Мәдәният йорты хезмәткәрләре, авыл үзешчәннәре, хезмәт коллективлары сәхнәдә төрле кызыклар күрсәтеп, халыкның күңелен күрде. Татар халык бию көйләре аякларга салкын үтәргә ирек бирмәде.
Бие, бие, биесәнә
Шушы такмак көенә.
Тыпыр-тыпыр бер биесәң,
Күңел генә сөенә.
Үзәк чыршы кабынган көнне сәхнәгә чыккан ел символлары күсе, үгез, юлбарыс, куян, аҗдаһа, елан, ат, сарык, маймыл, әтәч, эт, дуңгыз Иске Яңа ел кичендә тәхет өчен тарт-калашып, тагын бер тамашачыны көлдереп алдылар. Кыш бабай рөхсәте белән ел тәхетенә елан йомарланып менеп яткач кына тынычландылар. Шул ук Кыш бабайлар, Кар кызлары сәхнәгә бер-бер артлы тезелешеп чыккач, халык тагын бер кат, бигрәк күп ич болар, дип сокланды. Чыршы белән хушлашу ул шәһәребезне бизәп, күңелләргә Яңа ел рухын, бәйрәм кәефен биргән хезмәт коллективлары, мәдәният хезмәткәрләре хезмәтенә бәя бирү дә. Район башкарма комитеты җитәкчесенең беренче урынбасары Рафил Исмәгыйлев, Арча шәһәре башкарма комитеты җитәкчесе Илдус Әһлиев шәһәрне Яңа ел рухында бизәүгә зур тырышлык керткән оешма, учреждение, предприятие коллективларына дипломнар, истәлекле бүләкләр тапшырдылар. Бөтен халык алдында зур сәхнәдән үз исемеңне ишетү һәм бүләк алу, әлбәттә, күңелле! Алар: Арча районы газ хезмәте (җитәкчесе Ринат Гафуров), “Тепло-Сервис” ширкәте (Тәлгать Миндубаев), “Элеватор” акционерлык җәмгыяте (Наил Гобәйдуллин), “Арча МСОсы” (Зиннур Гарифуллин), “Арча КСМы” (Рафаэль Муллагалиев), район электр челтәре (Нияз Нурмөхәммәтов), “Жилкомбытсервис” ширкәте (Альберт Хәкимов), “Тайд-Фойл” (Айдар Закиров) һ.б. Үз территорияләрен, шәһәребез йөзен нурга күмгән һәр коллективны атап бетереп булмас. Газета укучыларыбызны ялыктыруыбыз бар. Барысы да күз алдында. Кичкә кергәч, шәһәребездә ялт-йолт иткән чыршыларга, бизәкләргә сокланып, хозурланып, күпме сөенеч, шатлыклар алдык! Рәхмәт. Балалар бакчалары, мәктәпләр урамга коллективлары белән дәррәү чыгып, кардан, боздан әкият геройлары иҗат иттеләр. Килешерсез, элекке елларга караганда алар хәзер күпкә матуррак, кызыклырак. Остара барабыз.
Район мәдәният идарәсе җитәкчесе Илнур Котдусов сәхнәдә халыкка күңелле бәйрәм оештырганнары өчен мәдәният хезмәткәрләренә, мәктәп, балалар бакчалары, төрле оешма, учреждение, предприятие үзешчәннәренә дипломнар, истәлекле бүләкләр тапшырды. Котлаулар белән Иске Яңа ел бәйрәме дәвам итте. Сәхнәгә үзешчән җырчылар чыга. Авыл мәдәният йортлары, клубларыннан да тамаша күрсәтергә килгәннәр. Күңелле! Бәйрәм дә итә белергә кирәк шул. Ә алда тулы бер ел. Елыбыз тыныч, уңышлы булсын! Хуш Иске ел, исәнме Яңа ел!
Румия НАДРШИНА