Көрәшчеләр бил алыша

Көрәшчеләр бил алыша
Район башлыгы призына милли көрәш буенча ярышлар оештыру традициягә әверелде. Соңгы өч елда ул ачык турнир буларак үткәрелә һәм анда күрше районнар көрәшчеләре дә катнаша башлады.
— Әлеге турнир Әлмәт шәһәрендә үтәчәк Муса Җәлил призына милли көрәш буенча республика ярышына сайлап алу да булачак, — ди районның яшьләр эшләре, спорт һәм туризм бүлеге җитәкчесе Зиннур Сәгыйтов. — Бүген шулай ук предприятие, учреждение һәм авыл хуҗалыгы берләшмәләре спортчылары да “Сәламәтлек” спартакиадасы кысаларында көч сынашачак.
Милли көрәш буенча ярышларның баш хөкемдары республика категорияле хөкемдар, гер спорты буенча спорт мастеры Ринат Алеев. Ринат Заһидович үзе дә көрәшче. 1972 елда студент чорында ук үзен көрәш келәмендә сыный ул. Арчага килгәч Сабантуйда 70 килограммга кадәр үлчәүдә беренче урынны ала. Аннан Казанда, Чувашстан Сабантуйларында абсолют батыр кала, гер күтәрү буенча да бик күп тапкырлар беренчелекне яулый. Һәм менә чирек гасырдан артык ул Сабантуйларда көрәш буенча баш хөкемдар. Ә аның ярдәмчесе якташыбыз, көрәш буенча халыкара категорияле хөкемдар Рифкать Җәләев. Татарстан көрәш федерациясенең иң зур бүләгенә — алтын билгесенә лаек булган физик культура отличнигы, татарча көрәш буенча Россия чемпионы Рифкать Имамович Россия төбәкләрендә, Балтыйк буе илләрендә дә көрәш буенча ярышларда хөкемдарлык итә. Менә шундый спорт дөньясында танылган кешеләрнең осталыкларын бәяләве яшь көрәшчеләр өчен үзе зур тәрбияви чара.
Милли көрәш буенча ярышта катнашучыларны муниципаль район башлыгы Алмас Назиров исеменнән район башкарма комитеты җитәкчесе урынбасары Надия Мифтахетдинова котлады.
— Безнең төбәк — көрәшчеләр төбәге. Милли көрәш — милли төсебез, рухыбыз. Элек-электән Сабантуйлар үзенең көрәшчеләрен барлаган. Хәзер дә спортның бу төренә игътибар зур. Яшьләр арасында да аңа тартылучылар күп. Бүгенге ярыш — шуның бер билгесе, — диде Надия Равилевна яшь көрәш-челәргә уңышлар теләп, һәм ярышларны ачык дип белдерде.
Ярышларга Саба, Кукмара, Биектау, Әтнә районнарыннан да көрәшчеләр килгән иде. Арча районы данын “Игенче” (Наласа), “Ак Барс-агро” ширкәтләре, “Олимп”, “Арча” балалар-яшүсмерләр спорт мәк-тәпләре, Арча педагогика көллияте спортчылары яклады. Көрәш 10 үлчәү категориясендә барды. “Олимп” балалар-яшүсмерләр спорт мәктәбеннән Илнар Сөнгатов, Айрат Абдуллин, Илнур Зәйнуллин, педагогика көллиятеннән Зөлфәт Мостафин, Наласадан Дамир Әһлиуллин үз үлчәү категорияләрендә җиңүче булдылар. Районнар арасында беренче урында — арчалылар, предприятиеләр арасында “Олимп” балалар-яшүсмерләр спорт мәктәбе. Соңыннан җиңүчеләргә дипломнар, медальләр, кыйммәтле бүләкләр тапшырылды.
Гөлсинә ЗӘКИЕВА