Безнекеләр — беренче!

Безнекеләр — беренче!
Татарстан Республикасы хәрби комиссариатының Арча һәм Әтнә районнары буенча бүлеге 2012 елда гомуми хезмәт эшчәнлеге һәм хәрби хезмәткә чакыруны оештыру буенча беренче урынны алды, кубок һәм вымпел белән бүләкләнде. Әлеге сөенечле хәбәрне алуга без бүлек җитәкчесе А.Ә.Борһанов белән элемтәгә кердек.
— Алмаз Әгъзәмович, шатлыгыгызны уртаклашабыз, бу җиңү артында киеренке, гаять зур хезмәт ятуын яхшы аңлыйбыз. Шул турыда бераз әйтеп үтсәгез иде.
— Иң беренче чиратта безгә эшләү өчен бөтен мөмкинлекләрне тудырган муниципаль район башлыгы Алмас Әминовичка зур рәхмәт әйтеп үтәсем килә. Соңгы елларда бүлекнең матди-техник базасы бик нык яхшырды. Хәрби хезмәткә чакырылучылар, ата-аналар белән эшләү өчен бөтен шартлар бар. Алмас Әминович бүлек эшчәнлеге белән даими кызыксынып тора, кирәкле ярдәмне күрсәтә.
Бүлекнең эшенә бәя бирелә торган төп күрсәткечләрнең берсе — гражданнарны хәрби хезмәткә чакыру. Чөнки Ватанны саклау – һәр ир-егетнең изге бурычы. Менә шушы бурычны үтәү проблемасы кискен булган еллар, ниһаять, артта калды. Әле кайчан гына хәрби хезмәттән качып йөрүчеләр йөзләп исәпләнсә, хәзер алар икәү–өчәү генә. Егетләр, армиягә алыгыз дип, үзләре килә. Хезмәт итү срогы да бер ел гына, телефоннан хәбәрләшеп торалар, хәтта яннарына барып кайтырга да була.
— Әле менә телевизион күпер дә оештырдыгыз...
— Саратов өлкәсендә безнең район шефлык итә торган хәрби часть бар. Анда Арча районы егетләре шактый. Ике арада ныклы элемтә урнаштырдык, берничә тапкыр районнан делегация дә барды. Егетләрне телеэкран аша ата-аналары, туганнары белән очраштыру шулай ук зур вакыйга булды. Киләчәктә мондый чараны башка урыннарда хезмәт итүче егетләр белән дә уздыру мөмкинлекләрен өйрәнәбез.
Ватанга мәхәббәт кечкенәдән тәрбияләнә. Без районның ветераннар оешмалары белән берлектә мәктәпләрдә “Батырлык дәресләре” үткәрәбез, укучылар алдында совет халкының Бөек Ватан сугышындагы батырлыгы, Кораллы Көчләрнең бүгенге роле, хәрби реформаларның барышы турында сөйлибез.
Районда хәрби хезмәткә чакырылучы көне үткәрү матур традициягә әверелде. Бу көнне район Мәдәният йортына хәрби бурычларын үтәргә тиешле егетләр, аларның ата-аналары җыела. Анда матур теләкләр теләнә, район җитәкчеләре, дин әһелләре һ.б. чыгыш ясый.
2011 елдан башлап бүлек җитәкчесенә районның җәмәгать тәрбиячесе булу да йөкләнде. Билгеле, бу җаваплы эшкә бөтен коллектив алынды. Уртак тырышлык белән ике яшүсмерне төзәлү юлына бастыра алдык, аларның берсе исәптән дә төшерелде. Без алар белем алган уку йортларына барабыз, барлык укучылар белән әңгәмәләр үткәрәбез, һәркайсының тәртипле булып үсүен телибез. Яшүсмерләрнең өйләрендә дә булабыз, аларның нәрсә белән мавыгуларын, тәрбияләүдә нинди проблемалар булуын өйрәнәбез, төрле түгәрәкләргә йөрергә тәкъдим итәбез, башка ярдәм күрсәтәбез.
Ильяс СӘХӘПОВ