Бер яшьлектә, дисәләр дә...

Бер яшьлектә, дисәләр дә...
Югары Аты авылында район тарихында беренче тапкыр 40 яшьтән өлкәннәр арасында хоккей ярышлары булды. Анда Арча, Яңа Кенәр һәм Утар Аты җирлеге командалары көч сынашты.
Хоккей ярышлары 1972–1986 елларда Утар Аты мәктәбендә физкультура укытып, авыл яшьләрен туплап бер дигән хоккей командасы оештырган Әмин Исмәгыйлев истәлегенә уздырылды. “Әти спортка җаны-тәне белән бирелгән кеше иде”, — дип искә ала улы Фәнис. Ул елларда Утар Атының хоккей командасы район күләмендә генә түгел, республикада да танылу ала. Заманында яшүсмерләр арасында “Алтын алка” турнирында Казан командасын җиңеп, финалда Яшел Үзән командасына гына җиңелеп, икенче урын яулап кайтканнар. Авыл командасын шул дәрәҗәгә күтәрергә Әмин абый никадәр тырышлык куйган! Әнә шул уңышлардан соң команданың исеме еракларга тарала, Утар Атыга хоккей уйнарга күрше-тирә авыллардан, башка районнардан да килә башлыйлар. Хәтта Казанның Урицкий исемендәге спорт клубының (бүгенге көндә ул “Ак барс” хоккей клубы) балалар һәм яшүсмерләр командалары уйнарга килә һәм Утар атылылар анда да сынатмый, шул өч команданың икесен җиңүгә ирешәләр!
Әмин абыйның укучылары арасында республика чемпионнары да була. Мәсәлән, Утар Аты егете Фәнис Мостафин үзвакытында Казан марафонында беренче урынны яулый. Остазларын укучылары бары яхшы яктан гына искә ала. Ярышлар уздыру идеясен дә алар күтәреп алып, бергәләп башлап җибәргән. Иганәчеләр дә элеккеге укучылар, шул чорда хоккей белән җенләнгән авыл егетләре, “Игенче” ширкәте, авыл җирлегендәге эшмәкәрләр. Әтисенең рухын шатландырган өчен Фәнис Исмәгыйлев оештыручыларга, Утар Аты авыл җирлегенә, бу төбәктә Әмин абыйның традициясен саклап, хоккей командасын югары дәрәҗәдә тоткан өчен тренер Илнур Габдрахмановка да рәхмәт белдерде.
Бүгенге ярышлар үткән елларның якты хатирәләрен яңартып Югары Аты авылында гөрли. Үзләренең бишенче, алтынчы дистәләрне ваклауларын оныткан уенчылар янып-көеп, бар көчләрен биреп яшьләргә хас елгырлык белән уйный, һәркемнең җиңүче буласы килә. Тирә–якта гөр килеп якыннары, дуслары көч биреп тора. Тамашачылар күрше–тирә авыллардан ук килгән. Һәм, ниһаять, финал! Беренче урында — арчалылар, икенчедә — кенәрлеләр, хуҗалар өченче урында. Биш номинациядә: “Иң яшь уенчы”, “Иң өлкән уенчы”, “Иң яхшы капкачы”, “Иң яхшы сакчы”, “Иң яхшы һөҗүмче”гә истәлекле бүләкләр тапшырылды.
Хәрәкәттә — бәрәкәт, диләр. Спорт белән өлкән яшьтә дә дусларча яшәп була икән бит. Әлеге ярышлар яшь буын өчен дә үрнәк булды: яшь чакта гына шөгыльләнеп, аннан кул селтәргә ярамый, нинди генә яшьтә булсаң да мөмкинлегең булганча сәламәт яшәү өчен тырышырга кирәк, чөнки спорт ул — сәламәтлекнең нигезе. “Матур башлангыч бу, мондый ярышлар алга таба да узачак”, — дип белдерде район яшьләр эшләре, спорт һәм туризм бүлеге җитәкчесе Зиннур Сәгыйтов.
Розалия ЗИННӘТОВА