Хәл итмәслек мәсьәлә юк

Хәл итмәслек мәсьәлә юк
Татарстан Республикасында бала хокуклары буенча вәкил Гүзәл Любисовна Удачина район хакимиятенең утырышлар залында гражданнарны кабул итте. Анда журналистлар да катнашты.
Балалар мәсьәләләренә кагылган район оешмаларыннан да вәкилләр бар иде. Һәр сорауны, һәр гозер, проблеманы өйрәнгәндә, хәл иткәндә оешмалар (Арча шәһәре башкарма комитеты, район мәгариф идарәсе, социаль яклау идарәсе, сәламәтлек, прокуратура һ.б.) җитәкчелегенә җавап бирергә, хәлне аңлатырга әзер дә булып торырга кирәк.
Сорауларның төрлесе булды. Бар да балага барып тоташа. Ата-ана баланы җир йөзенә тудырган икән инде, алар газизләрен тиешенчә тәрбияләргә, сәламәт, тәртипле, акыллы булып үсеннәр өчен шартлар тудырырга бурычлылар. Кабатлап әйтәм, ананың да, атаның да тигез бурычы бу. Ярдәм сорап Татарстан Республикасы вәкиленә килүчеләрдән, нигездә, баланы бер як кына тәрбияләгәне аңлашыла.
Өч бала әтисе яшь ир кешене (исем-фамилияләрен язмыйм) вәкил каршына нинди борчулар китергән соң? Берсеннән-берсе кечкенә өч бала да ата тәрбиясендә. Җитмәсә хатынының бер баласын да үзенә яздырган. Ә ана дигәннәре узган елның җәеннән бөтенләй балаларны (кечкенәсенә 1 яшь тә 6 ай гына) тәрбияләүдә катнашмый икән, аның кайда икәнлеген дә белмиләр. Ананы табып, сабыйларны карарга яки алимент түләтергә мәҗбүриләп булмасмы икән, дип үтенә әти кеше. Ә бит балигъ булмаган балалар белән эшләүче белгечләр, психологлар ананы акылга китерергә бик тырышып караганнар, тик нәтиҗәсе генә булмаган. Бу хәл итмәслек мәсьәлә түгел, ярдәм итәрбез, диде вәкил.
Ике балалы ана, аерылган ире белән фатир мәсьәләсен уңай хәл итә алмаудан гаҗиз булып, зин-һар, ярдәм итегез, дип киңәш сорап килгән. Бәхәсне бары тик суд кына хәл итә. Милек бүлүне сорап судка гариза язарга киңәш ителде анага.
Икенче бер ана ике баласы белән әнисенә кайтып китәргә мәҗбүр булган. Каһәрли, инвалид балам бар, фатирга кертми, дип күз яшьләре белән елый. Социаль ипотека буенча өч бүлмәле фатир алганнар. Ә хәзер ир берүзе хакимлек итә икән анда. Түләүләрне берүзем башкарам, ди хатын. Әлбәттә, социаль ипотека программасының үзенең нечкәлекләре күп. Нинди генә катлаулы хәл булмасын, барыбер дә чыгу юлы бар, ди безнең халык. Монда да мәсьәләне уңай хәл итү юллары турында сөйләшенде. Ана үз фатирында балаларын тәрбияләчәк.
Арчада баланы бакчага урнаштыра алмыйм, дип зарын сөйләүче ана да булды. 3 яшькә кадәрле балаларны бакчага урнаштыру буенча, чыннан да, проблема бар, урыннар җитми. Дөрес, районда гаилә бакчаларының оешуы мәсьәләне бераз уңай хәл итә. Район башкарма комитеты җитәкчесенең социаль мәсьәләләр буенча урынбасары Надия Мифтахетдинова: “Без бу мәсьәләне һәрвакыт күз уңында тотабыз”,— дип, төгәл мисаллар белән сөйләде.
Татарстан Республикасының бала хокуклары буенча вәкиле Гүзәл Любисовнаның, урыннарга барып, халык белән эшләве бик әйбәт. Иң мөһиме: вәкил һәр мәсьәләнең үтәлешен контрольдә тотачак.
Кабул итүдә вәкил аппаратының бала хокукларын һәм законлы мәнфәгатьләрен яклау бүлеге җитәкчесе Н.В.Бычкова катнашты.
Румия НАДРШИНА.