Ныклы белем бирергә, һөнәргә өйрәтергә!

Ныклы белем бирергә, һөнәргә өйрәтергә!
23 гыйнварда Арчада муниципаль берәмлекләрнең мәгариф идарәләре органнары җитәкчеләренең республика киңәшмәсе булды.
Татарстан Республикасы мәгариф һәм фән министры Энгель Фәттахов яңа вазифага керешкәннән соң беренче сәяхәтен Арча районына ясаган иде.
— Арча районының мәгариф өлкәсендәге уңышларына сокланабыз. Сезнең тәҗрибә киләчәк эшебездә дә бик кирәк булачак, — дигән иде ул.
Әйе, районыбызның мәгариф өлкәсендәге казанышлары тәэсирләндерерлек. Соңгы ун елда 67 мәгариф объекты төзелде һәм үзгәртеп корылды. Мәктәпләребездә балаларга ныклы белем, яхшы тәрбия бирү өчен бөтен мөмкинлекләр тудырылды. Шулар белән бергә укучыларга һөнәри белем бирү буенча да зур эш алып барыла. Республика киңәшмәсенең төп темасы әнә шул иде.
Республиканың мәгариф һәм фән министры Энгель Фәттахов, муниципаль район башлыгы Алмас Назиров, киңәшмәдә катнашучылар башта Арчаның В.Ежков исемендәге 1нче урта мәктәбендә (рәсемдә) булдылар. Әлеге уку йорты соңгы елларда бик нык үзгәреш кичерде, бинасы яңарды, заманча җиһазландырылды. Укучылар биредә электрон хисаплау машиналары операторы, “В” һәм “С” категорияле шофер һөнәрләре дә үзләштерә.
Мәктәп фойесында киңәшмә темасына, мәгариф өлкәсенә багышланган күргәзмә материаллар куелган иде. Уку йортлары җитәкчеләре, министрлык белгечләре алар белән таныштырып үттеләр. Шунда ук Казан шәһәре предприятиеләре тәкъдим иткән мәктәп формалары да күрсәтелде.
— 2013 елның 1 сентябреннән мәктәп формасына күчү мәҗбүри, — диде Энгель Фәттахов.
Кунаклар Арчаның ныклап төзекләндерелгән 2нче урта мәктәбендә, РОСТО (ДОСААФ) оешмасының автодромында, Арчаның 5нче гимназиясендә булдылар. Автосыйныфлар 2011–2012 уку елында 173 шофер, 42 тракторчы әзерләделәр.
ТР мәгариф һәм фән министры Энгель Фәттахов 2нче мәктәпнең төзекләндерү сыйфатына да югары бәя бирде.
— Башка урыннарда да шуннан ким булмаска тиеш, — диде ул.
Район Мәдәният йортында киңәшмәнең пленар өлеше үтте. Аны республиканың мәгариф һәм фән министры Энгель Фәттахов ачты. Ул матур итеп кабул иткәннәре, киңәшмәнең уңышлы үтүе өчен шартлар тудырганнары өчен муниципаль район башлыгы Алмас Назировка рәхмәтен белдерде, алда торган бурычларга тукталды.
Муниципаль район башлыгы Алмас Назиров үзенең чыгышында мәгариф идарәләре җитәкчеләренең республика ки-ңәшмәсен нәкъ менә Арчада үткәргән өчен Энгель Наваповичка рәхмәт әйтте.
— Бу безгә тәҗрибәбез белән уртаклашу мөмкинлеге бирә, шул ук вакытта безгә билгеле бер җаваплылык та өсти, — диде ул.
Алмас Әминович районның тарихы белән кыскача таныштырып үтте, мәгариф өлкәсендә башкарылган эшләр турында сөйләде, мәгариф системасына карата уй-фикерләре белән уртаклашты.
Моннан ун еллап кына элек районда мәгариф объектларының 35е тузган һәм җимерелү куркынычы астында, 10 объект башланган һәм ташланган төзелеш хәлендә иде. Ун ел эчендә бик зур күләмдә эш алып барылды, район мәгариф объектларын иң күп төзүче булып танылды.
Мәктәпләрнең, мәктәпкәчә учреждениеләрнең матди-техник хәле яхшыру белән бергә, укучыларга белем, тәрбия бирү сыйфаты да күтәрелә бара. Хезмәт тәрбиясе һәм тормышка әзерләү дә мөһим юнәлешләрнең берсенә әверелде. Узган ел 1 сентябрьдән “Тормыш дәресләре” керә башлады. Аларда балалар тормыш өчен иң кирәкле темаларны үзләштерәләр, үзенә күрә болар хезмәт эшчәнлегенә беренче адымнар да. Мәктәпне бетергәндә һәр укучы ныклы белем һәм кимендә бер һөнәр үзләштергән булырга тиеш!
Район мәгариф идарәсе җитәкчесе Рина Бәдриева районда эшче һөнәрләргә әзерләү тәҗрибәсе белән уртаклашты.
Киңәшмәдә ТР мәгариф һәм фән министрының беренче урынбасары Данил Мостафин, министрлыкның дәүләт программалары һәм проектларын тормышка ашыру бүлеге җитәкчесе Татьяна Алексеева, сектор мөдире Әнисә Морозова, эшләр идарәчесе Илдар Шәмсетдинов чыгыш ясады.
ТР мәгариф һәм фән министры Энгель Фәттахов киңәшмәгә йомгак ясап, анда тикшерелгән мәсьәләләр буенча бурычлар куйды.
Ильяс ФӘТТАХОВ