Сыйфатлы итеп эшләргә!

Сыйфатлы итеп эшләргә!
Муниципаль район башлыгы Алмас Назиров 28 гыйнварда 2013 елда яңа төзелә һәм төзекләндерелә торган объектларда булды.
Алмас Әминович район үзәк хастаханәсенең төзекләндерелә торган өлешен карады. Биредә “Водоканал-Сервис” һәм “Строй-Мастер” ширкәтләре эшли. Планлаштырылган эшләр тө-гәлләнеп килә. Сыйфат буенча зур кимчелекләр табылмады. Финанс мәсьәләсен хәл итеп, бинаны тиз арада сафка бастырасы бар. Район башлыгы хастаханәнең калган өлешен төзекләндерү буенча да эш алып барылуын әйтте.
Сикертән авылында “Арча КСМы” ширкәте яңа клуб төзи. Көздән нигезен салып калдырганнар иде, инде менә стенасын күтәрә башладылар. Район башлыгы эш барышыннан канәгать калды, киңәшләрен бирде.
Алмас Назиров Арчаның элеккеге 6нчы мәктәбе бинасында да булды. Монда зур үзгәрешләр көтелә, озакламый төзекләндерү эшләре башланачак.
Иске Чүриле урта мәктәбе быел ныклап төзекләндереләчәк. “Арча МСО”сы ширкәте түбә, тәрәзә, ишекләрне, эчке инженер системасын, бинаның тышкы ягын яңартачак, нигез кырыйларын ныгытачак. Алмас Әминович мәктәпне карап чыккач төзүчеләр, мәктәп коллективы алдында торган бурычларны аңлатты.
Симетбаш авылында яңа клубның инде түбәсен ябарга әзерләнәләр. Шушы авылда туып-үскән “Таттелеком” акционерлык җәмгыяте генераль директоры Лотфулла Шәфигуллин булышлыгы белән төзелә торган бу объектны Җиңү көненә тапшыру бурычы куелды. Алмас Әминович биредә эш оештырылуыннан, сыйфаттан канәгать калды.
Быел, ниһаять, Шушмабаш урта мәктәбендә ныклап төзекләндерүгә чират җитте. Бу эшнең бик кирәклеген район башлыгы ата-аналар, мәктәп коллективы белән очрашуларда әйтә килде. Матур күрсәткечләре белән данлыклы мәктәп моңа лаеклы. Хуҗалык җитәкчесе Рөстәм Хәйруллин да кулдан килгәнчә ярдәм итәчәк-без дип тора. Алмас Әминович мәктәпне җентекләп карап чыкты, киңәшләрен, күрсәтмәләрен бирде. Биредә “Строй-Мастер” ширкәте эшләячәк.
Лесхоз урта мәктәбендә быел “Арча КСМы” ныклап төзекләндерү үткәрә. Мәктәптә җылылык системасы да алышыначак, яңа казаннар куелачак. Бу мәктәп тә — районыбыз горурлыгы. Көчле педагоглар эшли, укучылар Россия буенча олимпиадаларда җиңүләр яулый. Тиздән аның бинасы да балкып торачак. Алмас Назиров мәктәпне карап чыкты, киңәшләрен бирде.
Район башлыгы төзүче оешмаларга эш темпын тизләтергә кушты, әмма сыйфат беренче планда булырга тиеш!