Өйләребез җылы булган өчен рәхмәт

Өйләребез җылы булган өчен рәхмәт
Бу көннәрдә район предприятиеләрендә, оешмаларда, хуҗалыкларда барган җыелышларда 2012 елда башкарылган эшләргә йомгак ясала, 2013 елга бурычлар билгеләнә. Әлеге җыелышларда район Советы, башкарма комитетының җаваплы хезмәткәрләре катнаша.
31 гыйнварда Арча газ хезмәте коллективы җыелышында муниципаль район башлыгы Алмас Назиров, “Сабагаз” җитештерү-файдалану идарәсе җитәкчесе Исмәгыйль Мөхетдинов (рәсемдә) катнашты.
Идарә җитәкчесе Исмәгыйль Мөхетдинов үзенең чыгышында: “2012 елда планлаштырылган эшләрне тормышка ашырып бетердек, Арча районы җитәкчелеге белән аңлашып, тыгыз элемтәдә торып эшлибез”, – диде. Барлык җиһазларны ныклап төзекләндереп, торбаларны буяп чыкканнар. Соңгы 4 елда идарә буенча ныклап төзекләндерүнең 80 проценты Арча районына туры килә.
— Иң мөһиме — хәвеф-хәтәрсез эшләү, — диде җитәкче. — Узган ел “Таттрансгаз” буенча хәл шактый катлаулы булды. Сөрем газы белән үлүчеләр шактый. Гыйнварда республикада шундый 7 очракта 5 кешенең гомере өзелә. Төтен юлларын төзек тоту безнең хезмәткә карамаса да, өйләрдә булганда моңа игътибар итегез, аңлатыгыз.
Арча районы территориясеннән югары басымлы газ торбалары үтә, аларга якын урнашкан йортлар бар, монда аеруча саклык кирәк. Саклык зоналарына агач та утыртылырга тиеш түгел.
Районда газ басымы җитмәгән авыллар, урамнар бар иде. Хәзер алар район җитәкчелеге белән берлектә тиешле нормага китерелде. Кеше тиешле акчасын түләгән икән, җылыда рәхәтләнеп яшәп ятсын. Һәр йортта газ хезмәткәрен танып белсеннәр, яратсыннар, хөрмәт итсеннәр. Күпчелек кеше яккан газ өчен вакытында түләргә тиеш, монда кыенлыклар килеп чыга, әмма алар җиңеп булырлык.
“Таттрансгаз” идарәсе җитәкчелеге үз хезмәткәрләре турында кайгыртып, социаль пакет дигән нәрсәне саклап кала алды. Юбилейларга, бала туганда, лаеклы ялга киткәндә, кайгы-хәсрәт килгәндә сизелерлек күләмдә ярдәм күрсәтелә.
Полиция участок инспекторы Рафил Хәбибуллин җинаятьчелеккә каршы көрәшнең торышы турында сөйләде, үз эше турында хисап тотты.
Муниципаль район башлыгы Алмас Назиров чыгышын район газ хезмәте эшчәнлеген бәяләүдән башлады.
— Территориягездә тәртип, тырыш хезмәтегез белән районның социаль-икътисади үсешенә, халыкның яшәү шартларын яхшыртуга зур өлеш кер-тәсез, — диде. — Болар өчен зур рәхмәт сезгә.
Алмас Әминович 2012 елда район ирешкән уңышларга, 2013 елдагы бурычларга тукталды. Ел, гомумән алганда, начар булмады. Авыл хуҗалыгында уңышлар әйбәт. Сәнәгать предприятиеләре үсешкә иреште. 29,5 мең квадрат метр торак сафка кертелде, социаль объектлар күп төзелә, күп программалар тормышка ашырыла.
Шуның кадәр зур күләмдәге объектларны сафка бастыруда газ хезмәте коллективының да өлеше зур. Аларның барысына да газ кертелә, алар башкара торган башка эшләр дә бар.
Районда юллар төзелешенә игътибар арта. Арча шәһәре эчендә генә дә 156 километр юл бар. Узган ел аларда 15 млн. сумлык эш башкарылды, быел ул 30 млн. сум булыр дип көтелә. Хәзер юлларны бик сыйфатлы итеп салалар.
Район бюджетының үтәлүе куанычлы хәл. Моңа район газ хезмәте дә лаеклы өлеш кертте. Районда 18001 хуҗалык бар. Шуларның 12се генә төрле сәбәпләр белән газ кулланмый.
— Газ мәсьәләсендә бернинди зарлану юк, — диде Алмас Назиров. — Килеп туган проблемаларны “Сабагаз” идарәсе җитәкчесе Исмәгыйль Ибрае-вич белән хәл итеп барабыз.
— Сезнең төп эш — халыкны даими газ белән тәэмин итү, куркынычсызлык кагыйдәләрен үтәү, — диде Алмас Әминович. Өйләр җылы, суы җылы, рәхәт булган өчен халык сезгә бик рәхмәтле. Сезнең карамакта 1154 километр газүткәргеч исәпләнә, бу район юллары озынлыгыннан аз гына азрак. Узган ел 357 йортка газ керткәнсез. Быел социаль ипотека буенча — 264, тузган торакны бетерү программасы буенча 101 фатир төзеләчәк. Сезнең өчен дә күпме эш күләме арта дигән сүз.
Ильяс ФӘТТАХОВ