Спортта да сынатмыйлар

Спортта да сынатмыйлар
Яшь спортчыларыбызның Универсиаданы матур күрсәткечләр, уңышлар белән каршылавы үзләре өчен генә түгел, район өчен дә зур горурлык. Спортның күп төрләре буенча райондашларыбызның җиңүләргә ирешүләре моның бер билгесе. Менә әле күптән түгел генә район спорт дөньясы тагын бер уңыш белән баетылды. Якташларыбыз Рамилә Әхмәтҗанова белән Ильяс Сафиуллин, кул көрәше буенча Идел буе Федераль округы ярышларында катнашып, пьедесталның югары баскычларына күтәрелделәр.
Рамилә Югары Бирәзә авылыннан. Өчиле мәк-тәбендә 9 сыйныфта укый.
— Кул көрәше белән 13 яшьтән шөгыльләнәм. Моңа апаларым Нурсөя белән Руфинә үрнәк булдылар дип уйлыйм. Аннан Өчиле һәм “Олимп” балалар-яшүсмерләр спорт мәктәбендә кул көрәше буенча тренер булып эшләүче Фәнис Мөхәммәтшинның да сүзләре үтемле булгандыр. Аның кул көрәше белән шөгыльләнергә теләге булган балаларны төркемгә туплавы турында ишеткәч, мин дә язылдым. Күрәсез, юкка булмаган, — ди яшь спортчы кыз.
Беренче елны ук ул, район ярышында катнашып, беренче урынны ала. Аннан 1–2 урыннардан төшми. Сабантуйларда да кул көрәштереп авылдашларын сокландыра. 2011 елда Татарстанда — икенче, 2012 елда беренче урынны яулый һәм Идел буе Федераль округында үткәрелгән ярышларга юл “яра”. 1996–1997 елгылар арасында 70 килограммнан артык үлчәү категориясендә Рамилә беренчелекне яулый. Татарстан командасы да әлеге ярышта беренче урынны ала.
— Кул көрәше спортчыдан нинди сыйфатлар таләп итә, — дип сорыйм кыздан.
— Иң беренче чиратта тырышлык, үз-үзеңә ышаныч, чыдамлык кирәк. Аннан аз гына психолог булу да зыян итми. Көндәшеңне аңлый, тоя белү дә зур роль уйный, — дип җавап бирде Рамилә.
Тиздән Рамилә Әхмәтҗанова кул көрәше буенча Россиякүләм ярышта Арча данын яклаячак. Аның белән бергә шулай ук Өчиле егете, Фәнис Мөхәммәтшин шәкерте Ильяс Сафиуллин да барачак.
— Мин Өчиле мәктәбендә 9 сыйныфны тәмамлап, хәзер Арча педагогика көллиятендә укыйм. Кул көрәше белән Фәнис абый җитәкчелегендә 4 ел шөгыльләнәм. Беренче урыннарны яулап киләм. Идел буе Федераль округы ярышларында өченче урынны алып, Мәскәүгә баруым үзе бер җиңү, — ди Ильяс.
Егетнең киләчәккә хыялы да тренер булу. Спортның башка төрләре — баскетбол, волейбол һәм башкалар белән яратып шөгыльләнсә дә, Ильяс Сафиуллинга кул көрәше күбрәк ошый. Моны ул тренерлары Фәнис Мөхәммәтшин һәм Фәрит Мөбарәковның шәхси үрнәкләре нәти-җәсе, ди.
Фәниснең үзе белән дә очраштык ул көнне, укучыларының мактау сүзләрен җиткердек, үзенең дә алар турында фикерләрен белдек.
Фәнис Мөхәммәтшин үзе дә кул көрәше остасы. Ике тапкыр Татарстан беренчелеген ота. “Авыл яшьләре” уеннарында берничә тапкыр югары урыннарны яулый, 2009 елда Россия чемпионы була. Үзе бүгенге көндә читтән торып Казанда югары уку йортында физик культура факультетында укый, Өчиледә, “Олимп” балалар-яшүсмерләр спорт мәктәбендә тренер буларак балалар белән шөгыльләнә.
— Укучыларының Арча данын яклап көрәшеп, югары нәтиҗәләргә ирешүе тренер өчен дә зур шатлык, — ди Фәнис. — Иске Муй авылы егете, спорт остасы Фәрит Мөбарәков та безгә бик булыша. “Олимп” балалар-яшүсмерләр спорт мәктәбе администрациясе дә һәрьяктан ярдәм итә. Коллектив дус, тату. Бу үзе тырышып эшләү өчен этәргеч. Ә балаларга килгәндә, алар авылда туып, эшләп, ныгып, чыныгып үскән. Кул көрәшенең техникасын өйрәтү, нечкәлекләренә төшендерү җитә.
Кул көрәшенең яшь осталарына Россия ярышларыннан да зур җиңү белән кайтуларын телибез. Универсиада алдыннан бу үзе бик зур уңыш булачак. Без сезнең өчен, Рамилә һәм Ильяс.
Гөлсинә ЗИННӘТОВА