Моңнар агышы җырларда

Моңнар агышы җырларда
Район Мәдәният йортында концерт. Гадәти концерт түгел. Үзебезнең район мәдәният идарәсе җитәкчесе Илнур Котдусов концерты!
Илнур Фарадисовичның яңгыравыклы, көчле, моңлы, матур тавышы моңарчы да сәхнәләрдән яңгырады, тамашачыларны сокландырды, алкышлар яулады. Тик ул бик сирәк була һәм бер җыр белән тәмамлана иде. Ә бу көнне ул кич буе үзенең яраткан җырларын башкарды.
— Сезгә каян килгән шундый сәләт? Гадәттә, әти-әнидән, диләр. Алар матур җырлыйлармы? — дип сорадым соңыннан Илнур Котдусовтан.
— Юк, әни дә, әти дә җырламый. Балтачта әти ягыннан туганым Әнәс абый мәдәният өлкәсендә эшләде, җырлап йөрде. Шуңа тартканмын, күрәсең. Кечкенәдән авыл сәхнәсеннән төшмәдем, концертларда чыгышлар ясадым. Мәктәптә дә бу шөгылемне дәвам иттем. Зона, район бәйгеләрендә катнашып, дипломант, лау-реат исемнәре алдым. Педагогика көллиятенең музыка бүлегенә укырга кергәч, җыр белән чынлап шөгыльләнә башладым. Аннан педагогия институтын, ТР Президенты каршындагы дәүләт хезмәте академиясен тәмамладым. Һәм хәзер үземә якын булган мәдәният өлкәсен җитәклим.
— Сәхнәдә бөтен тамашачы алдында танылган продюсер Җәүдәт Гыйльманов сезне җырчы булып китәргә өндәве, үз канаты астына алырга теләве, әмма сезнең каршы килүегез турында әйтте.
— Әйе, ул күптәннән чакырып йөри. “Бөтен кеше дә җырчы булып бетә алмый. Мин үзебезгә кирәк әле. Яхшы җитәкче булырга тырышам”, — дим һәрчак аның тәкъдименә каршы.
— Үз концертыгызны кую теләге кайчан туды?
— Күптәннән кызыгып йөри идем. Кыюлыгым җитмәде. Дусларым, коллегаларым ярдәме белән, ниһаять, теләгемә ирештем. Тамашачының җылы каршылавы, алкышлар миңа көч һәм дәрт бирде.
Илнур Фарадисовичның бу концерты туган көненә дә туры килде. Аның белән бергә иңгә-иң куеп сәхнәдән чыгыш ясарга, Арча тамашачысын сөендерергә якташларыбыз җырчылар “Татар моңы” бәйгесе лауреаты Рәфинә Ганиуллина, Нурзадә, “Сәфәр” егетләр төркеме, “Казан кичләре” бию төркеме дә килгән иде. Концертны нәфис сүз остасы Азат Фазылҗанов алып барды. Арчалылар Зилә Мортазина белән Венер Хисамиевның биюе, Айрат Нуриязданов, Миндияр Шәймәрданов, Расих Галимҗановның җырлары, Илнур Фарадисовичның Расих Галимҗанов һәм Рамил Мөхетдинов белән “Киек казлар”ны башкарулары, Рәдис Харисов һәм Вагыйз Әһлиуллинның гармунда уйнаулары концертны тагын да тулыландырып, баетып, ямьләндереп җибәрде. Әмма ул кичне сәхнә хуҗасы — Илнур Котдусов иде. Ул тамашачылар хөкеменә үзе яраткан татар халык, үзешчән һәм танылган композиторлар җырларын тәкъдим итте. туган авылы Каргалыга, әти-әнисенә багышланган җырларын башкарды, олы хөрмәт йөзеннән залда утырган әнисе җилкәсенә ап-ак шәл салды, әтисенә түбәтәй кидерде.
— Илнурның матур җырлавын беләбез. Әмма болай ук булыр дип уйламаган идек. Әти-әни өчен чиксез зур горурлык бу, — диде концерттан соң Фарадис ага. Әти-әнинең күзләрендә шатлыктан, бәхеттән очкыннар яна иде.
Илнур Котдусовның иҗат уңышы, иҗади җиңүе, сәхнәне яулавы һәм туган көне белән котларга район башкарма комитеты җитәкчесе урынбасары Надия Мифтахетдинова, район мәгариф идарәсе җитәкчесе Рина Бәдриева, яшьләр эшләре, спорт һәм туризм бүлеге җитәкчесе Зиннур Сәгыйтов, “Арча” телерадиокомпаниясе җитәкчесе Рамил Мөхетдинов, халыкны социаль яклау идарәсе җитәкчесе Рамил Гарифҗанов килгән иде.
— Илнур Фарадисович югары белем алып, районга тугры калып, мәдәният өлкәсен алып барган яшь җитәкче. Хезмәтен яратып башкара, — диде Надия Равилевна. — Ә бүгенге концерты — зур батырлык, кыюлык.
Аның бу сүзләренә тамашачылар да кушылды.
— Безнең як егете бит бу. Беренчедән, шуның белән горурланам. Җырлаганын белә идем. Әмма шундый искиткеч матур концерт куюы көтелмәгән хәл булды. Чыннан да, без булдырабыз икән бит. Үзебезнең арада мондый талант иясе яшәве үзе горурлык, — диде Фидания Баһаветдинова.
— Искиткеч матур концерт. Рәхәтләнеп ял иттек. Җырчыга чын күңелдән иҗат уңышлары телим. Бүген ул сәхнәне, тамашачы күңелен яулады, — дип кушылды Венера Каминская.
Илнур Фарадисовичның: “Яшәешем — сәхнәм, тәхетем, үз халкыма хезмәт итү — минем бәхетем”, — дигән сүзләре искә төште. Киләчәктә дә җырчы иҗаты, моңы, тавышы, хезмәте белән яраткан тамашачысын сөендереп яшәсен.
Гөлсинә ЗӘКИЕВА