Кадетлар. Кемнәр алар?

Кадетлар. Кемнәр алар?
Кадетлар тарихы ерак елларга алып китә. Россиядә беренче кадет корпусына 1732 елда Санкт–Петербургта нигез салына. Анда 13 тән 18 яшькә кадәр 300 кеше белем ала. 1917 елда кадет корпусларының саны 28 гә җитә. Ләкин Октябрь революциясеннән соң әлеге корпуслар ябыла, кабаттан Бөек Ватан сугышыннан соң гына торгызыла башлый.
Балаларны чын кадетлар итеп тәрбияләүдә районыбызда да күп көч куела. Районның җиде: Арчаның беренче, икенче, җиденче, Лесхоз, Шушмабаш урта мәктәпләрендә, бишенче гимназиядә, Яңа Кенәр лицеенда берничә ел кадет сыйныфлары эшләп килә. Әлеге сыйныфларда белем алучы укучылар дисциплиналы, яхшы физик әзерлекле, өлгер булулары белән аерылып тора, төрле ярышларда актив катнашып, призлы урыннар яулыйлар.
Шушы көннәрдә район мәгариф идарәсе һәм Бөтенроссия ирекле янгын сүндерү җәмгыятенең Арча районындагы бүлеге уздырган фестивальдә дә алар сәләтле булуларын күрсәтте. Фестивальдә Арчаның икенче, җиденче, Лесхоз мәктәпләренең һәм Арчаның бишенче гимназиясенең җиденче сыйныф укучылары көч сынашты.
Тантаналы линейка белән ачылган бәйрәм командаларның янгын куркынычсызлыгы буенча җитезлектә, өлгерлектә ярышулары белән дәвам итте. Шулай ук укучыларның белеме янгын куркынычсызлыгына бәйле сорауларга җавап бирүдә дә сыналды. Арада гади генә, хәтта күңелле, әмма җавабы четерекле сораулар да бар иде. Мәсәлән, элек ни өчен янгын сүндерүчеләр мыеклы булган? Ә җавабы хикмәтле: ул заманда озын мыек противогаз ролен үтәгән икән. Бөтенроссия ирекле янгын сүндерү җәмгыятенең Арча бүлеге рәисе Әмир Әмирфатов, инспектор Илшат Мәхмүтов, район мәгариф идарәсе методисты Айнур Ахунов составындагы жюри командаларны гадел хөкем итеп нәтиҗә ясый. Беренче урынны Арчаның икенче мәктәбе, икенче — Лесхоз мәктәбе, өченче урынны Арчаның җиденче мәктәбе яулады. Аларга дипломнар һәм истәлекле бүләкләр тапшырылды.
Быел Бөтенроссия ирекле янгын сүндерү җәмгыятенең оешуына 55 ел була. Җәмгыятьтә халык белән эшләүдә иң күп игътибарны балаларга юнәлтәләр һәм бүгенге рухтагы чаралар республика буйлап үткәрелә. Максат бер — балаларга яшьтән хәрби–патриотик тәрбия бирү. Фестивальгә килгән Бөтенроссия ирекле янгын сүндерү җәмгыятенең Татарстандагы бүлеге белгече Гүзәл Әүхәдиева сүзләренчә, узган атнада Чаллыда дәрес вакытында мәктәптә чыккан янгында укучыларның янгын куркынычсызлыгы кагыйдәләрен белүе файдага булган, шунлыктан зыян күрүчеләр юк. “Мәктәпләрдә кадет сыйныфлары булдыру, балаларны тормыштагы төрле хәлләргә әзерлекле итеп тәрбияләү көтелмәгән кыен хәлләрдә уңай нәтиҗәләр бирә”, — ди ул.
Бүген фестивальдә катнашкан укучыларны андый хәвеф–хәтәрләр читләтеп узсын, шулай да тормышта һәр өлкәдә хәбәрдар, әзерлекле булып яшәү беркемгә дә комачауламый. Бәлки берәрсенең күңелендә киләчәген шушы һөнәр белән бәйләү теләге дә яшидер. Ә бүгенге җиңүчеләр март аенда Казанда республика күләмендә көч сынашачак. Уңыш дигән тылсымлы көч һәрвакыт юлдаш булсын үзләренә.
Розалия ЗИННӘТОВА