Алар ярдәмгә әзер

Алар ярдәмгә әзер
Әңгәмәдәшебез — 107нче номерлы янгын часте, Арча янгын сагы гарнизоны җитәкчесе Мәсхүт Шәрәфиев.
— Мәсхүт Мифтахович, сезнең хезмәт өчен 2012 ел ничек үтте?
— Безнең хезмәткәрләр узган ел 45 тапкыр янгын сүндерүгә, 30 юл-транспорт һәлакәтенә чыктылар. Моннан тыш әле хуҗасыз корылмалар, чүп-чар, коры үлән яну, кыска ут ялганышы булу, тимер юлда электровоз яну турындагы хәбәрләр буенча чыгу оештырылды. Янгыннардан 2 млн. 200 мең сумнан артык зыян килде. Коткарылган милек 35 млн. сум исәпләнә. Янгыннарда һәм юл-транспорт һәлакәтләрендә 30 кешенең гомере саклап калынды.
— Элегрәк ялган хәбәрләр белән чакыручылар бар, дип зарлана идегез. Хәзер ничек?
— Әйе, булгалый иде андый хәлләр. Хәзерге техника ярдәмендә кемнең кайдан шалтыратуын бик тиз ачыклап була. “Шаярулар” бик кыйммәткә төшәргә мөмкин. Соңгы вакытта мондый күңелсезлекләр юк диярлек.
Шалтырату дигәннән, тегенди-мондый вакыйгага дучар булганда кәрәзле телефоннан 112 номерын (шалтырату бушлай) җыеп тиз арада безнең хезмәткә хәбәр итәргә кирәк. Болар — янгын, юл һәлакәте, ашыгыч ярдәм һ.б. булырга мөмкин. Безнең диспетчер хәбәрне кабул итеп ала, журналга терки, шуннан тиешле хезмәтләргә тапшыра. Дөнья булгач төрле хәл килеп чыга, безгә өйдә бикләнеп калганда да шалтыраталар, ярдәм итәбез инде.
— Техник яктан тәэмин ителеш турында да әйтеп үтсәгез иде.
— Әле менә шушы көннәрдә генә 17 метр биеклектәге баскычы булган янгын сүндерү машинасы кайтты. Өч тонна суы да булган мондый техника бик кирәк иде. Аларны шәһәрләргә генә бирәләр. Тагын 8 тонна сыйдырышлы бер “КамАЗ”ыбыз бар. Ул үзен бик яхшы яктан күрсәтте. Ике “ЗИЛ” егерме еллап хезмәт итә, бүген дә яңа кебек алар. Егетләр шундый сакчыл, тырыш безнең.
Яңа Кенәрдә, Сеҗедә, Үрнәктә ТР Гадәттән тыш хәлләр министрлыгының подразделениеләре ачылу да район иминлеген тәэмин итүгә зур өлеш булды.
Ильяс СӘХӘПОВ