Пенсионерлар канәгать булсын өчен

Пенсионерлар канәгать булсын өчен
Арча һәм Әтнә районнары буенча Пенсия фонды идарәсенең 2012 елга йомгак ясау һәм 2013 елга бурычлар куюга багышланган киңәшмә узды.
Пенсия фонды халыкка сыйфатлы хезмәт күрсәтү буенча илебездә мөһим урын алып торучы идарәләрнең берсе. Монда халык мәнфәгатьләрен кайгыртуга зур игътибар бирелә. Максатлары — пенсионерлар игътибарны тойсын һәм пенсия күләменнән канәгать калсын өчен тиз, төгәл һәм тырышлык белән эшләү.
Бүгенге көндә идарә тарафыннан 20000нән артык пенсионерга пенсия түләнә. Клиентларны кабул итүдә тоткарлыклар булмасын өчен тере чираттан тыш алдан чиратка язылу һәм телефон аша документларга заказ бирү, берникадәр мәгълүмат алу кебек хезмәтләр дә күрсәтелә. Узган ел районда хезмәт пенсиясенең күләме 7697 сум тәшкил иткән, Татарстан буенча ул 8733 сум. Пенсия күләмен билгеләгәндә төп исәпләнүчеләрнең берсе булып эш бирүченең пенсия фондына түләгән иминиятләү взнослары тора. Ләкин бу өлкәдә дә җитешсезлекләр бар: быелның 1 гыйнварына взнослар буенча бурыч 38 млн. сумны тәшкил итә. Түләмәүчеләр, нигездә, “Арча”, “Мәрҗани”, “Северный” ширкәтләре. Әлеге оешмаларның бурычы барлык бурычның 90 процентын тәшкил итә. Бу турыда Пенсия фонды идарәсе җитәкчесе урынбасары Флера Никашина билгеләп үтте.
“2012 ел взнос түләү буенча җиңел ел булмады, — диде район башкарма комитеты җитәкчесенең беренче урынбасары Рафил Исмәгыйлев. — Эре авыл хуҗалыгы оешмалары түләүне үзләре генә хәл итә алмый, холдинг компанияләрнең рөхсәте кирәк. Пенсионерларга килгәндә, районда алар өчен уңай шартлар тудырылган: хастаханә, социаль яклау идарәсе, тернәкләндерү үзәкләре, ветераннар советы уңышлы гына эшләп килә һәм пенсионерларга, ветераннарга кагылышлы программаларның үтәлеше буенча да нәтиҗәләр уңай”.
Пенсия фонды идарәсенең аерым кешеләр белән эшләү бүлеге эшчәнлеге белән Гөлназ Ибәтуллина, Әтнә районындагы эш барышы турында Гөлсинә Нәҗмиева таныштырды. “Татарстан поч-тасы”ның Арча районара бүлеге җитәкчесе урынбасары Гөлсинә Гатауллина үз оешмалары белән Пенсия фонды идарәсенең үзара хезмәттәшлеге, “Россия пенсионерлар союзы”ның Арча муниципаль районындагы җирле бүлекчәсе рәисе Сания Камалетдинова пенсионерларның яшәеше, башкарган эшләре турында хисап тотты.
Арча һәм Әтнә районнары буенча Пенсия фонды идарә-се республикада үрнәк, нәтиҗәле эшләүчеләр рәтендә. Бу турыда киңәшмәгә килгән Россия Пенсия фондының Татарстан Республикасы буенча бүлек җитәкчесе урынбасары Нина Татьянина йомгаклау чыгышында әйтеп үтте һәм быелга куелган бурычлар белән таныштырды. “Инвалидлар саны буенча сездә күрсәткечләр республика буенча иң югары. Ә шәхси эшмәкәрләрнең Пенсия фондына бурычлары булмау белән сез башкаларга үрнәк. Киләчәктә дә без халык белән тыгыз элемтәдә булып, һәр яңалыкны җиткереп эшләргә бурычлыбыз”, — дип тәмамлады ул чыгышын.
Бу айда пенсияләр артты. Димәк, Пенсия фонды идарәсендә эшләүчеләр яңадан эшкә күмелде. Ә пенсионерларга — сөенеч. Мондый сөенечләрнең ешрак булуын теләп яши алар...
Розалия ЗИННӘТОВА