Чаңгычылар узыша

Чаңгычылар узыша
10 февральдә бөтен ил буйлап “Россия чаңгы юлы–2013” ярышы үткәрелде. Арчада да ул көнне бу кышкы спорт төрен яратучы яше, карты, стадионга җыелып, чаңгы юлына басты.
— Минем әтием Ильяс бишенче гимназиядә физкультура укыта. Мин дүртенче сыйныфта укыйм. 5 яшьтән чаңгыда шуам. Быел әлеге илкүләм ярышта катнашырга булдым, — ди Алсу Абдрахманова.
Ә менә 64 яшьлек Руфина Гәрәева 35 ел Төбәк-Чокырча мәктәбендә укыткан һәм 35 ел спорт ярышларында катнашып, урыннар алып килгән. Соңгы елларда ул чаңгы спортын да үз иткән.
— Институтта укыганда да спорт белән шөгыльләндем. Кан басымым югары булса да, ярышларда катнашып, 1 урыннарны ала идем, — ди ветеран укытучы. — Аннан гомер буе җәяү йөрдем. Хәрәкәтләнүнең даруларга караганда файдалырак икәнен аңладым.
Әлеге ярышта да Руфина Гәрәева уңышлы чыгыш ясады, 50 яшьтән өлкәнрәкләр арасында өченче урынны алды.
— Үземнән күпкә яшьләр белән ярышка җибәрү дөрес үк түгел инде. Шулай да алардан калышмыйбыз әле, — ди Арчадан 74 яшьлек Ягъфәр Шәмиев. — Мин Буа районының Толымбай авылыннан. 7 спорт остасы гына чыккан аннан. 1963 елда Арчага килдем. Һәм шул вакыттан алып спорт дөньясында кайныйм. Картаерга исәп юк.
Бу көнне ярышларда Ягъфәр агадан тыш кызы, Иске Чүриле мәктәбе җитәкчесе Диләрә Гәрәева (җитәкчеләр арасында беренче урынны алды) һәм беренче сыйныфта укучы оныгы Алина да катнашты.
“Россия чаңгы юлы–2013” чаңгыда узышу ярышларының җиңүчеләре дә билгеләнде. 12 яшькә кадәргеләр арасында Шушмабаш мәктәбеннән Зөлфия Сабитова, Арчаның икенче мәктәбеннән Ренат Зыятдинов, 15 яшькә кадәрге малайлар һәм кызлар арасында “Олимп” балалар һәм яшүсмерләр спорт мәктәбендә тәрбияләнүче Илназ Ибәтуллин һәм бишенче гимназиядән Эльвира Ибраһимова, 18 яшькәчә егетләр һәм кызлар арасында бишенче гимназиядән Рөстәм Абдуллин һәм Арча педагогика көллиятеннән Дилә Кәлимуллина беренче урыннарны алдылар. Диләне һәр ярышта күзәтеп киләм. Ул спортның бу төренең чын остасына әверелеп бара. Ярыш саен пьедесталның югары баскычларына күтәрелүе моның бер билгесе. Киләчәктә спортчы кызга тагын да зуррак уңышлар телибез.
35 яшькә кадәрге ир-атлар һәм хатын-кызлар арасында да ярыш киеренке булды. Җиңүгә омтылу Урта Курсадан Резеда Хәбибуллинага һәм “Олимп” балалар һәм яшүсмерләр спорт мәктәбеннән Рәмис Хәйруллинга беренчелекне яуларга мөмкинлек бирде.
50 яшькә кадәргеләр арасында халыкны социаль яклау идарәсеннән Гүзәлия Вәлиева, Иске Кырлайдан Айрат Ситдыйков берәүне дә үзләреннән уздырмады. 50 яшьтән өлкәннәр дә ярышта бик теләп катнаштылар һәм бер дә яшьләрдән калышырга теләмәделәр. Беренче урыннар Арчаның икенче мәктәбеннән Гүзәлия Гыйниятовага, Яңа Кенәр лицее укытучысы Равил Әгъләмовка елмайды.
Җитәкчеләр дә узышты ул көнне. Хатын-кызлар арасында Диләрә Гәрәева финиш сызыгын беренче булып үтте. Ир-егетләр арасында Урта Курса мәктәбе директоры Фәнил Хәбибуллинга тиңнәр булмады.
Соңыннан барлык җиңүчеләргә яшьләр эшләре, спорт һәм туризм бүлегенең мактау грамоталары, бүләкләре тапшырылды. Бу көнне иң яшь катнашучылар да бүләксез калмады.
Гөлсинә ЗӘКИЕВА