Бүләк тырышларга бирелә

Бүләк тырышларга бирелә
15 февральдә “Татмедиа” акционерлык җәмгыятенең брифинглар залында 2013 елның беренче яртыеллыгына газета-журналларга язылу кампаниясе нәтиҗәләре буенча иң яхшы дип табылган хат ташучыларны бүләкләделәр.
Шуларның икесе безнең Арчадан булуы аеруча сөенечле. Бүген без шундый олы хөрмәткә лаек булган Арча почта бүлекчәсенең газета-журналларга яздыру буенча инженеры Рәсүлә Гафарова һәм “Арча–1” бүлекчәсе хат ташучысы Алсу Әхмәтшина белән очраштык. Рәсүлә 2001 елдан почтада. Башта инструктор, аннан инженер. Үз эшенең остасы, хезмәтен яратып, күңел биреп башкара, иренми, төрле идеяләр белән янып яши, оештыру сәләтен дә урынлы куллана. Аның һөнәре өчен иң кирәклесе — кеше белән аралаша, уртак тел таба белү.
— Рәсүлә Мансуровна, сез ел да газета-журналларга яздыру планын үтәп киләсез. Бүгенге чорда бу җайлы эш түгел. Ниндидер аерым, үзегезгә генә хас ысуллар кулланасызмы?
— Юк, һәр бүлекчә хезмәткәре, хат ташучы моны гадәти эш дип саный һәм үз участогындагы кешеләрне газета-журналларга яздыру буенча кулыннан килгәнен эшли.
2013 елның 1 гыйнварына безгә 36100 газета-журналга яздырырга план бирелде. Ул һәр почта бүлекчәсенә җиткерелде. Ә без аның үтәлешен даими контрольдә тоттык. Тырышалар хат ташучылар, халык белән уртак тел табалар, пенсионерларны өйдә дә яздыралар. Кемнедер аерып әйтү дөрес булмас, чөнки һәрберсе мактауга лаек. Шулай да Казанбаш, Наласа, Сеҗе, Курса-Почмак, “Арча–1” почта бүлекчәләре иң яхшылар рәтендә. План бик зур. Алай гына да үтәп бетереп булмый. Район хакимияте белән тыгыз элемтәдә торуыбыз да уңай тәэсир ясый. Хакимият бик булыша, укытучыларны, авыл җирлекләрен газета-журналларга яздыра. Бу бик зур ярдәм.
— Арчада үзәк почта бинасында Әбүнәче көне үткәрү дә матур традиция-гә әверелде. Аның да роле бардыр?
— Бар гына түгел, роле зур. Хәзер халык аны көтеп ала башлады. Чөнки бу көнне ташламалардан файдалану мөмкинлеге дә бар. Без дә реклама биреп, халыкны алдан искәртеп куябыз. Газета-журналлар редакцияләре белән элемтәгә кереп, хезмәткәрләрен әбүнәче көнендә катнашырга чакырабыз. “Арча хәбәрләре”, “Казанские ведомости” газеталары, “Сөембикә” журналларыннан хәзер безгә даими рәвештә киләләр, халык белән очрашалар, язылучыларга бүләкләр өләшәләр. “Акчарлак”, “Жизнь” газеталары редакцияләре вәкилләре дә бу мөмкинлекне ычкындырмаска тырыша. “Кәеф ничек” газетасы мөхәррире Илназ Сафиуллин үзе кайтып, концертка кадәр куйды, язылучылар арасында уен уйнатып, футболкалар, сувенирлар бүләк итте. “Газетный мир” нәшрияты Түбән Новгородтан кадәр кайтты. “Арча хәбәрләре” һәм “Ватаным Татарстан” газетасы редакциясе үз басмаларына иң күп яздырган почта бүлек-чәләре җитәкчеләрен билгеләп үтәргә дә онытмыйлар. Ә “Сөембикә” журналы үзенең 100 еллык юбилее уңаеннан премия әзерләгән, 2013 елның 1 яртыеллыгына 100 кешене “Сөембикә”гә яздырган хат ташучыга “Магия серебра” ширкәтенең көмеш зәркән эшләнмәләрен бүләк итә. 2012 елның гыйнварына бездә 157 кеше бу журналга язылган иде, быел ул 413кә җитте. Шуның 100енә яздырып, Алсу Әхмәтшина әлеге бүләккә лаек булды.
Алсу Раилевна Мөндеш-тән, Арчада кияүдә. Хат ташучы булып эшләүче апалары Айгөл һәм Лилия тәкъдиме белән 8 ел элек почтага килә. Ул Банк, Г.Камал, Маршал Жуков, Вагыйзовлар урамнарында хат ташучы. Һәр йорт, фатирда аны беләләр, өлкәннәр үз кызлары кебек кабул итәләр, серләрен сөйлиләр, кайгы-шатлыкларын уртаклашалар. Алсу һәрберсенә вакыт таба, сабыр гына тыңлый, хәлләрен сораша, соңга калмыйча пенсияләрен өләшә, газета-журналларга яздыра.
— Мин үз участогымдагы оешмаларга да йөрим. Башта каталог өләшеп чыгам, аннан яздырам. Әбүнәче көнендә барысы да эштән китә алмый бит, ташламалар югалмасын, дип ул көнне дә оешмаларны йөреп чыгарга тырышам. Кешеләр белән аралаша белергә кирәк инде монда. Кайвакыт нәрсәгә язылырга, дип үземнән киңәш сорыйлар. Шуңа вакытлы матбугат белән дә танышып барырга туры килә, — ди хат ташучы.
— Алсу, күбрәк кайсы газета-журналга бик теләп язылалар?
— Беренче чиратта үзебезнең район хәлләрен белергә кирәк, дип “Арча хәбәрләре”нә. Аннан “Акчарлак”, “Безнең гәҗит”, “Ирек мәйданы”, “Сөембикә”не бик теләп алдыралар. Банк урамы, 37 йорт, 7 фатирда яшәүче Рафаэль Нигъмәтҗанов ел да 15–16 төрле газета-журналга яздыра.
— Безнең хат ташучыларның һәрберсе үзләренә йөкләнгән эшне вакытында һәм төгәл башкара. Коллектив бик дус, тату, — ди почта бүлеге җитәкчесе Ирек Фәйзрахманов. — Алсуга да үз участогыннан бернинди шикаять килгәне юк. Рәсүлә дә Арча гына түгел, Әтнә районы белән дә эш итә. Тырышлыклары, эзләнүләре — җиңүгә илтүче юлларның берсе.
Көмештән эшләнгән зәркән эшләнмәләр кызларның үзләрен дә, хезмәтләрен дә бизәсен.
Гөлсинә ЗӘКИЕВА