Алар мәңге йөрәкләрдә

Алар мәңге йөрәкләрдә
Әфганстан сугышы күп гаиләгә кайгы-хәсрәт, авыр тойгылар, күз яшьләре алып килде. Еллар үткән саен күз яшьләре кипте, әмма күңелдәге җәрәхәт юкка чыкмады. Аеруча газиз балаларын югалткан ата-аналар йөрәгендә төзәлмәслек яра булып урын алды.
Быел Совет гаскәрләрен Әфганстан җиреннән чыгаруга 24 ел. Чирек гасырга якын. Бу елларда исән-сау кайтканнар арасыннан да инде күпләр вафат. Сугышчы-интернационалистларның батырлыкларын бүгенге буын яшьләре беләме? Бөек Ватан сугышы ветераннарын хөрмәтләгән кебек аларга да хөрмәт белән карыйлармы?
Бу көннәрдә әлеге датага багышлап район башкарма комитеты, район хәрби комиссариаты, сугышчы-интернационалистларның “Сугышчан туганлык” җәмәгать оешмасы тарафыннан күп чаралар оештырылды. 15 гыйнвар көнне бер төркем әфганчылар шәһәр үзәгендәге әфган җирендә һәлак булып калган якташларыбыз истәлегенә куелган һәйкәлгә чәчәкләр салдылар (рәсемдә).
ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов әфганчыларны Совет гаскәрләрен әфган җиреннән чыгаруга 24 ел тулу уңаеннан котлады.
— Бу көн үзе зур бәйрәм. Чөнки ул сезнең газапларыгыз, әти-әниләрнең күз яшьләре түгелүнең беткән көне, — диде ул. — Бүген һәр мәктәптә батырлык дәресләре үткәрелә. Анда әфганчылар, аларның ата-аналары чакырыла. Очрашуларда Әфган сугышы, Совет солдатларының, шәхсән үзегезнең батырлыгыгыз турында дөресен сөйләгез. Моны яшь буын белергә һәм сезнең үрнәктә тәрбияләнергә тиеш.
16 февральдә әлеге истәлекле дата уңаеннан һәм Кызыл Йолдыз Ордены кавалеры Илфат Зиннәтуллин истәлегенә багышлап, “Запорожец” машиналарында автоузыш үткәрелде.
— “ЗАЗ” машиналарында узышуны мин “Бәкер” шифаханәсендә күреп кайттым. Һәм үземнең Әфганстан кырында башын салган полкташларыма багышлап, шундый чара үткәрергә уйладым. Быел ул икенче тапкыр оештырыла. Илфат полкташым, Саба егете, — ди автоузышны үткәрүне тулысынча үз өстенә алган, үзе дә Әфганстанда хезмәт иткән “Заман” ширкәте җитәкчесе Илнур Яруллин.
Шунысы сөенечле, ярышта катнашырга килгән-нәрнең күбесе яшьләр. Димәк, яшь буын әфганчылар батырлыгы алдында баш ия, алар язмышын йөрәкләренә якын кабул итә. Шулай ук араларында әфганчылар үзләре дә — “Акчишмә” хуҗалыгы рәисе Газинур Сафин, “Арчалес” оешмасының баш инженеры Газинур Зиннәтуллин һәм әфганстанда хезмәт иткән Шакирҗанов крестьян-фермер хуҗалыгы җитәкчесе Дамир Шакирҗановның улы Надир катнашты.
Газинур Сафин шушы ярышларда көчен сынап карау өчен, Арчада таба алмагач, Теләчедән махсус “Запорожец” сатып алып кайткан.
Ә ярышлар шәп үтте. Күптән Биектауга автоузышлар карарга барырга хыяллана идем. Үзебездә дә кимен куймыйлар! Чын узыш булды. Ватылып та калдылар, әйләнделәр, бәрелделәр дә. Аллага шөкер, берәүгә дә зыян килмәде. Карарга килүчеләр дә күп иде. Ничек инде районда оештырылган шундый кызыклы чарага күз йомарга мөмкин?!
Автоузышта беренче урынны икенче тапкыр 11 ел “Арча нефть продуктлары” җәмгыятендә шофер булып эшләүче Дамир Маликов алды, икенче урында шулай ук икенче ел рәттән “Заман” ширкәтеннән Мурат Ибраһимов, өченче урынны “Арча нефть продуктлары” җәмгыя-теннән Рөстәм Шакиров яулады.
— Узган ел “Бәкер” шифаханәсендә ял итеп кайткан идем инде, — ди Дамир. — Шулай да быел көндәшләрем көчле иде. Узышу узган елга караганда авыррак та, шул ук вакытта кызыклырак та булды.
Дамирга бүләккә — тагын “Бәкер”гә юллама. Икенче, өченче урындагыларга кубоклар, бүләкләр, шулай ук һәр катнашучыга истәлекле бүләкләр тапшырылды. Илнур Яруллин Илфат Зиннәтуллинның әти-әнисенә дә бүләк — кер юу машинасы әзерләгән иде.
Мәктәп укучылары арасында үткәрелгән биатлон буенча катнаш эстафета да 15 февраль — әфганчы-интернационалистларны искә алу көненә багышланды. 8 мәктәп катнашты. Беренче — Лесхоз мәктәбе командасы, икенче — Түбән Мәтәскә мәктәбе укучылары, өченче — наласалылар, дүртенче — Ашытбаш биатлончылары. Аларга да Илнур Яруллин бүләкләрен тапшырды.
Гөлсинә ЗИННӘТОВА