Ышанычлы адымнар белән

Ышанычлы адымнар белән
22 февральдә икенче чакырылыш район Советының чираттагы XXVI утырышы булды. Аны муниципаль район башлыгы, район Советы рәисе Алмас Назиров ачты һәм алып барды.
Утырышта Татарстан Республикасы Дәүләт Советы Рәисе Фәрит Мөхәммәтшин катнашты.
Муниципаль район башлыгы, район Советы рәисе Алмас Назиров көн тәртибендәге “Арча муниципаль районының 2012 елга социаль-икътисадый үсеше һәм 2013 елга бурычлары турында” чыгыш ясады.
– Бүген район Советы утырышының көн тәртибенә куелган мәсьәлә чынбарлыкта депутатларның, оешма җитәкчеләренең, коллективларның еллык хисабы, – диде ул. – Чөнки без бүген район күрсәткечләрендә аларның һәрберсенең эшен бәялибез.
Алмас Әминович үзенең чыгышында һәр тармак буенча ирешелгән уңышларны билгеләп үтте. Булган мөмкинлекләрне тулырак файдаланганда аларның тагын да зуррак булачагын ассызыклады. Кайда гына булмасын, кадрлар белән эшләү, аларның теләкләрен, фикерләрен искә алу, кешенең кадерен белү, аңа тиешле эш һәм яшәү шартлары тәэмин итү, хезмәт хакларын вакытында түләү аеруча мөһим.
Районда шәхси хуҗалыкларга ташламалы кредитлар бирү, гаилә фермалары төзү һ.б. дәүләт программаларын тормышка ашыру буенча актив эш алып барыла. Авылларда үткәрелгән сорашып белешүләрдә кешеләрнең 61 проценты шәхси хуҗалыкларын зурайтырга, терлек санын арттырырга теләвен белдерде. “Безнең бурыч – шул кешеләргә төрле яктан булышу”, – диде докладчы.
Киләчәктә дә шәхси торак төзелешенә һәрьяклап ярдәм күрсәтеләчәк, социаль ипотека һ.б. программаларда актив катнашу, тузган торакта яшәүче 432 гаиләне яңа торакка күчерү бурыч итеп куела.
Доклад буенча фикер алышуларда катнашкан Иске Кырлай авыл җирлеге башлыгы Фәргать Сираҗетдинов, Арча зона электр элемтәсе үзәге җитәкчесе Рөстәм Гомәров, “Ак Барс-агро” ширкәте башкарма директоры Шәйдулла Сәлахов үз коллективларының эшчәнлеге, киләчәккә планнары турында сөйләделәр.
Татарстан Республикасы Дәүләт Советы Рәисе Фәрит Мөхәммәтшин үзенең чыгышында арчалыларның тырыш хезмәтен югары бәяләде:
– Хисап чыгышы тирән эчтәлекле, мәгънәле, анализлы, мәгълүматларга бай булды, – диде ул. – 2012 елда Арча районы күп юнәлешләрдә алга таба тагын бер адым ясады, дип әйтә алабыз. Булган үзгәрешләрне сукыр гына күрмәскә мөмкин. Килгән саен нинди дә булса уңай, яхшы яңалыкка тап буласың. Менә бүген Арча шәһәренә Балтач ягыннан килеп кердек. Матур яңа йортлар, биналар. Арчага кайсы яктан килсәң дә шулай.
Фәрит Мөхәммәтшин узган ел республикада 2 млн. 400 мең квадрат метр торак төзелүен әйтеп үтте. Иң яхшы дигән елларда да ул 1,5 млн. квадрат метрдан артмаган. Бөек Ватан сугышы ветераннарын фатирлар белән тәэмин итү программасын тормышка ашыру зур вакыйга булды.
–Әлеге мәсьәләдә сез зирәгрәк булып чыктыгыз, – диде Дәүләт Советы Рәисе. – Ветераннарыгыз үзләре белгән, теләгән җирдән, гомер иткән урыннан еракка аерылмыйча фатирлы булдылар. Шул ук вакытта торак фондын да яңарттыгыз. Сездә яңа йортлардан тулы урамнар барлыкка килде, дип әйттеләр. Монысы өчен дә зур рәхмәт!
Фәрит Мөхәммәтшин шул ук вакытта арчалыларның мөмкинлекләре тагын да зуррак икәнлеген искәртеп үтте. Итне иң тиз җитештерү юлы булган дуңгызчылыкны яңадан торгызу турында уйларга, җирле бюджетка районның үз акчасын күбрәк кертү юлларын эзләргә тәкъдим итте.
ТР Дәүләт Советы Рәисе республикада узган ел булган, сагайтырга мәҗ-бүр итә торган вакыйгаларга тукталды. Аерым көчләр дин исеме белән үзләренең мәкерле максатларын тормышка ашырырга маташа, эш хәтта дин әһелләренә һөҗүм оештыруга барып җитте. Соңгы елларда мәчетләр күп төзелде, әмма муллалар әзерләүгә тиешле игътибар бирелмәде. Дини оешмалар республикадагы тотрыклылыкны тәэмин итүгә үз өлешләрен кертергә бурычлы.
Ильяс ФӘТТАХОВ