ЯҢАЛЫКЛАР

ЯҢАЛЫКЛАР
27 ФЕВРАЛЬДӘ РАЙОН ХУҖАЛЫКЛАРЫНДА бер сыердан уртача 12,3 килограмм сөт савылды. Бу узган елның шул көнендәгедән 1,5 килограммга артык.

“АК БАРС–АГРО” ШИРКӘТЕНДӘ уртача савым — 24, “Кырлай”да 23,1 килограмм. Иң аз савым “Арча” ширкәтендә — 6 килограмм гына.

БЕР КӨНДӘ ТУЛАЙ САВЫМ 150708 килограмм тәшкил итте. Бу узган елгыдан 18819 килограммга күбрәк.

РАЙОН БУЕНЧА бер көндә бер сыердан 10,8 килограмм сөт сатылды. Товарлылык — 87 процент. Иң түбән товарлылык “Союз–агро” ширкәтендә — 70 процент.

ШӘХСИ ХУҖАЛЫКЛАР бер көндә 36715 килограмм сөт сатты.
Февральдә 1245 бозау алынды. Узган ел бу айда 1524 иде.

ЕЛ БАШЫННАН кырларга 35250 тонна органик ашлама чыгарылды.

РАЙОНДА ПРЕДПРИЯТИЕ, УЧРЕЖДЕНИЕ ҺӘМ ОЕШМАЛАР АРАСЫНДА хезмәтне саклау буенча бәйге узды. Ул эш урынында яхшы шартлар тудыру һәм хезмәт куркынычсызлыгын булдыру максатыннан оештырылды. Әлеге бәйгедә “Татарстан” агрофирмасы” җиңеп чыкты. Икенче урында – Арча үзәк хастаханәсе, өченче урында – “Северный” агрофирмасы”.

Якташыбыз, “Тулгак”, “Газзәбану” әсәрләре авторы, тәнкыйтьче Гөлчәчәк Галиевага 85 яшь тулу уңаеннан Арча китапханәсендә “Бәхетлеме кеше дөньяда?” дигән әдәби кичә үткәрелде. Анда китапханә каршында эшләп килгән “Яшәү яме” клубы ветераннары, шәһәр мәктәпләренең татар теле укытучылары, икенче мәктәпнең 10 сыйныф укучылары катнашты. Китапханә хезмәткәрләре кичәне җырлар белән тулыландырдылар. Тамашачылар фикер алышуларда актив катнаштылар, “Бәхетлеме кеше дөньяда?” дигән сорауга җавап эзләделәр.

“Россия кубогы” дип аталган VIII Халыкара балалар–яшьләр иҗаты һәм педагогик инновацияләр фестивалендә Арча сәнгать мәктәбе укучылары, укытучылары да катнаштылар һәм уңышларга ирештеләр. Иван Артемьев (укытучысы Нияз Миңнемуллин) эшләре икенче һәм өченче урыннарга лаек булды. Укытучы Райлә Фәтхуллина өченче урынны яулады.

15 март — Бөтендөнья кулланучылар хокукларын яклау көне. Шул уңайдан ТР Дәүләт алкоголь инспекциясе Арча территориаль органының эчке базарны координацияләү һәм үстерү бүлеге белгечләре ай дәвамында базарларда кулланучыларга аңлатулар, авылларга чыгып, халык белән очрашулар, кулланучыларга акция, семинарлар үткәрәчәкләр.

Түбән Мәтәскә урта мәктәбендә Ватанны саклаучылар көненә багышланган күчмә кубокка авыл яшьләре арасында волейбол ярышлары узды. Ул 2009 елдан бирле үткәрелә, аның шарты буенча, өч ел рәттән беренче урын алган команда кубокны бөтенләйгә үзендә калдыра. Алдагы ике елда җиңүгә Айван яшьләре волейболчылары ирешкән иде, быел да алар беренче урында. Күчмә кубок хәзер аларда. Икенче урында Түбән Мәтәскә, өченчедә – ЗУЭС яшьләре.

Чистайда 1997–1998 елгы яшүсмерләр арасында бокс буенча Татарстан Республикасы беренчелеге булып үтте. Арчаның икенче мәктәбеннән Илмир Нуруллин — икенче, Илнур Хәлиуллин өченче урыннарны алдылар (тренерлары — Марат Галиев). Егетләр хәзер Идел буе Федераль округы беренчелегендә көч сынашачак.