Уртак көч белән

Уртак көч белән
Сарай–Чокырча фермасы – “Курса МТС”ы ширкәтенең горурлыгы. Күрсәткече белән генә түгел, тырыш савымчылары, терлекчеләре белән дә мактаулы коллектив бу.
Фермага килеп керү белән иң беренче булып яшьләрнең күп булуы күзгә чалынды. Кемнәрдер: “Егетләр һәм кызлар авылдан китә. Фермага эшкә килергә кеше юк”, – дип зарланганда, Сарай–Чокырча фермасы коллективының яшәрә баруы сокланырлык түгелмени?!
– Әйе, бездә савымчылар бар да 30–40 яшьләрдә. Иң олысы Гөлнар Галиевага да 50 яшьләр тирәсе генә, – ди хуҗалыкның баш зоотехнигы Рафил Абдуллин. – Арчага терәлеп торсак та, бәхет эзләп читкә китәргә теләүчеләр аз. Чөнки хезмәт хакы әйбәт. Мәсәлән, декабрь – гыйнварда сыер савучының иң аз хезмәт хакы 14660, иң күбе – 29860 сум булган. Сөт арттырган һәм сыер чисталыгы өчен кызыксындыру чаралары каралган. Бозау караучыларга да кызыксындыру чарасы бар. Үсеш 600 граммнан артса, 800 – 1500 сум премия бирелә. Аннан, авылга кайтып терлекчелектә эшләргә теләге булганнарга хуҗалык өй салып бирә. Шундый дүрт йорт бар инде. Быел җәй Заһриевлар гаиләсе кайтып урнашты. Радик – терлекче, Илмира сыер сава. Яшьләр программасы буенча йорт төзеп чыгып, авылда төп-ләнеп калган гаиләләр дә бар.
Сарай–Чокырча фермасы хәзерге вакытта хуҗалыкта алдынгы урында бара. Биредә 300 баш сыер, 160 баш яшь бозау һәм симертү үгезләре исәпләнә. Җиде савымчы эшли. Бүген көнлек савым 17,5 килограмм. Ә Ризәлә Гафурова бу күрсәткечне 25 килограммга җиткергән.
Ул мәктәпне тәмамлау белән фермага килә, башта савымчы, аннан ферма мөдире була һәм менә яңадан үз теләге белән сыер саварга алына. Шушы көннәрдә Ризәләгә 30 яшь тулды. Аны чын күңелдән туган көне белән котлыйбыз, яңадан–яңа җиңүләргә ирешүен телибез.
Алия Мөхәрләмова да күптән фермада. Бу авылга Биектау районының Чыпчык авылыннан килен булып төшкән. Йорт салып чыкканнар, ике бала үстерәләр. Хезмәттә дә югары күрсәткечләргә ирешә Алия. Ел да алдынгы урыннарда бара. Узган ел хуҗалык буенча беренче урынга чыккан һәм телевизор белән бүләкләнгән.
Бозау караучылар Галина Вәлиева белән Хәмсәнә Рамазанова турында да җитәкчеләр мактап сөйлә-деләр. Алар 688 грамм артым алуга ирешкәннәр. Ә терлекче Фәнис Хөснетдинов үгезләр тәрбияли, бер килограмм артым аның өчен чик түгел. Чөнки Фәнис авырлыктан курыкмый, хезмәтен намус белән башкара.
– Шушы кечерәк кенә коллективны Гаделҗан Миннеханов җитәкли, – ди Рафил Абдуллин. – Ферма мөдире булып ике ел гына эшли, әмма шушы кыска гына вакыт эчендә чын коллектив туплый алды. Һәркем биредә бер–берсе белән ярдәмләшеп, киңәшләшеп эшли. Югары күрсәткечләр дә уртак көч һәм тырыш хезмәт нәтиҗәсе.
Биредә һәркем үз хезмәтен төгәл һәм яхшы белә. Ветеринария табибы, ясалма орлыкландыручы Илнур Әхмәтҗановны гына алыйк. Башта көтү көтә, сыер сава, бозаулар карый ул. Шулай тәҗрибә туплап, ясалма орлыкландыручы, ветеринария фельдшеры һөнәрләрен үзләштерә. Коллективның уңышларга ирешүендә аның да өлеше зур.
Мөдәррис Саматовка да коллективта олы ихтирам белән карыйлар. Ферма мөдиренең уң кулы ул. Лаеклы ялда булса да, чакырып кына торалар үзен. “Мөдәррис абый турында язарга онытмагыз. Алтын куллы кеше ул. Слесарь да, эретеп ябыштыручы да, электрик та. Әллә ничә төрле эшне берүзе алып бара”, – ди ферма мөдире.
Әйе, чыннан да, нәрсәгә тотынмасын, ут уйната икән хезмәт ветераны. Кулы бел-мәгән нәрсә юк. Капка–коймалар да ясый, электр моторлары да чорный, балта эшенә дә оста.
Рафис Гафуров та сыната торганнардан түгел. Елның-ел буе эштә ул. Җәен “Полесье” тракторы белән яшел масса әзерли, сенаж сала, кышын Сарай–Чокырча фермасында тирес түгә. Ферма яннарын, авыл эчләрен кардан да чистарта.
Бердәм коллективта һәркем мактау сүзлә-ренә лаек. Чөнки уңыш уртак тырышлык таләп итә. Терлекчеләр Рафис Әмиров, Наил Вәлиев, Рамил Хәйретдиновлар вакытында азык кертәләр, операторлар Раил Вәлиев, Фәнис Гаффаров тирес чыгаралар, лаборант Мәдинә Га-ләветдинова исәп–хисап алып бара, склад мөдире Лилия Хуҗиәхмәтова азык җибәрә, Алик Низамиев тегермән тарта. Киләчәктә дә коллективка уңышлар телибез. Алдынгылыкны яулау өчен күп көч, ә аны кулдан ычкындырмый саклау өчен икеләтә тырышлык кирәк.
Гөлсинә ЗӘКИЕВА