Тир түгеп алган җиңү

Тир түгеп алган җиңү
Соңгы елларда тынгысыз, авыр, сабырлык таләп итә торган укытучы хезмәтенең хөкүмәт тарафыннан бәяләнә башлавы шатлыклы күренеш. Укытучылар төрле бәйгеләрдә катнашып җиңүләргә ирешәләр.
Талантлы, үз эшенә бирелгән укытучыларның тәҗрибәләрен үрнәк итеп башкалар белән уртаклашу өчен менә дигән форсат бу. Шундый бәйгеләрнең берсе, профессиональ осталыкны билгеләүче – “Ел укытучысы” бәйгесе. Әлеге бәйгегә мәктәп укытучылары ел буе әзерләнеп көтеп ала.
Быелгы “Ел укытучысы – 2013” бәйгесенең муниципаль этабына 15 укытучы үз эшен тәкъдим иткән, ә жюри тарафыннан яшь буынны тәрбияләүдә нәтиҗә-ләргә ирешкән 6сы сайлап алынган. Иске Чүриле мәктәбенең тарих укытучысы Рамил Гарифуллин, Арчаның 1нче мәктәбе рус теле һәм әдәбияты укытучысы Диләрә Гаптелбәрова, Лесхоз мәктәбенең башлангыч сыйныфлар укытучысы Тәнзилә Шәймәрданова, Ашытбаш мәктәбенең татар теле һәм әдәбияты укытучысы Миләүшә Әүхәдиева, Арчаның 2нче мәктәбе математика укытучысы Айсылу Мөхәммәтгалиева, Яңа Кырлай мәктәбенең математика һәм информатика укытучысы Илнар Ганиев “Ел укытучысы – 2013” исемен яулау өчен көч сынашты. Аларның һәрберсе тәҗрибәле, хезмәт стажына ия, гомерләрен яраткан эшләренә багышлаган шәхесләр.
Укытучы – рухи–иҗади, сәнгатькәр шәхес. Әнә шул сәләтләрен укытучылар үз хезмәтләрен тәкъдир итү, класс сәгатен үзенчәлекле итеп үткәрү бәйгеләрендә, жюри әгъзалары белән түгәрәк өстәл артында сәясәт темасына кагылышлы сорауларга җавап итеп фикерләрен белдергәндә ачык чагылдырдылар. Яхшы укытучы булу өчен үз фәнеңне генә тирәнтен белү җитми, тормышта башка өлкәләрдән дә хәбәрдар булып, күп мәгълүмат туплау сорала.
Укытучы үзе укыткан балалары янәшәсендә генә чын укытучы була ала. Балаларның һәр сулышын тоеп яши ул. Үзләренә карата игътибардан балалар да ихтирамсыз калмый, билгеле. Бүген дә укытучылары өчен “җан атарга”, аңа көч биреп, кирәк чакта ярдәм итәргә укучылары да килгән. Үзе белем биргән укучыларының чын кеше булып үсүләре, аларның уңышлары турында ишетү укытучы өчен зур бәхет. Бергәләп тотынганда җиңүләргә ирешеп була!
Өченче дәрәҗәдәге лауреат исемен Айсылу Мөхәммәтгалиева яулады. Икенче урында – Миләүшә Әүхәдиева. Район данын республика дәрәҗәсендә якларга беренче урынны алган Рамил Гарифуллин барачак. Бәйгедә катнашучы һәркемгә дипломнар һәм истәлекле бүләкләр тапшырылды. Ә Рамил Гарифуллин май аенда теплоходка сәяхәткә юллама белән бүләкләнде. Тарих укытучысының белем офыкларын тагын да киңәйтү өчен менә дигән мөмкинлек!
Укытучы хезмәте авыр булса да, нәтиҗәсе сөенечле. Әнә, район мәгариф идарәсе җитәкчесе Рина Бәдриева: “Безгә шундый искиткеч күңелле минутлар бүләк иткәнегез, тырыш хезмәтегез өчен рәхмәт сезгә”, – дисә, жюри рәисе, мәгариф учреждениеләре профсоюз оешмасы советы рәисе Вакыйф Харисов: “Сезнең шушы бәйгедә катнашырга җөрьәт итүегез үзе җиңү”, – дип бәяләп торганда күңелдә яңа җиңүләргә ышаныч, өмет туа, әлбәттә.
Розалия ЗИННӘТОВА