Гүзәл затларыбыз киңәшләшә

Гүзәл затларыбыз киңәшләшә
Хатын–кызлар хәрәкәтен көчәйтү, ныгыту максатыннан авыл җирлекләрендәге хатын–кызлар советлары җитәкчеләре белән очрашып сөйләшү, башкарган эшләре белән танышу, проблемалары белән уртаклашу, үзара киңәшләшү һәм, әлбәттә инде, 8 Март — Халыкара хатын–кызлар бәйрәме уңаеннан гүзәл затларыбыз өчен төрле чаралар үткәрү буенча фикер алышу күркәм традициягә әверелде. Быел шундый очрашу Арча үзәк китапханәсендә оештырылды (рәсемдә).
Аны Арча район Советы башкарма комитеты җитәкчесе урынбасары Надия Мифтахетдинова алып барды. Иң беренче булып ул Казанбашта хатын–кызлар советын җитәкли башлавына быел 30 елын тутырган Мәдхия Зарипованы хөрмәтләп, аңа бүләк тапшырды.
Үзе өчен түгел, кешеләр өчен борчыла ул. Авыл халкы турында гына кайгыртып калмый, Арча өлкәннәр һәм инвалидлар интернат–йортына яшелчә, җиләк–җимеш җыеп алып килә, концертлар оештыра. Авылдашлары да Мәдхия апаны ихтирам итә һәм ярдәм кулы сузарга әзер тора.
Район хатын–кызлар советы җитәкчесе Фрадия Шәймуллина районда хатын–кызларыбызның роле, дәрәҗәсе турында сөйләде, советның башкарган эшләре белән таныштырды.
— Районда 51808 кеше яшәсә, шуның 53 проценты, ягъни 27405е хатын–кызлар. 30754 хезмәт яшендәге кеше булса, 14 меңнән артыгы тагын гүзәл затларыбыз. Мәгариф, мәдәният, сәламәтлек, халыкны социаль яклау өлкәсендә эшләүчеләрнең 80 проценты хатын–кызлар, — диде Фрадия Самиулловна үзенең чыгышында. — Араларында мактаулы исемнәргә лаек булганнары, югары дәрәҗәләргә ирешкәннәре, җитәкче урыннарны биләгәннәре, шәхси эшмәкәрлек белән шөгыльләнгәннәре дә бар. Бәйрәм чараларында нәкъ менә шушы кадерле затларыбызны, бигрәк тә аларга тормыш бүләк иткән аналарыбызны олыларга кирәк.
Арча һәм Әтнә районнары буенча Пенсия фонды идарәсе җитәкчесе урынбасары Флера Никашина пенсия өлкәсендә булган яңалыклар белән таныштырды. Авыл җирлекләре хатын–кызлар советлары рәисләре дә түгәрәк өстәл артында үз уңышлары, проблемалары, планнары белән уртаклаштылар. Мәрхәмәтлек үзәге җитәкчесе Руфия Баһаветдинова башкарган эшләре белән таныштырды. “Районда 680 күп балалы, 32 социаль яктан имин булмаган гаиләләр, 521 ялгыз ана, 226 инвалид бала бар. Даими урыннарга чыгып алар белән очрашабыз, балалар, әти–әниләр өчен төрле чаралар оештырабыз”, — диде ул.
Соңыннан Надия Мифтахетдинова, нәтиҗә ясап, урыннардагы проблемалар белән таныш булуы, район хакимиятенең аларны хәл итү өчен максатчан эш алып баруы турында сөйләде, авыл җирлекләрендәге хатын–кызлар советлары җитәкчеләренең бурычлары белән таныштырды, үзәктә тәрбия мәсьәләсе булырга тиешлегенә басым ясап әйтте.
Гөлсинә ЗӘКИЕВА