Истә калырлык көн

Истә калырлык көн
2 мартта Арча филиалында “Татавтодор” акционерлык җәмгыяте филиаллары хезмәткәрләренең һөнәри осталыгына конкурс үткәрелде.
Җәмгыятьнең ун филиалы командалары ярышларга әзер. Жюри рәисе шартларны аңлатканнан соң жирәбә салына, кемнең кем артыннан ярышасы билгеләнә. Беренче карашка, йөк төяүченең эше бик гади кебек — чүмеч белән вак ташны “чүмереп” аласың да, үзбушаткычның кузовына китереп саласың. Әмма бәйге шартлары катгый: иң югары баллны алу өчен йөк 18 тонна (машина шуның кадәр йөк күтәрә) булырга тиеш! Шул ук вакытта таш читкә түгелмәсен дә!
“Автомобиль краны машинисты–стропальщик” номинациясе бәйгесендә һәр командадан өчәр кеше катнашты. Монда инде блокны тиз арада дөрес итеп эләктереп, машинист тиешле урынга күчереп куйгач тиз генә ычкындырырга кирәк. Оста, тиз эшлиләр, хәрәкәтләренә күз иярерлек түгел.
Электр һәм газ белән эретеп ябыштыручылар бәйгесен дә карап торуы кызык. Ярышучыларның үзләре өчен бик кызу мизгелләр. Алар калын калайдан күрсәтелгән фигураны ясарга тиеш. Монда вакыт та, почмакларның турылыгы да, җөйләрнең тигез һәм өзлексез булуы, ничә электрод тотылуы да исәпкә алына.
Командалар белән бергә җанатарлар да шактый килгән иде. Алар ярышларны карап кына калмады, ә кышны озату бәйрәмендә дә катнашты. Өлкәннәр өчен дә, балалар өчен дә төрле конкурслар, уеннар оештырылды. Һәркем үзен тәңкәгә бизәк төшерү, җәядән атучы, тире остасы ролендә сынап карый ала иде. Шунда ук бизәлгән җигүле атлар йөреп торды, кайнар чәй, каймак белән коймак, халык җырлары күңелләрне җылытты.
Соңыннан җиңүчеләргә медальләр, кубок тапшырдылар. Арча филиалы коллективы исеменә рәхмәт сүзләре күп әйтелде, алар, чыннан да, ярышлар әйбәт үтсен, һәркем канәгать калсын өчен барын да эшләгән иде.
Ильяс СӘХӘПОВ