Сорау-җавап

Сорау-җавап
40 ел стажның әһәмияте бармы
“Мин заводта 38 ел эшләп пенсиягә чыктым. 2,5 ел ял иттем дә, тагын үз эшемә кайттым. Хәзер минем 40 ел стажым бар. 40 ел стажга пенсия артамы икән? Ял иткән елларым стажга өзеклек бирде. Моның 40 ел стаж өчен зыяны юкмы? Г.Сибгатуллина”.
Арча һәм Әтнә районнары буенча Пенсия фонды идарәсе җитәкчесе урынбасары Флера Никашина җавап бирә:
— Дөрестән дә, пенсия өчен стажның әһәмияте бар. Ә менә стаж өзелгәнме юкмы, бу әлегә мөһим түгел. Стаж 40 ел булгач, пенсиягә махсус өстәмәләр исәпләнми. Яңа Федераль закон көтелә, ул вакытта намус белән озак еллар эшләгән, зур стажлы пенсионерларга аерым өстәмәләр булуы ихтимал.

“Мин күп еллар инде кибетче булып эшлим. Минем статистика буенча “2002 елда Бөтенроссия күләмендә халыкны исәпкә алуда актив катнашкан өчен” дигән Россия Федерациясенең Дәүләт күкрәк билгесе бар. Бу күкрәк билгесенең “Хезмәт ветераны исемен алу өчен көче бармы”? Р.Миңнуллина”.
Район социаль яклау бүлегенең әйдәп баручы белгеч-эксперты Рафаэль Хәйруллин җавап бирә:
— Бу очракта “Хезмәт ветераны” исемен алу өчен статистика оешмасында штатта торганда, ягъни дәүләт статистика оешмасында эшләгәндә бүләкләнү әһәмиятле. Хат авторы статистика оешмасында эшләмәгәнлектән, “2002 елда Бөтенроссия күләмендә халыкны исәпкә алуда актив катнашканы өчен” дигән Россия Федерациясенең Дәүләт күкрәк билгесе белән бүләкләнсә дә, “Хезмәт ветераны” исемен ала алмый.
Бу сорауга тулырак җавапны газетабызның 27 гыйнвар саныннан да укып була.