Яз ишек кага

Яз ишек кага
12 мартта Татарстан Республикасы Премьер–министры урынбасары, авыл хуҗалыгы һәм азык–төлек министры Марат Әхмәтов республикада язгы кыр эшләренә әзерлекнең барышына багышланган матбугат конференциясе үткәрде.
2013 елда республиканың чәчүлекләр мәйданы 2 млн. 900 мең гектар тәшкил итәр дип фаразлана. Шуның 1 млн. 600 мең гектары бөртекле һәм бөртекле–кузаклы, 300 мең гектары — техник, 1 млн. гектары азык культуралары.
Көздән 532 мең гектарда уҗым культуралары (2012 елда 616,7 мең гектар иде), шул исәптән 240 мең гектар бодай, 280 мең гектар арыш, 120 мең гектар тритикале чәчеп калдырылды. Февраль ахырында уздырылган тикшерүләр уҗымнарның яхшы һәм канәгатьләнерлек хәлдә булуын күрсәтте. Шикәр 18–25 процент арасында.
Республика буенча 388 мең тонна бөртекле һәм бөртекле–кузаклы культуралар орлыклары кирәк. Тәэмин ителеш — 105 процент, 99 процент орлыклар кондицияле.
10 мартка трактор паркының — 88, чәчү һәм туфрак эшкәртү машиналарының 95 проценты әзер. Күп районнарда чәчкечләр һәм культиваторлар әзерләнеп бетү алдында.
Быел язын 12 мең трактор, 2887 чәчү агрегаты, 505 чәчү комплексы эшләячәк. Алар тәүлеккә 130 мең гектар эш башкара ала, бу чәчүне билгеләнгән агротехник срокларда башкару мөмкинлеге бирә.
Язгы кыр эшләрен оешкан төстә һәм сыйфатлы итеп башкару максатларында Авыл хуҗалыгы һәм азык–төлек министрлыгы каршында штаб төзелде. Анда атна саен техника ремонты, ягулык–майлау материаллары һәм ашламалар сатып алу, банк кредитлары алу мәсьәләләре карала. Урыннарда белгечләр һәм механизаторларны укыту, эш планнары төзү һәм кабул итү оештырыла.
Марат Әхмәтов журналистларның сорауларына да җавап бирде.
Безнең районда быел 55 мең гектарда — бөртекле, 5 мең гектарда — техник, 1 мең гектарда — бәрәңге, 180 гектарда — яшелчә, 46,8 мең гектарда азык культуралары игеләчәк. Көзен 19700 гектар арыш, 2751 гектар бодай, 117 гектар тритикале чәчелде. Белгечләр аларның бүгенге көндәге торышыннан канәгать, шикәр — нормада.
Язгы кыр эшләрендә 600 трактор, 23 чәчү комплексы, 93 чәчү агрегатлары эшләячәк. “Ак Барс–агро”, “Кырлай”, “Аю”, “Ватан”, “Игенче”, “Курса МТСы”, “Татарстан”, “Акчишмә”, “Северный” хуҗалыкларында чәчү агрегатлары культиваторлар, тырмалар тулысынча әзер диярлек. Соңгы вакытта “Арча” ширкәтендә дә ремонт эшләрен кызулатып җибәрделәр.
Ашламалар кайтарту буенча да җанлану сизелә.