Үзгәрешләр уңай якка

Үзгәрешләр уңай якка
9 мартта ТР Хөкүмәт Йортында республика Президенты Рөстәм Миңнеханов катнашында үткән киңәшмәдә төзелеш, архитектура һәм торак–коммуналь хуҗалыгы министры Ирек Фәйзуллин быел 595,3 мең кв.м торак файдалануга тапшырылуын хәбәр итте.
Бу еллык заданиенең 25 процентын тәшкил итә. Татарстан Республикасы, гыйнварда 381,1 мең кв.м торак тапшырып, Идел буе федераль округында беренче урынны алган.
Татарстан Республикасы Премьер–министры урынбасары, авыл хуҗалыгы һәм азык–төлек министры Марат Әхмәтов үзенең чыгышында терлекчелектә үсеш күзәтелүен билгеләп үтте. Ул әлеге тармакта ике айлык эшкә йомгак ясады. узган ел белән чагыштырганда ит җитештерү 9 процентка арткан.
Терлекләрнең баш санына килгәндә, сыерлар 3 процентка артык, бозаулар 5 процентка күбрәк алынган.
Ә менә сөт җитештерү 3 проценттан кимегән, узган елга караганда 6 мең тонна сөт азрак савылган. Нигездә, бу “Вамин–Татарстан”, “Красный Восток” булган районнарга туры килә.
Муниципаль район башлыгы Алмас Назиров, киңәшмәне дәвам итеп, көн тәртибендәге мәсьәләләргә тукталды, бурычлар куйды.
Район авыл хуҗалыгы һәм азык–төлек идарәсе җитәкчесе Айдар Габбасов терлекчелектәге ике айлык нәтиҗәләргә анализ ясады. Ике айда 84641 центнер сөт савылды. Бу узган елның шул чорындагыга карата 100,5 процент тәшкил итә. “Ватан”, “Ак Барс–агро”, “Мәрҗани” хуҗалыкларында үсеш 122,5–114,7 процент, “Арча”, “Акчишмә” ширкәтләрендә былтыргы күләмнең 65,8–76,4 проценты кадәр генә сөт җитештерелде.
Гаилә фермаларының җитештерү күләмнәрен арттыра барулары куанычлы хәл. Д.Сабиров, Р.Мәрданов, Д.Шакирҗановның гаилә фермалары аеруча әйбәт үсешкә иреште.
“Ак Барс–агро”, “Кырлай”, “Курса МТСы” хуҗалыкларында ике айда уртача бер сыердан 1408–1016 килограмм сөт савылды. Иң түбән күрсәткеч “Арча” ширкәтендә — 363 килограмм гына.
“Ватан”, “Ак Барс–агро”, “Курса МТСы” ширкәтләрендә ит җитештерү артты. “Арча”, “Акчишмә” ширкәтләрендә узган елның шул чорына карата 50,5–62,9 процент кына тәшкил итте.
Быел ике айда 3103 бозау алынды, узган ел бу чорда 3135 иде. “Северный” хуҗалыгында үсеш — 156, “Кырлай”да —135,6, “Аю”да 131,5 процент.
Район буенча терлекләрнең баш саны узган елның шул чорына карата бераз артты (100,1 процент). “Северный”, “Ватан” хуҗалыкларында үсеш 103 проценттан артык. “Акчишмә”, “Арча” ширкәтләрендә терлекләрнең баш санын шактый киметүгә юл куйдылар.
Муниципаль район башлыгы Алмас Назиров терлекчелек тармагына, аеруча сөт җитештерүгә игътибарны арттыруны таләп итте. Көндәлек акча кертә торган бердән-бер чыганак бу. Сөтне югары сыйфатлы итеп сату аеруча отышлы. Сыйфатка көндәлек анализ ясап, ни өчен югары сортка туры килмәвенең сәбәпләрен ачыкларга һәм аларны төзәтү өстендә эшләргә.
Алмас Әминович Арча сөт комбинатының да бу мәсьәләләрдә мөһим урын тотарга тиешлеген әйтеп үтте. Заманында күпме кешегә эш урыны булдырган, район бюджетына лаеклы өлеш керткән оешмага күләгәдән чыгарга вакыт.
Район башлыгы үткәргән киңәшмәләрнең берсендә кайбер хуҗалык җитәкчеләре сөтне югары сортлы итеп сата алмауның сәбәбен сыерларда мастит авыруы булу белән аңлатканнар иде. Максатчан эш алып барганда маститны гына түгел, хәтта лейкоз авыруын да җиңеп була.
Элеккеге “Күлтәс” ширкәте, хәзерге А.В.Сафиуллинның крестьян–фермер хуҗалыгында лейкоз авыруыннан котылу өчен бөтен сыерларны алыштырдылар. “Быел ике айда 60 процентка якын сөтне югары сортлы итеп саттык”,— ди башкаручы директор Васил Габделхаков.
Быел көтүгә үзләрендә үстерелгән тагын 40тан артык тана кертеләчәк. Күрсәткечләр дә үсеш ягында, бер сыердан уртача савым 15 килограммга якын. Ике айда мөгезле эре терлекләрдән уртача 823 грамм үсеш алынган. Сыерлар чиста, терлекчеләр канәгать, хезмәт хакларын вакытында алып баралар.
Ильяс ФӘТТАХОВ
Рәсемдә: Сафиуллин крестьян–фермер хуҗалыгының тәҗрибәле сыер савучылары Ания Хәсәнова (сулдан уңга), Әлфия Сибгатуллина, Марат Галәветдинов