Китап патшалыгында кунакта

Китап патшалыгында кунакта
Арча үзәкләштерелгән китапханәләр системасының балалар белән эшләү бүлегендә “Балалар китапханәсендә электрон технологияләр куллану” дигән темага республика семинары узды.
Семинарны нәкъ менә безнең районда үткәрү юкка түгел, чөнки районның балалар бүлеге республикада беренче өлге китапханә буларак дан тота. Өстәвенә, 2011 елда Мәдәният министрлыгы тарафыннан “Татарстан Республикасында китапханәләр эшен 2009–2014 елларда һәм 2020 елга кадәр җәелдерү өчен төзелгән максатчан программа” кысаларында Тукайның 125 еллыгы уңаеннан районның 30 авыл китапханәсенә һәм үзәк китапханә белән балалар китапханәсенә 4,5 млн. сумлык яңа җиһазлар, компьютерлар кайтартылган иде. “Бүгенге көндә китапханә күтәрелеш чоры кичерә, — ди директор Лилия Фазылова. — Министрлык һәм район хакимияте ярдәме белән матди–техник базабыз көннән–көн баеп, китап фондларыбыз даими тулыланып тора.
Семинарда республика китапханәләренең 40тан артык китапханәчесе Арча районы башкарма комитеты җитәкчесе урынбасары Надия Мифтахетдинова һәм республика балалар китапханәсе директоры Разия Сираеваның чыгышларын тыңладылар, презентацияләр, практик дәресләр карап тәҗрибә уртаклаштылар. Республика балалар китапханә-се китапханәчеләре Евгения Шемелова һәм Ирина Сергеева электрон технологияләр ярдәмендә китап уку, Интернет–ресурслар каталогын тәкъдир итү (бу проект Россия дәүләт балалар китапханәсе һәм Билайн челтәре белән бергә эшләнгән) темаларына укулар оештырды, аннан “Россия Астрид Линдгрен”, “Менә шундый ул Шүрәле” электрон проектлары тәкъдир ителде.
Районыбыз китапханәчеләре замана белән бергә атлап, даими рәвештә яңа инновацион технологияләр үзләштерәләр. Шуның дәлиле — үзәк китапханәнең балалар бүлеге мөдире Алсу Рәхимбаева семинарда катнашучыларга электрон басмаларны эшләү тәҗрибәсе белән уртаклашты һәм Разия Сираева ярдәмендә эшләнгән, әкиятләр остасы Абдулла Алишка багышланган виртуаль күргәзмә тәкъдим итте. Әлеге күргәзмәнең эш алымы тәҗрибәсен һәр китапханәче үзләрендә кулланырга дип алып китте. “Киләчәктә электрон виртуаль китап күргәзмәсе һәр китапханәне яулап алачак”, — ди Ирина Сергеева. Димәк, китапханәләрнең укучылары да артачак. Лилия Фазылова әйтүенчә, соңгы вакытта балаларның китапханәгә йөрүе ешайган. “Буш вакытларын китапханәдә үткәрергә тырышалар. Чөнки алар биредә төрле чараларда катнашалар, яңа китаплар белән танышалар, интерактив такта, зур экранда кинофильмнар, мультфильмнар, хәтта махсус күзлекләр киеп 3D фильмнар карау мөмкинлеге бар. Балаларга гына түгел, өлкәннәргә хезмәт күрсәтү бүлегендә дә шундый шартлар тудырылды. Без компьютерларны конкурент итеп түгел, ә дус һәм ярдәмче итеп кулланабыз”, — дип таныштыра директор.
Виртуаль китап күргәзмәсе электрон челтәрне яулап алгач, Арчада торып илнең теләсә кайсы китапханәсендәге күргәзмәне күрергә мөмкин булачак. Димәк, көнләп кенә түгел, сәгатьләп алга барган замана технологияләре тагын әллә нинди алгарышлары белән шаккатырасын көт тә тор.
Розалия ЗИННӘТОВА