Яңа йортта

Яңа йортта
Әкияттәге шикелле күз алдында калкып чыга йортлар. Арчаның үзәк Зур урамын ямьсезләп торган тәмам тузган берничә фатирлы йорт (№ 9) әле генә бар иде, бер көнне зур тракторлар килде дә, сүтеп, яңасын эшләргә дә тотындылар. “Энергосервис” ширкәте (җитәкчесе Рамил Әхмәтгалиев) егетләре эше. Бүген инде аннан, нинди матур йорт, дип сокланып үтәсең!
Элеккеге Геологическая, хәзерге Зәйнуллин урамын бөтенләй танып булмый. Иске бараклы, шыксыз, караңгы урам иде ул. Ә анда бүген берсеннән- берсе матур яңа йортлар тезелеп киткән. Әйтерсең лә, “Кояш” шәһәрчеге!
Күзгә күренеп Арчабыз матурлана. Күңелгә ямансу тойгылар белән бергә шом салып торган бараклар урынына яңа йортлар калкып чыга. Россия Федерациясенең “Торак-коммуналь хуҗалыкны үзгәртеп коруга ярдәм итү Фонды турында”гы 185нче закон нигезендә төзелгән тузган торактан халыкны күчерү буенча адреслы программа районда уңышлы гына эшләп килә. Арча муниципаль район башлыгы Алмас Назиров программаның үтәлешенә җитди игътибар бирә. 2011 елда 15 фатирлы бер йорт салынды. Анда 3 тузган баракта яшәгәннәр күчерелде. 2012 елда 14 фатирлы бер йорт сафка басты. Бүген анда 4 күп фатирлы йортта гомер иткәннәр яши. Быел тузган бараклардан халыкны күчерү максатыннан яңа йортлар тагын да күбрәк төзеләчәк. Шунысы куанычлы: тәмам тузып беткән йортларда яшәүчеләрне нәкъ менә яңа төзелгән йортларга күчерәләр!
Зур урамының 9а, М.Җәлил урамының 6а күп фатирлы йортлары әллә каян үзләренә җәлеп итеп тора, аларның чиста, иркен подъездларын күреп исең китә. Иске өйдән яңага күчү үзе зур шатлык бит ул! Әнә, М.Җәлил урамының 6а йортында яшәүче Вәсвикамал Минһаҗева сөенеп бетә алмый, район җитәкчелегенә, Аллага шөкер, дип рәхмәт укый. “Божада 37 ел 6 фатирлы баракта яшәдек”,— дип сөйли ул. Ире Илдус (мәрхүм) белән 6 бала тәрбияләп үстергәннәр. Терлекчелектә эшләп, пенсиягә чыккан. “Икенче кышымны чыгам яңа фатирда”,— ди. Бер бүлмәле булса да, фатир бик иркен. Зал яп-якты, тәрәзә төбендә гөлләр чәчәк атып утыра. Кухня да иркен, балкон үзе бер веранда шикелле, чыгып һава сулыйсыңмы, артык әйбереңне куясыңмы—ихтыярың. Чисталык хөкем сөрә. Педагогика көллиятендә укучы оныгы Раилә үз янында, ул булыша. 14 мартта 88 яшен тутырды Вәсвикамал апа. Шушы яңа фатирда исән-имин балаларының игелеген күреп яшәргә язсын әле аңа!
Зур урамының 9а йортында яшәүче Йосыповлар Галактионов урамындагы 36нчы күп фатирлы баракта гомер иткәннәр. “24 ел яшәдек без анда,— дип сөйли Гүзәл ханым.—Иптәшем Фәрит “коммунальный”да эшләгәндә бирделәр. Бүген ул төзелештә эшли, үзем—спорт комплексында, бассейнда. Өч кыз үстердек. Олысына 24 яшь, уртанчысына 23 тула быел, кечкенәсе 1нче сыйныфта укый. Узган елның сентябрендә тузган торактан халыкны күчерү программасы нигезендә яңа фатир бирделәр. Яңа фатирга күчүгә уртанчы кызыбызга никах укыттык. Аллага шөкер, кышны чыгып киләбез. Быел менә икебезгә дә 50 яшь тулачак, бергә яши башлавыбызга—25 ел. Яңа фатирга кунак килсә дә күңелле бит ул. Шәһәрнең нәкъ үзәгендә яшәве үзе ни тора?! Балконнан, әнә, балык күлләре, су буйлары, болыннары ничек матур булып күренеп тора.”
Гүзәл ханым чәчәкләр үстерергә ярата. Тәрәзә төбендә берсеннән-берсе матур гөлләр чәчәк атып утыра. Бүгенге тормышыннан канәгать ул. Кесәңнән акча чыгармыйча, өр-яңа йорттан фатир алу ул үзе зур бәхет. “Адреслы программа нигезендә йорт бәясенең 30 процентын Федераль Фонд күтәрә, 70 процентын—республика бюджеты”,— дип аңлата торак-коммуналь хуҗалыгы, энергетика һәм элемтә секторы мөдире Илфат Рәхимов. Программаның халык өчен эшләве бик әйбәт, моннан файдаланып калырга кирәк.
Румия НАДРШИНА