Яңалыклар

Яңалыклар
2013 ЕЛНЫҢ 6 МАРТЫНДА Россия Федерациясе Хөкүмәте Рәисе Дмитрий Медведев имзалаган карар белән Татарстан Республикасының Арча районындагы Корайван авылының русча атамасы Курайван авылы дип үзгәртелде.

ЯШЬЛӘРНЕ ХӘРБИ–ПАТРИОТИК РУХТА ТӘРБИЯЛӘҮ, физик культура һәм спортны үстерү, сәламәтлекне ныгыту, егетләрне хәрби хезмәткә әзерләү сыйфатын күтәрү максатында районда “Россия патриотларын үстерәбез” дигән бәйге үткәрелә. Ул ике зонада була. 14 мартта 5нче гимназиядә Арча зонасына кергән мәктәпләр укучылары көч сынашты. Анда 8 мәктәп командасы катнашты. Гимназия егетләре — беренче, 1нче мәктәп укучылары — икенче, 2нче мәктәп командасы өченче урынны алды. Арчада һәм 18 мартта Яңа Кенәр лицеенда шул зона мәктәпләре арасындагы ярышта беренче һәм икенче урыннарны алган командалар 22 мартта “Арча” спорткомплексында финал ярышларында катнашачак.

18 МАРТТА Арчаның 1 нче урта мәктәбе актлар залында район оешма, предприятиеләре җитәкчеләре һәм белгечләренең хезмәтне саклау мәсьәләләре буенча укулары була. 9 сәгатьтә башлана.

Элеккеге хезмәттәшебез, редакциядә озак еллар баш хисапчы булып эшләгән Шәмсенур апа Сибгатуллина шалтыратты.
— Шатлыгым белән уртаклашам әле, сөенечемнән төне буе йоклый алмадым, — ди. — 8 Март безгә икеләтә бәйрәм булды. Армиядәге оныгым Рәшитнең командиры аның бик яхшы хезмәт итүе турында хат җибәргән, рәхмәт әйткән. Бик куаныштык.
Рәшитнең хезмәт срогы майда тула икән. Исән–имин әйләнеп кайтырга язсын үзенә!

Мәскәү өлкәсенең Чехов шәһәрендә олимпия чемпионы Александр Поветкин призына бокс турниры үтте. Анда Россия шәһәрләреннән иң көчле 150 боксчы катнашты. Казан безнең Арча шәһәреннән турнирга 4 боксчыны тәкъдим итте. Алар: Гөлүсә Галиева, Азамат Галиев, Тимур Сафиуллин, Илнур Хөсәенов. Дәрәҗәле турнирда безнекеләр лаеклы чыгыш ясадылар. Аларны тренер Марат Галиев әзерләде. Котлыйбыз! Турнирда дөнья боксында дан казанган Александр Поветкин, Денис Лебедев, ирләр җыелма командасының баш тренеры олимпия чемпионы Александр Лебзяк та бар иде.