Балигъ булмаганнар хокуклары сагында

Балигъ булмаганнар хокуклары сагында
15 мартта Арча муниципаль районының балигъ булмаганнар эшләре һәм аларның хокукларын яклау буенча комиссия утырышы узды. Аны район башкарма комитеты җитәкчесе урынбасары Надия Мифтахетдинова алып барды. Комиссия эшендә прокуратура, хокук саклау органнары, массакүләм мәгълүмат чаралары вәкилләре катнашты.
Полициянең балигъ булмаганнар белән эшләү төркеме өлкән инспекторы Алсу Һидиятуллина чыгышыннан күренгәнчә, агымдагы елда яшүсмерләр тарафыннан җинаятьләр кылынмаган. Хәзерге вакытта 22 имин булмаган гаиләдә тәрбияләнүче 13 бала район эчке эшләр бүлегендә исәптә тора. Аларның күбесе җәмәгать урыннарында тәртип бозган яки кеше милкен урлап тотылган. Комиссия әгъзалары полиция хезмәткәрләренә укытучылар коллективы, психологлар белән берлектә мәктәпләрдә аңлату эшләрен киңрәк җәелдерергә, комиссия утырышларын урыннарга чыгып үткәрергә тәкъдим иттеләр.
Кызганычка каршы, балигъ булмаганнарның төнге сәгатьләрдә җәмә-гать урыннарында йөрүен тыйган 71нче канун әлегә төгәл үтәлми. Узган ике айда үткәрелгән 11 рейд барышында 14 тәртип бозу очрагы теркәлгән, 10 ата–анага балаларын контрольдә тотмаган өчен 500 сум штраф салынган, дүртесенә кисәтү ясалган. Бу уңайдан утырышта мәдәният учреждениеләре хезмәткәрләренең дә җаваплылыгын арттыру, клубларда тыелган вакытта яшүсмерләрнең йөрүенә юл куймаска кирәклеге искәртелде. Надия Равилевна исә рейдларны ешрак үткәрергә чакырды. “Аңлату эшләрен бик күп алып бардык, хәзер инде чара күрергә кирәк”, — диде ул.
ЮХИДИ җитәкчесе Габделхак Касыймов балигъ булмаганнар катнашында юл фаҗигаләренең сәбәпләре, аларны кисәтү өчен башкарылган эшләр турында чыгыш ясады. Узган ел район юлларында 1 бала һәлак булган, дүртесе төрле тән җәрәхәтләре алган. “Балалар катнашындагы юл һәлакәтләренең күбесе — машиналарда махсус креслолар урнаштырмау яки куркынычсызлык каешларын эләктермәү нәтиҗәсе. Узган ел без шундый 388 кагыйдә бозу очрагын ачыкладык. Бу турыда массакүләм мәгълүмат чараларында, мәктәпләрдәге очрашулар барышында да гел кисәтеп киләбез. Катгый чаралар күрмичә булмас, мөгаен”, — диде баш инспектор.
Комиссиядә шулай ук махсус урта уку йортларында балигъ булмаганнар белән тәрбия эшенең торышы, җәмәгать тәрбиячеләренең эш тәҗрибәсе, яшүсмерләр арасында үз–үзләренә кул салуны кисәтү, балаларга карата көч куллану очракларын булдырмау мәсьәләләре дә каралды.
Утырышта катнашучылар яшүсмерләр проблемаларын тирәнрәк өйрәнү максатында укучылар арасында һәр мәктәптә сораштыру уздыру, тәрбиягә авыр бирелүчеләр белән индивидуаль эш алып бару, аларны җәмәгать эшләренә киңрәк җәлеп итү буенча тәкъдимнәрен җиткерде.
Исрафил НАСЫЙБУЛЛИН