Яңалыклар

20 МАРТТА ТР мәгариф һәм фән министры Энгель Фәттахов эшлекле сәфәр белән Арча районында булды. Аны муниципаль район башлыгы Алмас Назиров каршы алды һәм озатып йөрде.
Министр Арчаның 2,3нче мәктәпләрендә, педагогика көллиятендә укыту–тәрбия эшләренең барышы белән танышты.

ЯҢА КЕНӘР “Өмет” тернәкләндерү үзәгендә арчалылар гына түгел, Балтач, Әтнә, Саба, Кукмара, Чүпрәле һәм башка районнардан да ял итәргә, сәламәтлекләрен ныгытырга киләләр. Биредә ял итүчеләргә иң әһәмиятлесе—үзара аралашу. Ир-тәне физик күнегүләрдән, файдалы боткадан башлап, көнне кызыклы мәдәни чаралар белән дәвам итү аларның күңеленә бигрәк тә хуш килә.

“ГРИПП ҮТТЕ”,— ди район үзәк хастаханәсе поликлиникасы мөдире Лилия Фәйзрахманова. Әмма салкын тиюнең төрле вирус, инфекцияләре йөри әле. Хәер, алар җәен дә бетми. Иң мөһиме: сакланырга һәм иммунитетны ныгытырга. Саф һавада йөрергә, лимон, җиләк-җимеш, яшелчә ашарга киңәш ителә. Авырсаң, кичекмәстән табибка барырга кирәк.

27 МАРТТА 17 сәгатьтә “Казан” милли–мәдәни үзәгендә “Арча” якташлык җәмгыятенең очрашу кичәсе була.

Кәче мәдәният йортында күңел ачу чаралары еш булып тора. Күптән түгел генә биредә үзешчәнннәр бик матур концертлар оештырганнар. Берсе сугышта һәлак булган авылдашларны искә алу, хәзерге вакытта армиядә хезмәт итүче һәм инде хезмәт итеп кайткан егетләр хөрмәтенә булса, икенчесе аларны көтеп алган, хатлар язып аралашып торган газиз әниләр һәм сөйгәннәренә багышланган. Бу хакта безгә хезмәт ветераны Хәмсәнә Бариева хәбәр итте.

Пенсияне дәүләт тарафыннан финанслау Программасы 2009 елның 1 гыйнварыннан эшли башлады. Ул вакытта Арча һәм Әтнә районнары буенча Пенсия фонды хезмәткәрләре коллективларда моның нәрсә икәнен аңлатып йөрделәр. Теләгән кешеләр шунда ук Программага керәм, дип гариза яздылар. Аның асылы шунда: бер елга хезмәт пенсиясенең тупланма өлешенә кимендә 2 мең сум һәм иң күбе 12 мең сум акча күчерсәң, дәүләт ул сумманы икеләтә арттыра. 10 ел буе әлеге мөмкинлектән файдаланып була. Үзенең пенсиясен кайгыртучылар бу яңалыкны ишетүгә, гариза язып, акча күчерә башладылар. Шуны искәртеп үтәбез: әлеге Программадан 2013 елның 1 октябренә кадәр гариза язганнар гына файдалана ала. Иң мөһиме: ул акчалар икеләтә артып, кире үзеңә кайта.

Язгы каникуллар башлану белән балалар катнашында юл–транспорт һәлакәтләренең саны да арта. 2013 елның ике аенда гына да Татарстанда 56 авария булды, аларда бер бала үлеп, 58 бала яраланган. Юл аркылы чыгу кагыйдәләрен ешрак 7–14 яшьтәге балалар боза. Шуның нәтиҗәсендә кул–аяклары, умыртка сөякләре сынган һәм башка тән җәрәхәтләре алучылар аз түгел. Шуңа язгы каникул чорында юлларда ЮХИДИ хезмәткәрләре тарафыннан контроль көчәйтелгән. Профилактик чаралар үткәрүдән тыш, юл хәрәкәте кагыйдәләрен санга сукмаган яшь җәяүлеләр дә, балалар учреждениеләре янында хәрәкәт тизлеге режимын бозган, җәяүлеләргә өстенлек бирмәгән, балаларны йөртү өчен махсус җайланмалар, куркынычсызлык каешлары кулланмаган машина йөртүчеләр игътибар үзәгендә булачак. Бу хакта безгә ЮХИДИнең Арча бүлекчәсе дәүләт инспекторы, полициянең өлкән лейтенанты Альберт Сабиров җиткерде. Балалар, юлларда сак булыгыз, үзегезне саклагыз.

Биектауда 1997–1998 елгы егетләр арасында милли көрәш буенча Республика беренчелеге узды. Наласадан Рәнис Шәмсетдинов – икенче, Фаяз Зарипов бишенче урыннарны алдылар. Тренерлары – Таһир Лотфуллин.

Арча стадионында Гани Сафиуллин истәлегенә чаңгы марафоны булды. Рәмис Хәйруллин, Тимур Муллахмәтов, Ләйсән Дәүләтбаева, Таңсылу Шиһапова, Ландыш Гыйләҗиева җиңүчеләр булдылар.

Казанда гер спорты буенча Республика чемпионаты һәм беренчелеге үткәрелде. Үз үлчәү категорияләрендә Лилия Хисмәтова, Фаил Һадиев, Искәндәр Шәехов – беренче, Фәнис Хәбибуллин, Динар Зәйнуллин – икенче, Мөдәррис Мөхәммәдиев өченче урыннарны яуладылар. Арча командасы өченче булды.