Санаулы көннәр калды

Санаулы көннәр калды
Чыгарылыш сыйныф укучыларының һәм әти–әниләрнең төн йокыларын алган Бердәм дәүләт имтиханнары башланырга санаулы көннәр калып бара.
Быел имтиханнарны районда 329 укучы тапшырачак. Рус теле һәм математика фәннәре буенча сынау Арчаның 5нче гимназиясендә һәм 1нче мәктәбендә, ә калган сайлап алу фәннәре буенча 5нче гимназиядә узачак. Быел Бердәм дәүләт имтиханнарын тапшыру тәртибенә бераз гына үзгәрешләр кергән. Шул уңайдан без район мәгариф идарәсенең мәгълүмати–методик үзәк методисты Гәүһәрия Галимуллина белән сөйләштек.
— Укучыларны классларга утырту тәртибен ел саен аңлатуга карамастан, безгә бик еш: “Безнең балаларны бер класска утыртып булмыймы?” — дигән сорау белән мөрәҗәгать итәләр. Шунлыктан, әлеге сорауга ачыклык кертүне кирәк дип саныйм. Һәр имтиханда Казанның төрле югары уку йортыннан, Мәгариф һәм фән министрлыгыннан вәкилләр катнаша. Укучының кайсы кабинетка, кайсы партага утырасын махсус программа нигезендә компьютер бүлә. Компьютер безгә 3 төрле исемлек әзерли. Берсендә кайсы кабинетка кемнәр эләккәне күрсәтелә. Бу исемлекнең бер нөсхәсе класс бүлмәсе ишегенә эленә, икенчесе шул кабинетта эшләячәк оештыручыга бирелә һәм ул исемлек белән укучылар янына чыгып үз кабинетына язылган балаларны җыя. Икенче исемлек һәр мәктәп өчен аерым чыга, анда бу мәктәпнең һәр укучысы кайсы кабинетка эләгүе күрсәтелә һәм бер данәсе шушы мәктәптән балаларны алып килгән укытучы кулына тапшырыла. Өченче исемлектә оештыручылар турында мәгълүмат була, ягъни кабинетта оештыручы булып эшләүче укытучыларны да шул ук программа нигезендә компьютер бүлә.
Быелгы үзгәрешләр, нигездә, имтихан вакытының дәвамлылыгына кагыла. Санитар–эпидемиологик таләпләр буенча рус теленнән имтиханга 30 минут вакыт өстәлә (элек ул 3 сәгать иде, хәзер, 3 сәгать 30 минут булачак), ә моңарчы 4 сәгать булган башка фәннәрдән имтихан вакыты 5 минутка кыскарачак. Имтихан вакытында быел кәрәзле телефоннар эшләмәскә дә мөмкин, чөнки Мәгариф һәм фән министрлыгы тарафыннан пунктларда телефоннарны блокировкалау җайланмалары урнаштыру планлаштырыла. Шулай ук кабинетларга видеокамералар куелачак.
Сәламәтлеге чикләнгән чыгарылыш сыйныф укучылары БДИ бирү формасын үзләре сайларга хаклы. Теләсәләр, БДИны башка укучылар кебек бирә алалар, алар өчен тиешле шартлар тудырыла, ягъни, шәфкать туташы янәшәдә булачак һәм 90 минут вакыт та өстәлә. Әгәр дәүләт чыгарылыш имтиханнары (ГВЭ) формасын сайласалар, аерым пунктта традицион формада бирәләр. Ләкин бу очракта әлеге имтихан нәтиҗәсе белән югары уку йортларына керә алмыйлар, ул бары аттестат алу мөмкинлеге генә бирә.
Чыгарылыш сыйныф укучысы булган гаиләләр өчен мәшәкатьле, киеренке чор башлана. Шуны истә тотып, чыгарылыш сыйныф укучылары һәм әти–әниләр сезгә берничә киңәш белән мөрәҗәгать итәбез. Гаиләдәге атмосфера укучының имтиханга әзерләнү һәм аны уңышлы тапшыруның төп факторы булып тора. Шуңа күрә әти–әниләр балаларның халәтен аңлап, аларга тискәре уй–кичерешләрдән арынырга ярдәм итәргә тиешләр. Балаларыгызның эшчәнлеген һәрдаим уңай бәяләгез, аларга карата игътибарлы булыгыз, имтиханга әзерләнү өчен уңай мохит тудырырга тырышыгыз.
Розалия ЗИННӘТОВА