Республика конференциясе

Республика конференциясе
20 мартта Арчаның 2нче урта мәктәбендә ТР Мәгариф һәм фән, ТР экология һәм табигый ресурслар министрлыклары, мәгариф идарәсе, “Татарстан–Яңа гасыр” республика иҗтимагый хәрәкәте ярдәме белән Татарстан Республикасында экологик культура һәм әйләнә–тирәне саклау елына багышланган “Кеше һәм табигать” дип аталган фәнни–гамәли конференция узды.
Конференцияне мәктәп директоры Гөлнара Гарипова ачты. Аннан сүз “Татарстан–Яңа гасыр” республика иҗтимагый хәрәкәтенең политсовет әгъзасы Эльмира Ошинага, “Ашыт” дәүләт табигый–комплекс тыюлыгының табигатьне саклау буенча дәүләт инспекторы Рәшит Әхмәтҗановка, ТР Экология һәм табигый ресурслар министрлыгының Төньяк территориаль идарәсе җитәкчесе Радик Шаһиәхмәтовка, мәгариф идарәсе җитәкчесе урынбасары Әлфирә Гыйсмәтуллинага бирелде. Һәр чыгыш ясаучы республикада экологик проблемаларга игътибарны арттыру, табигатьне саклау буенча чараларның кирәклеген билгеләп үтте. Конференциянең Халык-ара Җир көнендә үтүе табигатьне сакларга кирәклеген искәртү булып тора.
Конференция эшчәнлеге түбәндәге юнәлешләрдә алып барылды: “Экология”, “География”, “Татар әдәбияты”, “Рус әдәбияты”, “Биология”, “Химия”, “Җәмгыять белеме”, “Рәсем сәнгате һәм хезмәт”. Анда Әтнә, Биектау, Кукмара, Саба, Теләче һәм Арча районнарыннан икенче этапка узган 86 укучы катнашты. Эшләрне дәрәҗәле жюри тикшерде. Жюри составында фән кандидатлары, ТР Экология һәм табигый ресурслар министрлыгының Төньяк территориаль идарәсе хезмәткәрләре һәм учреждение җитәкчеләре бар иде.
Экологиягә бернинди дә катнашы булмаган рус һәм татар әдәбияты секциясендә шөгыльләнүче укучыларның эшләрендә язучыларның экологик проблемаларына карата мөнәсәбәтен күрсәтеп кенә калмыйча, әсәр геройларының табигатькә мөнәсәбәтен XXI гасыр кешесе белән чагыштырып каравы да кызыклы иде.
Һәр эш эчтәлекле һәм кызыклы, тик һәр бәйгенең җиңүчеләре була. Безнең район мәктәпләре укучылары 18 призлы урын яулады. 1 урынга Айгөл Ахунова (2нче мәктәп, татар әдәбияты), Нияз Фәхриев (Лесхоз мәктәбе, география), Йолдыз Мингалимова (2нче мәктәп, җәмгыять белеме), Ландыш Хәлиуллина (Лесхоз, экология), Гөлназ Хәсәнова һәм Флүзә Шәяхмәтова (Шушмабаш, биология) лаек булдылар. Икенче урында Ландыш Зәйнуллина (2нче мәктәп, татар әдәбияты), Булат Гыймадиев (2нче мәктәп, рус әдәбияты), Диләрә Мәрданова һәм Энҗе Гыйззәтова (1нче мәктәп, география), Әмир Фәйзрахманов (1нче мәктәп, биология), Елена Чаптарова (2нче мәктәп, химия). Өченче урында Гадилә Шәфигуллина, Чулпан Мөхәммәтдинова, Айзилә Каюмова (5нче гимназия, Ашытбаш һәм Яңа Кырлай мәктәпләре, татар әдәбияты), Камилә Сибгатуллина (1нче мәктәп, рус әдәбияты), Әнис Шәйдуллин (1нче мәктәп, җәмгыять белеме), Алинә Галиуллина (1нче мәктәп, экология), Динара Илдусова (2нче мәктәп, биология), Раилә Мифтахова (2нче мәктәп, хезмәт).
Язмамны жюри әгъзасы, педагогика фәннәре кандидаты, Арча педагогика көллияте укытучысы И.Низаметдиновның сүзләре белән тәмамлыйсы килә: “Җирдә яшәүче һәр кеше көнен, Экзюпериның кечкенә принцы кебек үк үзенең өендә, тирә–юнендә тәртип урнаштырудан башласын иде. Шул очракта гына ул үзен бәхетле итеп тоячак”. Бүген монда әйтелгән сүзләр һәркемнең күңеленә юл тапсын иде.
Гөлназ ГЫЙНИАТУЛЛИНА