Лиана исән калды

Лиана исән калды
Арча янгын часте гарнизоны җитәкчесе Мәсхүт Шәрәфиев белән Кәчегә барганда, шактый еллар элек Казанка авылында (ул үзе шунда туып–үскән) булган вакыйганы искә төшердек.
Төн урталарында Билалетдин Низаметдиновлар күршесендәге йортта янгын чыга. Билалетдин абыйның улы Рамил беренчеләрдән булып ярдәмгә ташлана, берничә тапкыр янган йортка кереп әйберләр алып чыгыша, соңгы керүендә чолан ишелеп төшә, яшь гомер вакытсыз өзелә. Аның батырлыгы алдында бүген дә баш иясе килә.
...26 мартта Кәче авылында 9 яшьлек Лиананы, инвалид кызны, әнисе йозак белән бикләп өйдә калдыра. Күрше Илгизәр абыйсы коткармаса, бу бала янып көлгә әйләнгән булыр иде.
— Кич маллар карап йөри идем, — дип сөйли Илгизәр Закиров. — Берзаман борынга төтен исе килә башлады. Урамга чыгуга каршыдагы йорттан төтен ургылганын күреп шунда йөгердем. Ишектә йозак, эчтән ачыргаланып кычкырган бала тавышы ишеттем. Ярый әле җил безнең якка исә иде...
Илгизәр таза ир–егет, армия хезмәтен “кайнар нокта”да үткән, гадәттән тыш хәлләргә һәрвакыт әзер. Монда да вакытның ни кадәр кадерле булуын яхшы аңлый ул. Тиз генә йозакны каерып атып, төтен баскан өйгә керә, ә анда бернәрсә дә күрерлек түгел. Бала да тынып калган, бәхетенә тагын бер тапкыр аваз сала, бичара, чоланга үрмәләп чыгарга көч тапкан. Илгизәр аны күтәреп алып тышка чыга, шуннан соң янгын сүндерүчеләргә шалтырата. Алар да, “Ашыгыч ярдәм” дә тиз килеп җитә. Битләре пешкән, чәчләре янган кызны хастаханәгә алып китәләр. Илгизәр абыйсы аның гомерен саклап кала.
— Елгада су алу урыны да тәртиптә иде, — ди Мәсхүт Шәрәфиев. — Бу яктан тоткарлык булмады. Илгизәр Закировка афәрин, диясе килә, ул булмаса, ахыры бик күңелсез бетә иде.
Дәүләт янгын күзәтчелеге җитәкчесе Рөстәм Сафин да Илгизәргә рәхмәт белдерә. Билгеле, эш рәхмәт белдерү белән генә чикләнмәячәк, батыр зуррак бүләккә лаек.
Илгизәр Закировны “Татарстан” ширкәте җитәкчесе Рүзәл Мәрданов та мактап бетерә алмый. Иң яхшы механизатор, үрнәк гаилә башлыгы, ике ул үстерәләр.
Ильяс ФӘТТАХОВ