Яхшылык явызлыкны җиңә

Яхшылык явызлыкны җиңә
Балигъ булмаган балалар белән эшләүче комиссияләрнең оешуына 95 ел тулды. Шул уңайдан Арчаның 5 гимназиясендә балигълык яшенә җитмәгән балалар белән эшләүче район комиссиясе әгъзалары, иҗтимагый инспекторлар, тәрбиячеләр белән семинар–киңәшмә булды.
Анда Арча муниципаль районы башкарма комитеты җитәкчесенең социаль мәсьәләләр буенча урынбасары, балигъ булмаган балалар эшләре һәм аларның хокукларын яклау буенча комиссия рәисе Надия Мифтахетдинова катнашты.
Балаларга карыйбыз да, аларның гамьсез шаяруларына кызыгып, бәхетле балачак, дибез. Әмма гаиләләр күп булган кебек, балалар язмышы да төрле. Балигълык яшенә җитмәгән балалар белән эшләүче комиссия әгъзалары, җәмәгать инспекторлары, тәрбиячеләре бала гаиләдә тиешле тәрбия алсын, алар арасында хокук бозулар булмасын өчен тырыша. Авыр хезмәт.
Юбилей уңаеннан Надия Равилевна, балаларны тәрбияләүгә зур хезмәт куйган ветераннарны котлап, Арча муниципаль районының балигъ булмаган балалар эшләре һәм аларның хокукларын яклау буенча комиссия рәисенең Мактау грамотасын, истәлекле бүләкләр тапшырды. Алар: Гәүһәрия Әһлиева, Нәзирә Әскәрова, Мөслимә Әхмәтова, Әлфия Галимҗанова, Нурия Гатауллина, Илдус Исмәгыйлев, Надежда Калуева, Ренат Фазлыәхмәтов.
Күңелле котлаулардан соң, Надия Мифтахетдинова 2009-2012 елларда хокук бозуларны кисәтү буенча Программа үтәлеше турында сөйләде һәм 2013-2016 елларга каралган Программа белән таныштырды. Балигъ булмаган балалар белән эшләүче комиссия, җәмәгать инспекторлары тарафыннан җитди эш алып барылганы, хезмәтләренең мактаулы һәм кыен икәнлеге, балалар арасында хокук бозуларның кимүе хакында тулы мәгълүмат алдык.
Утар–Аты мәктәбенең җәмәгать инспекторы Фәридә Моратова: “Һәр балага социаль пакет булдырдык, рейдлар үткәрәбез, хәйрия чаралары, гаилә бәйрәмнәре, тимурчылар командалары оештырабыз”,— дип, үзенең эш тәҗрибәсе белән уртаклашты.
Җәмәгать тәрбиячеләре районда 2009 елда оешты. Җитәкчеләр үз теләкләре белән авыр хәлле гаиләләрдәге, хокук бозучы балаларны тәрбияләргә алындылар. 2012 елда республиканың “Иң яхшы җәмәгать тәрбиячесе” бәйгесендә аерым номинациядә җиңеп чыккан ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов, үзенә беркетелгән яшүсмер белән ничек аралашуы турында сөйләп, үтемле тәрбия чаралары белән уртаклашты. “Баланы үзебезнең үрнәк, абруй белән тәрбиялибез”,— диде подполковник.
Арча эчке эшләр бүлегенең җәмәгать тәртибен саклау бүлеге җитәкчесе Ленар Минһаҗев шулай ук, җәмәгать инспекторы буларак, уңай тәҗрибәсе турында сөйләде.
Арча үзәк хастаханәсе балалар консультациясе мөдире Алсу Кузнецова балаларны ничек хәтәр гамәлләрдән, үз-үзләренә кул салудан саклап калу проблемасын күтәрде.
Соңыннан ветераннар үзләренең теләкләрен, киңәшләрен әйттеләр. “Яхшылык һәрвакытта да явызлыкны җиңә!”—балалар, ата-аналар белән әнә шул принциптан чыгып эшләргә киңәш итте алар.
Балигъ булмаган балалар белән эшләүчеләргә дә игелекле хезмәтләре өчен истәлекле бүләкләр тапшырылды.
Румия САТТАРОВА