Матурны яратабыз

Матурны яратабыз
Арча станциясендәге 3нче Күпер тыкрыгы урамының 6нчы, Күпер урамының 7нче, 13нче, Банк урамының 18, 20, 22, 37нче, Җиңүнең 40 еллыгы урамының 7нче күп фатирлы йортларында яшәүчеләр белән җыелышлар булды.
Әлеге йортларны ныклап төзекләндерү чыгымнарын финанслау мәсьәләсе турында сөйләшенде. Җыелышны “Идарәче компания” ширкәте җитәкчесе Фәрит Зәйнуллин алып барды.
РФнең “Торак–коммуналь хуҗалыгын үзгәртеп коруга ярдәм итү Фонды турындагы” законга үзгәрешләр керде. 270нче Федераль закон нигезендә 2013 елның 1 гыйнварыннан күп фатирлы йортларны ныклап төзекләндерү чыгымнарын финанслауның 15 проценты торак хуҗалары өлешенә туры килә, калган 85 процентын Россия, республика, район бюджетлары күтәрә. Әнә шул турыда сүз барды җыелышларда.
Йортны төзекләндерү өчен үз өлешеңне керткәч, ни әйтсәң дә, акчаны җилгә очырасы килми, сыйфат белән кызыксыну, эшләгәнне саклап тоту хисләре уянуы табигый хәл. Гомуми йортка әнә шул “минеке” дигән карашны тәрбияләүне максат итеп куя закон кабул итүчеләр.
— Йортны ныклап төзекләндерү чыгымнарының ничек финансланганын, “Идарәче компания” ширкәтенә килеп, сметадан карап белә аласыз,— дип җавап бирде Фәрит Шәүкәтович “безнең акчалар кая китә?” дип сораучыларга.
Әйе, бөтен нәрсә ачык булырга тиеш. ТРның Президенты Рөстәм Миңнеханов шуны таләп итә. Күп фатирлы йортларда яшәүчеләр белән җыелышлар үткәрелүе моның ачык мисалы. Аңлашылмаган сорауларга районның торак–коммуналь хуҗалыгы, энергетика һәм элемтә секторы мөдире Илфат Рәхимов, Бердәм исәп–хисап үзәге җитәкчесе Линар Әхмәдиев, шәһәр башкарма комитеты җитәкчесе урынбасары Айрат Хәсәнов җавап бирергә әзер.
Аз тәэмин ителгән гаиләләр өчен субсидия бар. Торак–коммуналь хезмәтләргә түләүләр, гаилә кеременең 21 процентыннан артса, нормативлардан чыгып, субсидия исәпләнә. Тиешле документлар белән социаль яклау бүлегенә килергә кирәк.
Күпер урамының 7, 13 йортларында яшәүчеләр белән җыелыш эчтә, күршедәге 9 йортның подъезд мәйданында үткәрелде. Ныклап төзекләндерелгән йорт бу. Чиста, төзек подъездда җыелып сөйләшүе дә күңелле. Төзүче кулы тигән йорт бөтенләй башка. Матур, уңай. Йортыңны төзекләндерәбез, яңартабыз, дип торганда, моңа сөенергә генә кирәк. Сыйфат мәсьәләсенә килгәндә, аны йорт хуҗалары карап, күзәтеп торсалар, бары тик файдага гына булачак.
Румия НАДРШИНА